Mga Higala Kinsa Mipakigbahin sa Ilang Kahayag uban Kanako
Ang tagsulat nagpuyo sa Baja California, Mexico.
Gibati nga nahadlok ug nag-inusara. Dayon mibalhin ko ngadto sa laing nasud ug miadto sa simbahan sa unang higayon sa dugay nang panahon.
Nagpuyo ko uban sa akong mama sa gamay nga lungsod sa Mexico diin ang tanan nakaila sa usag usa. Nakahibalo ko sa matarung gikan sa sayop, apan ako naglibug ug ang bugtong aktibo nga batan-ong babaye sa tibuok lungsod.
Gusto ko nga mahisakop, mao nga mibuhat ko sa usa ka butang nga ingon og sakto nianang higayuna: magbaton og usa ka uyab. Kini mao lamang ang usa sa unang mga sayop nga nasugdan nako sa paghimo. Nagsugod ko sa pagpadala sa pagpamugos sa ka edad ug nagtuo nga ako may igo nang kabuot sa paghunahuna alang sa akong kaugalingon, nga nagpasabut nga mahimong dili aktibo nga batan-ong babaye nga nagpuyo sa kangitngit.
Nagpuyo ko sa kangitngit sulod sa usa ka tuig, sa matag panahon nga molabay ang adlaw kini nagkangitngit. Ang akong dili maayo nga mga desisyon misangpot ngadto sa mga panaglalis uban sa akong pamilya, ug ako nakaamgo nga ako dili makapadayon sa pagpuyo uban kanila. Apan wala kini mahitabo hangtud sa kamatayon sa usa ka suod nga higala nga Santos sa Ulahing Adlaw nga ako nakaamgo nga dunay butang nga nawala. Sa walay palad, akong gibasol ang Dios ug ang ebanghelyo. Mihunong ko sa pagtuo nga ang mga panalangin miabut tungod sa pagkamasulundon. Nasayud ko nga kon ako dili mohukom sa pagsugod sa pagtuman sa ebanghelyo, ako magpadayon sa pagbaliwala sa akong koneksyon sa Simbahan ug magpadayon sa pagpuyo sa kalibutanong paagi.
Naglingkod ko sa akong higdaanan sa usa ka mangitngit nga kwarto, naghilak ug mibati og kasubo alang sa akong kaugalingon sa dihang ako nakaamgo nga ako nahadlok—nahadlok nga nag-inusara nga walay ka-istorya, nahadlok nga wala makahimo sa pag-usab sa mga sayop nga akong nahimo, nahadlok nga walay usa ang mopasaylo nako, ilabi sa Dios.
Sa katapusan, mibalhin ko ngadto sa Minnesota, USA, uban sa akong mga apohan, kinsa dili mga miyembro sa Simbahan. Ang akong ama-ama misakay sa eroplano uban nako, ug ang akong unang Dominggo didto, miadto mi sa simbahan, apan sa panagtigum lamang sa sakrament. Pagkahuman sa miting nakahukom nako nga mobiya na sa Simbahan, apan sa akong katingala, sa dihang nagpadulong na kami sa sakyanan, nakita namo ang bishop nga nagdagan aron makaapas pa namo. Nangutana siya og pipila ka pangutana ug midapit namo sa pagbalik sa sunod nga Dominggo—ug kami mibalik.
Pagkasunod Dominggo, sa hapit na mahuman ang panagtigum sa sakrament, sa wala pa ko makatindog, gilibutan na ko sa mga batan-ong mga babaye sa ward—mga batan-ong babaye nga motabang nako nga mausab ang akong kinabuhi.
Mga paghulagway pinaagi ni Alberto Ruggieri
Kalit akong misulod sa hingpit nga lahi nga kalibutan: usa ka kalibutan uban sa bishop ug sa presidente sa Young Women kinsa nagpangga kanako ug, labaw sa tanan, ang mga batan-ong babaye kinsa naningkamot sa pagsunod sa ebanghelyo matag adlaw, kinsa naningkamot sa pagpuyo og taas nga mga sumbanan ug magbarug alang sa matarung. Mihayag sila pag-ayo nga ilang malamdagan ang dalan sa akong atubangan.
Niana ako nakaamgo unsay angay nakong buhaton: “Pasigaa ang [akong] kahayag sa atubangan sa mga tawo, aron makita nila ang [akong] mga maayong buhat, ug dayegon nila ang [akong] Amahan nga anaa sa langit” (tan-awa sa Mateo 5:16). Ug mao nga nagsugod ko sa pag-adto sa simbahan ug sa Mutual matag semana, nagbasa sa Basahon ni Mormon ug nag-ampo matag adlaw, nagsinina og tarung, naggamit og maayong pinulongan, nag-adto sa templo, ug nag-andam sa akong kaugalingon aron makakuha sa akong patriyarkal nga panalangin.
Hingpit akong nausab, apan ako wala makaamgo hangtud sa Young Women camp, sa dihang gibati nako ang Espiritu Santo ug nakadiskobre nga ako adunay pagpamatuod—usa ka pagpamatuod nga mopahinumdom nako nga ang Dios nahigugma nako, nga Siya adunay plano alang kanako, ug nga Siya dili gusto nga ako mag-inusara. Usa ka pagpamatuod nga hayag kaayo ug lig-on nga kini nakapausab nako. Usa ka pagpamatuod nga ipakigbahin ug kahayag dili lamang sa akong dalan apan sa uban’. Usa ka pagpamatuod nga dili mahadlok sa paghayag diha sa kangitngit.