Digital Lamang: Batan-ong mga Hamtong
Pagpadayon human Masayri ang Paggamit og Pornograpiya sa Akong Pamanhunon
Ang akong pamanhunon miangkon sa katapusan nga duna siyay problema sa pornograpiya. Mahimo ko pa ba siyang minyoan?
Ang tagsulat nagpuyo sa French Polynesia.
Nakaila nako akong bana dihang pareho kaming mga counselor sa EFY. Nadani ko sa iyang lig-on nga pagpamatuod ug sa paagi nga siya nagtudlo ug nakig-uban sa mga batan-on.
Dihang nagsugod na mi og date, gibati namo nga ang Ginoo naglaum og usa ka butang gikan sa among relasyon. Hinoon, samtang nag-uswag ang among relasyon, nahimo siyang mas mapugsanon sa paagi sa iyang pagpakita sa pagbati. Nagduda ko nga aduna siyay mga kalisdanan bahin sa pornograpiya, apan kon maghisgot mi mahitungod niini, mihimakak siya nga siya adunay mga problema niini.
Nagsugod kami sa paghimo og mas istrikto nga mga lagda sa pagpanalipod sa among mga kaugalingon. Dihang siya mitanyag og kasal, akong gidawat ug ang mga butang nahimong mas maayo—hangtud nga usa niana ka adlaw dihang, sa makausa, misugod siya sa pagpugos sa pagpakita nako nga gihigugma ko niya sa mga paagi nga dili ko komportable.
Aduna gihapon akoy pagduda mahitungod sa iyang paggamit sa pornograpiya, mao nga usa ka adlaw ako siyang gisultihan bahin sa usa sa akong kauban sa misyon kinsa nanglimbasug sa pornograpiya sa wala pa ang iyang misyon. Naningkamot ko og maayo nga mopakita og pagsabut, paghigugma, ug walay paghukom, tungod kay sa pagkatinuod siya usa ka maayo kaayo nga tawo. Dayon nangutana ko niya og balik kon aduna ba siyay adiksyon sa pornograpiya, ug sa katapusan misulti siya nga anaa siya.
Nasakitan ug Pagkaayo
Sa sinugdanan, lisud sa akoa ang pagpakig-istorya kaniya ug pagtan-aw sa iyang mga mata. Hilabihan kabug-at sa akong mga pagbati tungod kay mibati ko nga ang Ginoo nagsulti nako nga kining tawhana maoy mahimo nakong mahangturon nga kauban. Apan bisan og nasakitan ko, nasayud ko nga kinahanglan ko nga mobuhat sa pagpasaylo niya, ug nabati nako ang pag-aghat nga mopadayon sa among relasyon.
Nag-ampo ako og maayo ug akong gitun-an ang mga mensahe mahitungod sa pagpasaylo ug ang paggamit sa pornograpiya. Nagbasa ko og daghang artikulo ug mga pagpamatuod sa mga minyo nga mga tawo kinsa ang kapikas adunay mga pakigbisog uban niini nga problema. Samtang nagbasa ko, akong gibati ang gugma sa Manluluwas alang kanako ug sa akong pamanhunon, ug nakadawat ko og laing kumpirmasyon nga kining tawhana mao gayud ang akong mahangturong kauban. Nakat-unan usab nako ang lahi nga aspeto sa Pag-ula sa Manluluwas—unsaon Niya pag-ayo ang usa ka mahinulsulon nga kalag (sa akong pamanhunon) ug ang usa ka samaran nga kasingkasing (akoa).
Ang importante nga butang sa among panaw mao ang pagpakigsulti sa bishop sa akong pamanhunon. Ang iyang paggiya mitabang namo sa pagkaayo ug pagkahimong mas suod isip duha ka tawo nga hapit na magminyo. Mapailubon kaayo siya sa panahon nga ang akong bana mibalik sa maong buhat, ug ang iyang sama kang Kristo, mahigugmaong ehemplo midasig ug mitabang nako sa pagpasaylo ug pagtrabaho niini nga problema uban sa akong pamanhunon.
Sa makadiyut, lisud kaayo sa akong pamanhunon nga makita ko nga nag-antus tungod sa iyang mga pagpili nga hapit dili na siya gustong makigminyo nako! Apan human sa pagtinabangay sa pipila ka bulan aron siya mahimong limpyo, sa katapusan gibati niya nga ang Ginoo ug ako sinsero nga nakapasaylo niya.
Sa katapusan, naminyo mi, ug ang among relasyon mas lig-on kay sa kaniadto. Kini nga kasinatian nakatabang namo nga dili magmaulawon nga mag-istoryahanay sa usag usa bahin sa among mga problema. Ug bisan wala na siya nalambigit sa pornograpiya, nagpabilin mi nga mas manggihunahunaon ug may tulubagon sa usag usa.
Ang Inyong Relasyon Molambo
Kon ang inyong relasyon nadaut tungod sa mga epekto sa pornograpiya, hibaloi nga ang pagpasaylo mahimong posible. Posible kini nga mopadayon sa paghigugma sa usag usa ug magtinabangay sa pagpangita og mga solusyon ug pagbuntog niini. Kitang tanan adunay katungod nga mamaayo sa Pag-ula sa Manluluwas. Kinahanglan natong dawaton nga kita nasakitan ug pinaagi lamang sa tabang sa Manluluwas kita hingpit nga mamaayo.
Talagsaon ang sugilanon sa matag tawo, ug ang matag relasyon talagsaon. Alang sa pipila ka tawo, ang pagtapos sa relasyon mahimong maoy insakto nga buhaton. Apan naglaum ko nga ang among sugilanon makatabang sa uban nga naa sa sama nga mga sitwasyon. Tungod kay nadawat nako ang kumpirmasyon gikan sa Espiritu Santo, ug uban sa tabang sa Manluluwas ug sa Iyang Pag-ula, nahimo nako ang pagpasaylo sa akong pamanhunon ug sa pagpadayon sa among relasyon. Nasayud ko nga mao kini ang sakto nga pagpili alang nako.
Kon nag-atubang ka og sama nga sitwasyon, ikonsiderar sa mainampuong paagi ang imong kasamtangan nga mga sirkumstansya ug unsa ang lagmit mahitabo sa umaabot. Kon makadawat ka og kumpirmasyon gikan sa Espiritu nga ang pagpadayon sa relasyon mao ang eksakto nga buhaton ug masaligon ka sa imong pagbati, hibaloi nga uban sa paningkamot gikan ninyong duha ug sa pagsalig sa Langitnong Amahan, ang inyong relasyon molambo.
Ang akong bana usa ka maayo nga tawo, ug mas labaw nako siyang gihigugma kay sa kaniadto! Hilabihan ang akong pagpasalamat sa Ginoo sa pagtabang kanamo nga mamaayo ug mahimong posible nga kami maminyo. Ang Ginoo mitabang namo nga molambo isip magtiayon nga andam moatubang sa bisag unsa nga Iyang giplano alang sa among kinabuhi nga magkauban.