Balaan nga Destiny
Ang tagsulat nagpuyo sa France.
Ang akong higala kasagaran malipayon sa tanang higayon. Unsa kaha ang nakahasol kaniya?
Paghulagway pinaagi ni Reginald Swinney
Gikan ko sa France, apan ang akong igsoong babaye ug ako migahin og usa ka tuig sa silangang Estados Unidos isip mga exchange student. Atol nianang higayuna, nakahimamat kami og daghang mga tawo, apan ang usa nga nakahatag nako og dakong impresyon mao ang usa ka babaye nga ginganlan og Destiny. Siya nahimong usa sa akong labing suod nga higala. Gibuhat namong duha ang tanang matang sa mga butang, panahon sa eskwelahan ug human sa eskwelahan ug uban sa akong igsoong babaye. Si Destiny kanunay nga malipayon. Kana mao ang butang nga akong labing nagustuhan kaniya.
Dayon usa ka adlaw nakita nako siya nga nahasol nga wala nako makita sukad. Nangutana ako kaniya unsay nahitabo. Miingon siya nga dili siya gusto nga maghisgot mahitungod niini. Dayon nakakita ko og papel sa iyang kamot. Gikuha nako kini ug gibasa kini.
Adunay tawo nga misulat og dili maayong mga butang ngadto kaniya. Ang sulat nga walay ngalan miingon nga siya ngil-ad, nga walay nakagusto kaniya, nga siya walay katuyoan nga mabuhi, ug nga siya kinahanglang molakaw ug mopatay sa iyang kaugalingon. Dili gayud ako makatuo nga sama kaniya atakihon og sama niana. Nakaapektar kini nako pag-ayo nga makahibalo sa ka sakit nga iyang gibati.
Gikan nianang higayuna, ako mihimo og mas dako pa nga paningkamot nga mahimong higala ni Destiny—dili lang mogahin og panahon uban kaniya, apan sa kanunay anaa alang kaniya, ug ilabi na sa pagkasinsero. Gipasabut nako kaniya nga siya usa ka anak nga babaye sa Dios, napanalanginan og balaan nga kinaiya, takus sa pagdayeg ug makahimo og dagko nga mga butang.
Lisud ang pagsulay sa paghigugma sa imong kaugalingon kon ang uban dili maayong motagad kanimo ug mosaway kanimo. Samtang ako nakighigala ni Destiny, akong nakat-unan nga usahay ang labing maayong paagi sa pagtabang sa uban mao lamang ang paghigugma kanila ug sa pagtabang kanila kinsa gayud sila.
Sa katapusan sa tuig, sa dihang kinahanglan na akong mopauli ngadto sa France, si Destiny misulti nako og butang nga akong gibahandi kanunay. “Emma,” miingon siya, “giluwas ko nimo. Sa wala pa ikaw moabut, gusto na akong magpakamatay. Apan dayon ikaw ug ang imong igsoong babaye mitabang nako og daghan, pinaagi sa pagpangga. Karon gihigugma na nako ang akong kaugalingon, ug gihigugma ko ikaw.”
Adunay daghang mga batan-on sa eskwelahan nga milahutay sa pangdaug-daog, kinsa gidagmalan ug biniyaan. Pangita og paagi sa pagtabang kanila. Pakigsulti kanila, paghunahuna mahitungod kanila, pagmabination ngadto kanila. Mao kana ang buhaton sa Manluluwas, ug usahay usa lang ka yanong hello o pahiyom ang makausab sa tanan.