Usa ka Bonus nga Panalangin

Roberto Atúncar Nieto

Lima, Peru

Ang akong asawa, nga si Carmen, ug ako bag-o lang nakabaton sa among unang anak sa dihang ako gitawag nga mahimong bishop sa among ward. Nianang higayuna, naglisud mi sa kwarta. Makakapoy kaayo alang nako sa pagsangkap sa akong pamilya ug sa samang higayon mobantay ug moatiman sa mga miyembro sa among ward.

Usa ka Dominggo, nakamatikod ko og single nga inahan uban sa iyang upat ka gagmay nga mga anak sa panagtigum sa sakramento. Milingkod siya sa katapusan nga lingkuranan sa chapel ug naningkamot pag-ayo sa pagpahilom sa iyang mga anak. Nasayud ko nga siya naglisud usab sa kwarta, apan wala gayud mangayo og tabang. Milabay ang mga semana, ug matag Dominggo miabut siya sa simbahan uban sa iyang mga anak.

Usa ka adlaw, nakadawat ko sa akong tseke. Napanalanginan nga nakadawat og bonus, nakahukom ko sa paggamit sa extra nga kwarta sa pagpalit og mga suplay alang sa gikinahanglan kaayo nga pag-ayo sa akong balay. Apan samtang nagpadulong ko ngadto sa merkado, kini nga sister ug ang iyang mga anak misulod sa akong hunahuna. Gibati nako nga kinahanglan nga gamiton ang extra nga kwarta sa pagpalit og pagkaon alang kanila. Gitawagan nako si Carmen ug misulti kaniya unsay akong gibati nga kinahanglan nakong buhaton. Siya miuyon.

Samtang ako namalit, ang akong mga mata nakatutok sa mga biskwit. Naghunahuna ko nga tingali ang mga bata ganahan og mga tam-is. Gipuno nako ang duha ka bag sa pagkaon ug mipadulong ngadto sa balay niini nga sister.

Nanuktok ko sa gubaon nga tabla nga pultahan makadaghan. Sa dihang molakaw na unta ko, ang pultahan sa katapusan naabli. “Bishop,” ang sister miingon, “nasurprisa ko nga nakakita nimo dinhi.” Sa kalit, ang iyang mga anak migawas diha sa iyang luyo.

“Nagdala ko og pagkaon kanimo,” miingon ko.

Usa sa iyang anak nga babaye nakakita sa mga biskwit ug misinggit, “Mga biskwit!” Ang iyang mga igsoon nalipay nga nagpundok. Ang usa ka pito ka tuig nga anak nga babaye migakos nako. “Salamat, Bishop!” miingon siya.

Mitan-aw ko sa sulod sa ilang balay ug nakakita nga kini nga sister nanglaba sa mga sinina diha sa planggana diha sa salog. Ang pamilya walay lamesa ug natulog sa mattress diha sa salog. Nakaamgo ko nga daghan silag gikinahanglan. Nakigsabut ko sa pagsiguro nga sila makaangkon og lamesa ug nga ang matag usa adunay higdaanan.

Kini nga kasinatian nakatabang nako sa pagkaamgo nga ang Ginoo mogiya ug mopanalangin sa Iyang mga sulugoon. Wala kita magkinahanglan og espesyal nga calling aron motabang sa atong mga kaigsoonan. Kinahanglan lang nga kita nagsunod sa Espiritu, makahibalo kinsa ang nagkinahanglan sa atong tabang, ug andam nga mahimong mga instrumento sa mga kamot sa Ginoo.