Digital Lamang: Batan-ong mga Hamtong
Nakigbisog ko sa Pagbuntog sa Pornograpiya. Nganong Dili Man Siya?
Dihang akong nahibaloan nga ang akong hinigugma adunay problema sa pornograpiya, naningkamot ko og maayo sa pagtabang niya nga modangup ngadto sa Manluluwas alang sa tabang.
Ang tagsulat nagpuyo sa Guatemala.
Nakig-date ko hapit sulod sa usa ka tuig sa usa ka batan-ong lalaki nga akong gihigugma pag-ayo. Nagtuo gyud ko nga magminyo ko niya! Apan wala ko magtuo nga ang pagpakig-date niya nagkinahanglan nako nga moatubang og usa ka problema nga kanhi ako nakigbisog sa pagbuntog uban sa tanan nakong kusog.
Dihang nangandam ko sa akong misyon, nakigkita ko sa akong bishop ug mikompisal nga nanlimbasug ko sa pornograpiya kaniadto. Human ako naghinulsol ug mitangtang niining palas-anon gikan sa akong espiritu, wala ko magdahum nga ang pornograpiya moapekto na usab sa akong kinabuhi. Apan nasayop ko.
Dihang akong nadiskobrehan nga kining tawo nga akong giplanohang minyoan naggamit og pornograpiya, gusto kaayo ko nga motabang niya ug mosuporta kaniya sa pagbuntog niini. Miagi na ko sa proseso sa paghinulsol ug sa paningkamot sa pagbuntog sa pornograpiya sa una, ug nasayud ako unsa ang mahimo sa Ginoo kaniya. Apan morag sa kada higayon nga mosulay ko sa paggiya niya ngadto sa tabang nga iyang gikinahanglan sa pagbuntog sa iyang problema, dili magkadimao ang tanan. Daw dili siya gusto nga tabangan. Taud-taod, nakaamgo ko nga dili parehas among mga hunahuna bahin sa pornograpiya. Oo, parehas mi nga mga miyembro sa Simbahan, apan mora og dili parehas ang among pagsabut sa mga pagtulun-an sa ebanghelyo.
Nasagmuyo ko. Gihigugma nako siya, ug nagtuo ko nga uban sa tabang, mabuntog niya kini nga problema. Mibati usab ako og kahuyang tungod kay akong atubangon ang sama nga problema nga akong gipaningkamutan og maayo nga mabuntog kaniadto. Usa niana ka gabii nakadesisyon ako sa pag-ampo ug pagpangayo og kaalam gikan sa akong Amahan sa Langit kon unsaon sa pagpadayon tungod kay nanginahanglan ko sa gahum sa pagbatok sa tintasyon, ug gusto pud ko mahibalo unsaon sa pagsuporta sa tawo nga akong giplanuhan nga ikauban sa akong kinabuhi.
Dihang ang tubag sa katapusan miabut, mibati ko og kalinaw ug nasayud nga kinahanglan makig-istorya ko sa tawo nga akong gika-date nga adunay gihuna-huna nang daang katuyuan. Gusto ko nga masayran niya unsa ang akong gilauman sa pagpakig-date, nga mao ang pagminyo sa templo ug pagbaton og mga anak. Kinahanglan kong masayud kon ang among umaabut nga mga tumong parehas ba ug kon siya naglihok paduol ngadto sa Manluluwas. Kinahanglan kong masayud kon ipadayon ba namo ang among relasyon. Malaumon kaayo ko alang niini ug nagtuo nga pagkahuman namo og istorya, ang tanan mamaayo ra.
Usa kadto ka init nga kahapunon dihang akong gipakigbahin kaniya ang akong mga damgo ug mga tinguha mahitungod sa akong umaabut nga pamilya ug sa pagpadako sa akong mga anak diha sa ebanghelyo. Sa akong katingala, pagkahuman og paminaw nako, nasuko siya nako. Nakaamgo ko nga lahi ra kaayo ang among mga ideya bahin sa umaabot. Nasagmuyo ko, apan nasurpresa nga mibati ko og kalinaw, ug nasayud ko nga ang tubag mao ang pagtapos sa relasyon. Wala siya sa usa ka dapit diin siya andam nga mosulay sa pagbuntog sa iyang mga problema sa pornograpiya o modangup sa Manluluwas alang sa panabang, ug dili nako siya matabangan kon siya dili gusto sa tabang.
Sa makadiyut, naglibog ko nganong bisan human sa pagbuhat sa insakto ug sa pagbuhat sa tanan nakong mahimo sa pagtabang niya, sobra ang akong kaguol tungod kay natapos ang among relasyon. Apan sa katapusan, gihilak nako ang katapusang mga luha alang niya ug akong gihunahuna ang kalinaw nga akong gibati sa dihang gitapos nako ang relasyon. Nasayud ko nga ang maong tubag gikan sa langit.
Pipila na ka tuig sukad nga ang akong relasyon niana nga tawo natapos. Ako gihapon siyang gikonsiderar nga mao gihapon nga buotan nga tawo. Apan nasayud ko nga siya nagkinahanglan nga mao ang mopaduol sa Manluluwas alang sa tabang—dili ko mahimong mopugos niya. Aduna siyay kabubut-on ug aduna usab ako. Sukad niini nga kasinatian, naningkamot ko sa pagsunod sa tingog sa Balaang Espiritu nga walay pagduha-duha. Nasayud ko nga ang Langitnong Amahan adunay plano alang kanatong tanan ug nga kita makasalig nga samtang kita mohimo og mga desisyon nga gibase sa mga pag-aghat sa Espiritu, Siya dili gayud mopahisalaag kanato. Kanunay Siya nga nag-andam kanato alang sa maayong mga butang nga moabut.