Dili Mahadlok nga Mopakigbahin sa Kamatuoran
Nasangkapan uban sa pagpamatuod sa ebanghelyo ug sa mga panalangin niini, si Fabian wala motugot nga ang iyang pagkabatan-on makapugong kaniya nga mahimong gamhanan, walay kahadlok nga miyembro nga misyonaryo.
Ang adlaw misalop na sa kasilinganan nga natukod sa balason nga bungtod nga nag-umbaw sa Antofagasta. Sa ubos, ang mga suga nagsugod na sa pagsiga samtang mitikyop ang adlaw niining pantalan nga siyudad sa amihanang Chile.
Sabado na sa gabii, ug ang 13 anyos nga si Fabian H. mosuroy uban sa iyang mga higala. Apan si Fabian, usa ka bag-o nga miyembro sa Simbahan, mipili nga mogahin hinoon sa gabii uban sa full-time nga mga misyonaryo. Panahon na “sa pagtabang sa pagpundok sa Israel.”1
Sa tanang mahalaron nga miyembro nga mga misyonaryo nga gikauban sa pagtrabaho nila ni Kellen VanNatter ug Jordan Shelton atol sa ilang full-time nga mga misyon sa Chile, si Fabian ang labing kugihan.
“Kon siya walay buhaton, siya mouban namo sa paghimo sa misyonaryo nga buhat,” miingon si Kellen. “Kon mahuman na ang bakasyon, siya magmasulub-on dili lamang tungod kay kinahanglang mobalik na sa pag-eskwela apan usab tungod kay siya wala na kaayoy panahon nga mokuyog namo.”
Si Jordan, kinsa migahin og pipila ka bulan isip kompanyon ni Kellen midugang, “Si Fabian tingali mokuyog namo mga upat o lima ka higayon sa usa ka semana—matag semana—samtang nagserbisyo kami sa Antofagasta. Siya mao ang labing kugihan nga miyembro nga misyonaryo nga sukad among gikakuyog.”
Unsay nakapahimo sa usa ka batan-on nga andam kaayo nga mohimo sa misyonaryo nga buhat bisan pa sa pagbiay-biay sa mga kauban sa klase ug mga pabaliwala gikan sa mga estranghero? Alang ni Fabian, ang tubag anaa sa mga panalangin nga nadawat niya ug sa iyang pamilya sukad midawat sa ebanghelyo—mga panalangin nga iyang gusto nga ipakigbahin sa uban.
“Dili Matugkad nga Kalipay”
Si Fabian nagsugod sa pagpaminaw sa mga leksyon sa misyonaryo human manuktok ang mga misyonaryo. Nakahinumdom gihapon siya sa iyang unang panagtigum sa sakramento.
“Wala koy nailhan sa akong pagsulod sa chapel, mao nga gikulbaan ko og gamay,” siya miingon. “Apan gibati nako nga dunay butang nga talagsaon. Gibati nako nga ako dugay na sa Simbahan sulod sa mga bulan o mga tuig.”
Atol sa iyang bunyag paglabay sa pipila ka semana, “Dili nako matugkad ang kalipay nga gipaunlod sa tubig ug mihaw-as gikan pag-usab. Gibati nako nga usa ka bag-ong tawo, nakahibalo nga ako mosunod ni Jesukristo ug mobuhat sa akong labing maayo sa pagtuman a Iyang mga sugo.”
Sa dihang ang wala pa makasal nga mga ginikanan ni Fabian, sila si Leonardo ug Angela, miapil sa ilang anak atol sa mga leksyon sa misyonaryo, ilang nahibaloan ang mahitungod sa kaminyoon sa templo ug mahangturong mga pamilya. “Paglabay sa usa ka semana, ang akong amahan mitakda og petsa sa kasal,” miingon si Fabian. “Ang akong mama nalipay kaayo.”
Upat ka bulan human si Fabian miapil sa Simbahan, si Angela misunod kaniya ngadto sa tubig sa bunyag. “Kadto usa ka talagsaon nga panalangin,” miingon siya.
Ang ubang mga panalangin daling misunod. Si Leonardo, kinsa nabunyagan sa dihang gamay pa siya, mibalik ngadto sa kalihokan sa Simbahan. Ang pagtuon sa ebanghelyo nahimong gikinahanglan nga kalihokan sa ilang panimalay. Ang mga sakop sa pamilya nagkasuod. Si Leonardo nakakita og permanente nga trabaho. Ug si Fabian nakadawat sa Aaronic nga Pagkapari.
“Ganahan ko nga maghupot sa pagkapari aron ako makapaambit sa sakramento ngadto sa mga miyembro sa ward ug motabang kanila sa pagbag-o sa ilang mga pakigsaad,” miingon si Fabian. “Malipayon kaayo ko sa dihang makapaambit ngadto sa akong pamilya ug ngadto sa mga elder nga nagtudlo kanako. Ang mapasigarbuhon nga tinan-awan nga gihatag sa akong amahan kanako samtang siya nakakita nako nga mipaambit sa sakramento nakapalipay nako pag-ayo.”
“Kana Maanindot”
Si Fabian nagsugod sa paghimo og miyembro nga misyonaryo nga buhat sa wala pa gani siya mabunyagi.
“Gisultihan nako ang akong tulo ka higala nga ako bunyagan. Duha nila miabut,” miingon siya. “Gusto ko nga mopakigbahin sa ebanghelyo aron ang akong mga higala makasabut unsay atong gituohan ug unsay atong buhaton sa simbahan ug aron nga sila makat-on sa ebanghelyo, mabunyagan, ug mosangpot sa mas malipayon nga mga kinabuhi. Ako malipay kaayo kon usa nila mabunyagan ug mahimong usa sa mga sakop sa akong korum. Nindot kaayo kana.”
Si Fabian magdala og Basahon ni Mormon sa eskwelahan, ug siya magdala og mga missionary pamphlet nga ihatag ngadto sa mga higala. Malipayon siya nga motubag sa mga pangutana mahitungod sa Simbahan ug modapit og mga higala ngadto sa mga miting sa Dominggo ug sa kalihokan sa gabii sa kabatan-onan. Ug siya dili mahadlok nga moduol og mga tawo sa kadalanan ug, sama sa gitudlo sa misyonaryo kaniya, modapit kanila sa pagkat-on mahitungod sa Simbahan ug sa pag-andam alang sa bunyag.
“Si Fabian dili magsapayan kon dunay magtuo nga siya bakikaw sa pagpakigbahin sa iyang pagpamatuod,” miingon si Kellen. “Siya nasayud nga siya nagbuhat sa sakto nga butang. Siya nasayud nga ang espirituhanong mga butang mas importante kay sa bisan unsa pa.”
Sa dihang si Fabian mipakigbahin sa iyang pagpamatuod, miingon si Jordan, siya nakadawat og gahum gikan sa pagkakabig, sa iyang gugma sa ebanghelyo, ug sa iyang mga panalangin.
“Siya nakakita sa mga panalangin nga miabut sa iyang pamilya, nga mao ang nakapadasig kaniya nga maisugon kaayo ug prangka sa pagpakigbahin sa ebanghelyo uban sa iyang mga higala,” miingon si Jordan. “Sa makausa siya nagpamatuod ngadto sa usa ka investigator mahitungod kon unsa ka dako nga panalangin alang sa iyang mga ginikanan nga maminyo apan unsa ka lisud alang kaniya sa paghulat og upat ka bulan human sa iyang bunyag aron ang iyang inahan mabunyagan. Nahimo siyang emosyonal, ug nagsugod sa paghilak. Dayon siya nagpamatuod nga kon kita motuman sa mga sugo, ang Dios moatiman kanato.”
Ang pagpamatuod ni Fabian nakapahimo niya nga usa ka gamhanan nga miyembro nga misyonaryo, dugang ni Kellen.
“Siya dili sama sa, ‘O, nakadungog ko og usa ka tawo nga miingon niini sa simbahan.’ Hinoon, siya kanunay nga mopakigbahin sa iyang kaugalingong personal nga mga kasinatian—sama sa paagi nga iyang gibati sa diha nga siya misimba sa unang higayon ug sa unsay iyang gibati sa dihang siya mibasa sa Basahon ni Mormon. Kasaligan kaayo kini ug tinuod.”
“Mas Nindot Akong Gibati Kanunay”
Alang ni Fabian, ang pagpakigbahin sa ebanghelyo nagdala og laing panalangin.
“Usahay dili maayo nga mga butang mahitabo kanako sa eskwelahan, apan ang mga misyonaryo moabut nga nanuktok sa akong pultahan ug mangutana kon andam ba ako nga motabang kanila sa pagtudlo,” miingon siya. “Human mokuyog kanila, gibati nako nga ingon og ako walay bisan unsa nga mga problema. Mas maayo ang akong bation kon ako mouban kanila, mobasa sa mga kasulatan uban nila, ug motabang nila sa pagpakigbahin sa ebanghelyo. Ang pagpakigbahin sa ebanghelyo ug sa istorya sa akong pagkakabig nakapalig-on sa akong pagpamatuod. Ug ang pagtudlo sa ebanghelyo nakahatag nako og oportunidad nga mahimong usa ka ehemplo ngadto sa uban, lakip sa akong manghud nga babaye.”
Dili ikasurprisa nga usa sa labing dako nga mga tumong ni Fabian mao nga mahimong usa ka full-time nga misyonaryo mismo human siya mogradwar gikan sa high school.
“Gusto ko nga mopakigbahin sa kamatuoran uban niadtong kinsa wala makahibalo niini,” miingon siya. “Gusto ko nga modapit kanila aron mahugasan ang ilang mga sala. Gusto ko nga motudlo nila unsaon nila nga mahimong usa ka mahangturong pamilya. Gusto ko nga modapit nila nga magmalipayon karon ug magpuyo sa usa ka kahimtang sa walay katapusan nga kalipay human niini nga kinabuhi.”