Usa ka Puti nga Kalo alang ni Florence
Ang tagsulat nagpuyo sa Michigan, USA.
Ang trese anyos nga si Florence Onyejekwe miabut sa iyang kasagaran nga lugar sa daghag tawo nga merkado sa Onitsha, Nigeria. Ang dalan napuno sa mga namaligya nga nanawag sa nagkapuliki nga mga mamalitay. Ang mga babaye mibalanse sa gilukdo nila nga mga bukag samtang sila naglakaw. Ang ting-eskwela bag-o lang nahuman alang sa holiday, ug si Florence nasayud nga ang iyang mga higala nalingaw nga wala nay klase. Apan si Florence migahin sa iyang mga holiday sa pagpamaligya og bitterleaf dinhi sa merkado. Mao lamang kini ang iyang kahigayunan nga makatigum og kwarta alang sa mga balayranan sa eskwelahan.
Si Florence hinoon, wala magbagulbol. Gani, ang iyang mama migahin og taas nga oras sa merkado matag adlaw mamaligya og mga ubi aron ipalit og pagkaon alang sa pamilya. Si Mama mitrabaho pag-ayo. Ang iyang mga ginikanan nagtrabaho pag-ayo. Apan kon walay edukasyon, gamay ra kaayo ang ilang mahimo. Hapit na mahuman si Florence sa pag-eskwela sa elementarya. Tingali kon makapadayon siya sa iyang pag-eskwela, siya makakuha og maayong suweldo nga trabaho ug makatabang sa iyang pamilya.
Sa dihang mipauli siya, nakita ni Florence ang iyang mga ginikanan ug nangutana, “Sa inyong pagtuo makaeskwela pa kaha ko sa high school? Ug tingali sa unibersidad?”
Si Mama mitan-aw ni Nnam (papa) ug milingo-lingo sa iyang ulo. “Ang unibersidad dako kaayo og gasto labaw pa sa unsay naa nato,” miingon si Nnam. Gitan-aw ni Florence ang iyang mga sapatos. Dili siya gusto nga si Mama ug si Nnam nga makakita kon unsa ka dako ang iyang kadismaya.
Paglabay sa pipila ka adlaw, si Florence mihapit sa ospital aron sa pagkuha og pipila ka tambal. Ang ospital hapit sama ka busy sa merkado, hinoon dili sama ka saba. Si Florence mitutok sa mga nurse sa ilang gahi, puti nga mga kalo. Iyang gihulagway ang iyang kaugalingon sa uniporme sama niana, nagtabang sa masakiton ug nag-atiman sa mga masuso sa usa ka dako nga ospital. Tingali siya mahimong usa ka nurse.
Si Florence nakahibalo nga sakto ang iyang mga ginikanan—ang pagkuha og edukasyon lisud. Apan si Florence kahibalo unsaon sa pagtrabaho pag-ayo. Nakahukom siya nga mosulay.
Bisan unsa pa ka daghan sa buluhaton nga mipuno sa iyang adlaw, si Florence migahin og panahon sa pagtuon. Nakapasar siya sa test alang sa high school, ug si Nnam nanghulam og igong kwarta aron siya makaeskwela. Unya nakahibalo siya nga ang gobyerno motabang og bayad alang sa eskwelahan sa pagka-nurse. Ang iyang damgo makab-ot ra!
Apan sa dihang panahon na nga mosugod ang eskwelahan sa pagka-nurse, si Florence mibati og gamay nga pagduha-duha. Unsa kaha kon lisud kaayo? Unsa kaha kon siya mingawon? Giduko ni Florence ang iyang ulo ug nag-ampo, “Minahal nga Dios, palihug hatagi ko sa kusog sa pag-adto sa eskwelahan sa pagka-nurse ug maningkamot pag-ayo.”
Sa eskwelahan sa pagka-nurse, si Florence nakat-on unsaon sa paghatag og tambal ug paglimpyo sa mga himan gikan sa mga kagaw. Usahay ang iyang mga pasyente mamaayo, usahay dili. Si Florence nag-ampo kanunay alang sa kaisug. Human sa tulo ka taas nga tuig, si Florence migradwar uban sa ganti nga labing maayo sa iyang klase. Ang iyang damgo natinuod! Nakasul-ob na siya sa puti nga kalo sa nurse, ug siya nakakwarta og igo sa pagtabang sa iyang pamilya.
Paglabay sa daghang mga tuig, si Florence mibisita sa gamay nga branch sa Ghana Accra Mission. Ang iyang bana, si Christopher Chukwurah, mao ang presidente sa misyon didto. Si Florence nakahimamat og pipila ka bata sa branch nga dili kanunay makaeskwela. Sila wala makasiguro unsay buhaton sa ilang umaabut. Sila mipahinumdom ni Florence sa iyang kaugalingon sa bata pa. “Unsay akong masulti sa pagtabang kanila?” Nag-ampo si Florence sa hilom.
Dayon mibati siya og klaro nga pag-aghat: Sultihi sila mahitungod sa imong kinabuhi.
Si Florence naghunahuna sa iyang kinabuhi. Siya nakatrabaho sa mga ospital sa Nigeria ug sa Estados Unidos. Siya naminyo sa usa ka buotan nga tawo, ug silang duha nakakaplag sa Ang Simbahan ni Jesukristo sa mga Santos sa Ulahing mga Adlaw. Siya nahimong usa ka inahan. Karon siya nagtabang sa mga misyonaryo nga magpabilin nga himsog ug nagtrabaho pag-ayo. Ang Langitnong Amahan mitabang kaniya nga mahimong usa ka nurse. Siya mitabang kaniya sa pagbuhat pa og mas daghan kay sa iyang mahunahuna. Siya makahimo sa sama alang niini nga mga bata.
Si Florence mitan-aw sa mga bata ug mipahiyom. “Nakahibalo ba kamo nianang puti nga mga kalo nga gisul-ob sa mga nurse? Nakakita ako og kalo sama niana ug nakahukom nga mahimong usa ka nurse …”