Ol Pikinini mo Ol Yut: Stat Strong

Bonnie H. Cordon

Yang Woman Jeneral Presiden

Stephen W. Owen

Yang Man Jeneral Presiden

Joy D. JonesPraemeri Jeneral Presiden

Ol lida blong Jos oli serem olsem wanem ol papa mo mama, mo ol wod oli save helpem ol pikinini blong kam olsem Sevya.

I nomata se yu yu glad tumas, o yu yu wari smol abaot ol niu wok blong Jos ia—Ol Pikinini mo Ol Yut—maet yu gat samfala kwestin: “?Olsem wanem bae hemia i helpem ol pikinini blong mi?” “?Olsem wanem nao yumi mekem hemia?” “?Wanem nao rol blong mi insaed long hemia?”

Ol lida blong Jos oli givim samfala ansa.

?From wanem Jos i stap mekem jenis ia?

Sista Bonnie H. Cordon: Olsem we Presiden Russell M. Nelson i bin tijim, yumi evriwan i nidim blong kam antap long paoa blong yumi blong kasem revelesen.¹ Oli setemap Ol Pikinini mo Ol Yut blong invaetem wanwan man, woman mo famli blong lukaotem insperesen we i kam long Spirit long hao blong progres mo faenem glad long kavenan rod ia. Hemia i wan rod we i ron folem sem saed blong wan profet we i bin gat visen long hem from wanwan long yumi.

Brata Stephen W. Owen: Presiden Nelson i stap tijim yumi tu se yumi wan Jos we hom i senta, i nomata se hom blong yumi i luk olsem wanem.² Yumi no wan Jos we program i senta long hem. Ol lida mo tija blong Jos oli save helpem ol pikinini blong yumi blong oli lan mo oli laef folem doktrin, be responsabiliti ia i stat insaed long hom, mo hem i wan evri dei responsabiliti.

Olsem we profet i bin tijim, yumi nid blong lukaotem revelesen mo folem Spirit, mo Ol Pikinini mo Ol Yut bae i helpem yumi blong mekem hemia—wan pat blong hemia i from evri samting i kam simpol nomo. Long taem bifo i kam, i bin gat plante handred samting we ol papa mo mama oli mas folemap mo andastanem insaed long Progres blong Miwan, Diuti long God, Fet long God, mo ol nara program blong Jos, hemia taem ol pikinini blong olgeta oli progres tru long ol yangfala yia blong olgeta. Niufala rod ia, i invaetem ol yut mo ol pikinini blong lukaotem insperesen taem oli stap setem ol gol folem ol nid mo ol intres blong olgeta.

Sista Joy D. Jones: Hemia i wan gudfala janis blong ol pikinini mo ol yut blong yumi, we oli jeneresen ia we i stap kam antap, blong oli mekem fet blong olgeta long Jisas Kraes i moa dip. Taem oli stap lanem blong lukaotem mo mekem folem wanem we Tabu Spirit i talem long olgeta, bae oli andastanem gud moa aedentiti blong olgeta we i no save finis, mo stamba tingting blong olgeta, mo hao oli save progres mo filim lav ia we Papa long Heven i gat long olgeta. Ol Pikinini mo Ol Yut, i lukluk nomo blong blesem mo mekem ol yut mo ol famli blong olgeta oli kam strong moa blong stanemap mo fidim ol rilesensip insaed long hom blong olgeta, insaed long jos, mo wetem Papa blong olgeta long Heven.

?Wanem nao oli ol fas step we ol famli oli save tekem blong stat yusum Ol Pikinini mo Ol Yut?

Sista Jones: Prea tugeta blong Spirit i lidim yufala. Ol papa mo mama oli save stat blong toktok wetem famli blong olgeta abaot ol trifala eria blong stat praktisim Ol Pikinini mo Ol Yut: lanem gospel, seves mo aktiviti, mo divelopmen blong yuwan. ?Wanem nao oli stap mekem naoia? ?Olsem wanem nao oli stap groap olsem wanwan man, woman mo olsem wan famli long ol trifala eria ia? ?Olsem wanem nao we, taem bae oli lukluk nomo long Luk 2:52, bae i helpem olgeta blong lidim ol plan mo putum ol gol blong olgeta blong save tingbaot mo folem Sevya? Hem i wan gudfala janis blong mekem ol yut, hom mo famli i kam strong moa long sam wei we oli simpol, oli gogohed oltaem mo oli gat mining.

Sista Cordon: Yumi stat wetem smol pat long wan taem. Blong stap wokbaot long rod ia blong kavenan, i jes blong putum wan leg long fored blong narawan. Mekem wan gol. Stat simpol. Gaedbuk blong ol yut mo ol pikinini bae i givim yumi wan gudfala paten blong stap folem.

Brata Owen: Yumi no mas mekem hemia i fasfas tumas. Hemia i simpol nomo. Ridim Luk 2:52. Stat long ples ia. Wan papa o mama i save sidaon wetem pikinini blong olgeta, o yut long hom, mo tokbaot skripja ia. “?Olsem wanem nao bae yumi helpem yu blong groap long waes tingting mo long bodi mo blong God mo man i laekem yu?” “?Wanem nao yumi save lanem o mekem tugeta? “?Wanem ol gol yu save putum blong wok from?” Mekem i simpol nomo.

Sapos i gat wan samting we yu wantem blong ol pikinini mo ol yut oli save taem program ia i stap gohed, ?bae hem i wanem?

Sista Cordon: !Hemia i wan gudfala janis tumas blong groap olsem we Sevya i bin mekem! Sapos yumi stap askem yumiwan: “?Bae mi lukluk long wanem nomo?” Bae yumi save tingbaot se yumi stap mekem finis sam samting blong save kam olsem Hem. Blong stap lanem gospel, hemia i stap hapen long plante hom mo long jos. Yumi save givim seves mo stap tekpat long ol aktiviti. Niufala rod ia, i wan wei nomo blong yumi, blong wantem mo blong yumi ansa from ol aksen we bae yumi stap tekem folem wanem yumi stap lanem—mo blong lukluk nomo se yumi stap groap long ol fofala eria ia we Sevya i bin stap groap long hem: long saed blong spirit, long saed blong sosol laef, long saed blong bodi, mo long saed blong waes (luk long Luk 2:52). !Hemia bae i tekem glad, pis, mo hapines we i stap, i kam long yumi evriwan taem yumi stap folem Sevya!

Sista Jones: Divelopmen, i lukluk nomo long Sevya, we i stap long senta blong famli, mo Jos i stap sapotem. Hemia i mekem samting i kam simpol mo i folem nid blong wanwan, mo semtaem, yumi stap aot long ol program blong bifo. Fasin blong groap, bae i hapen long wanwan. Mi hop se ol pikinini, ol yut, ol lida mo ol famli blong olgeta, bambae oli andastanem se hemia i wan wei we eniwan i save kasem, mo i wan wei we oli save stretem, blong evriwan long ol pikinini blong Papa long Heven raon long wol ia, oli save progres tugeta mo oli save gotru long glad ia folem kavenan rod ia. Hemia bae i no wan bigfala jenis, o bae i no wan had kona blong tekem. Hemia i jes blong mekem moa wanem we yumi stap mekem finis taem we Spirit i stap lidim yumi, blong mekem se ol tru hadwok blong yumi oli save givim yumi moa paoa blong wantem mo kam gud moa blong folem Sevya.

?From wanem hem i impoten blong ol yut mo ol pikinini oli developem olgeta olsem Sevya?

Sista Jones: Faswan mo moa impoten, oli bin mekem olgeta kavenan blong oltaem folem Hem. Oli bin mekem ol kavenan blong “stanap olsem ol witnes blong God long evri taem mo long evri samting, mo long evri ples” (Mosaea 18:9). Mekem se oli nidim blong developem olgeta semmak olsem we Hem i bin mekem: long saed blong spirit, long saed blong sosol laef, long saed blong bodi, mo long saed blong waes tingting. Kavenan blong olgeta oli no wan risen ia nomo from wanem oli mas mekem hemia, be tu, ol kavenan ia oli givim janis we i givim paoa ia blong helpem olgeta blong kasem ol gol blong olgeta.

Brata Owen: Ful stamba tingting blong yumi long laef, hem i blong holem mo kam olsem Papa long Heven mo Pikinini blong Hem, Jisas Kraes. Yumi wantem kam olsem Tufala. Yumi stat blong praktisim hemia taem yumi yangfala, mekem se yumi gat wan paten i stap blong ful laef blong yumi. Mo yumi rili stap folem Sevya taem yumi stap mekem olgeta samting we Hem i bin mekem.

Sista Cordon: Sevya i eksampol blong yumi long saed blong evri samting. Yumi stap stadi long laef mo misin, mo ol tijing blong Hem from se Hem i evri samting ia we yumi wantem kam olsem. Be, from se wanwan long yumi i defren, wanwan long yumi i gat ol fasin mo ol skil we yumi nidim blong developem blong kam olsem Hem. Niufala rod ia, i givim long ol pikinini mo ol yut, wan janis we oli save jusum wanem i stap long hem blong oli gro long ol spesel wei ia, blong developem ol presen we i blong olgeta wanwan, mo blong faenemaot olgeta samting ia we Spirit i talem olgeta blong mekem, blong oli save kam moa olsem Sevya. Hemia nao i mekem se rod ia, i blong wanwan. Hemia i no wan lis blong stap tikim i go. Olgeta gol ia, we wanwan long yumi i putum blong muv fored long kavenan rod ia, bae i defren; be tugeta, bambae yumi stap lanem mo stap groap mo stap go kolosap moa long Sevya.

?Wanem nao yu yu hop se ol pikinini mo ol yut oli filim taem bae oli tekpat?

Sista Cordon: Mi hop se oli kasem wan moa dip andastaning abaot aedentiti blong olgeta we i no save finis. Bae oli filim tu se oli pat blong wan samting. Taem yumi save huia yumi, mo yumi blong hu, nao bae yumi mekem samting i defren. Bae oli lan blong luksave se, wanem we sam sosol media oli talem, i no tru oltaem, from se oli bin gotru long wan eksperiens we i soem olgeta olsem wanem Spirit i stap toktok long olgeta. Bae oli gat moa tras long olgetawan mo long tabu paoa blong olgeta olsem ol gel mo ol boe blong God.

Sista Jones: Yumi wantem olgeta blong filim fet mo hop ia long Jisas Kraes, blong filim pis we i kam taem oli stap obei long ol komanmen, blong gat eksperiens blong ol helti rilesensip, blong lan blong girap bakegen afta wan hadtaem, blong filim glad ia blong givim seves long ol narawan, mo blong filim hapines, mo glad long hat taem oli stap tekpat long wok ia blong fasin blong sevem man.

Brata Owen: Mi hop se ol pikinini bae oli andastanem gospel long wan wei we bae i tekem gospel ia aot long hed blong olgeta i go daon insaed long hat blong olgeta. Hemia i no blong stap jekem ol samting i go. Hem i wan longfala rod blong stap lanem mo stap kam olsem Sevya. Bae mi rili hop se ol pikinini blong yumi, mo olgeta we yumi stap givhan long olgeta, bae oli filim se oli gat tras inaf long olgeta long hamas oli andastanem gospel, blong oli save tijim gospel ia i go long ol narawan. Eksampol. Mi hop se bae yumi save askem wan kwestin long ol pikinini blong yumi, abaot gospel, mo bae yumi harem wan hevi ansa from se oli bin lanem hemia, mo i pat blong huia olgeta.

?Olsem wanem nao bae ol papa mo mama oli save sapos Ol Pikinini mo Ol Yut i gat sakses insaed long hom blong olgeta?

Brata Owen: Bae mi lukaotem ol frut blong Spirit we oli tokbaot insaed long Galesia 5, olsem moa pis long hom. Mi ting se bae ol pikinini blong olgeta bae oli moa kaen, mo gat moa lav. Bae ol pikinini blong olgeta bae oli wantem blong stap wetem famli. Bae oli wantem moa blong prea mo lukaotem ol ansa. Bae oli luk we oli kam antap, i no jes long saed blong spirit, be tu, long saed blong sosol laef blong olgeta, long saed blong bodi mo long saed blong waes blong olgeta.

Sista Jones: Bae oli save se program ia i wok taem ol rilesensip blong olgeta i kam strong moa, taem we, olsem ol memba blong famli oli gotru long sam ril progres, mo oli gogohed iven taem oli stap traehad; evri samting bae i hapen taem bae oli stap soem sapot long wanwan long olgeta, mo taem bae oli stap kea long wanwan long olgeta mo folem hamas oli stap strong blong lukaotem paoa blong Tabu Spirit mo folem hamas Tabu Spirit i stap insaed long hom blong olgeta. Maet bae ol memba blong famli oli luk klia, olsem wanem, wanem we oli stap mekem evri dei i joen wetem laef blong Kraes. Maet bae i gat moa dip tangkyu from fridom blong joes, mo fasin blong sakem sin; bae ol fasin oli kam gud moa, tras long olgetawan i kam antap, bae oli traehad moa blong go aot long ol narawan be i no blong sarem olgetawan; bae i gat wan moa bigfala tangkyu from Sevya, laef blong Hem, ol tijing blong Hem, eksampol blong Hem mo Atonmen mo Laef Bakegen long Ded blong Hem.

?Wanem kaonsel bae yu givim long ol papa mo mama we oli stap wari blong lego ol fasfala program blong Jos?

Sista Cordon: Yes i tru, yumi laekem ol fasfala program, from se wanwan long yumi i bin develop mo i bin gat wan janis blong luk ol narawan oli develop wetem ol program ia. Oli bin kamtru long insperesen, blong taem ia we oli kamaot long hem. ?Be yumi no glad blong ol revelesen ia we oli gogohed blong stap kam? Lod i nidim yumi blong gohed blong progres mo jenis, mo Hem i nidim blong ol program blong yumi oli mas jenis mo progres blong lukluk long ol nid blong ol memba raon long wol. Oltaem nomo yumi stap traehad blong kam antap, mo blong kam Jos ia mo ol pipol ia we Papa long Heven i save mo i nidim yumi blong kam olsem.

Sista Jones: Yumi bin gat plante blesing tru long ol program blong bifo, mo yumi save talem tangkyu from evri samting ia we yumi bin lanem mo gotru long hem. Hemia i wan gudfala niu taem; mo hem i wan janis blong lukaotem Lod blong Hem i lidim yumi blong yumi lan mo yumi groap long ol wei we oli niu mo oli kam tru long insperesen.

?Olsem wanem ol lida oli helpem ol pikinini mo ol yut blong oli groap blong developem olgetawan?

Brata Owen: Faswan evriwan. Mi ting se ol adalt lida oli nidim blong luk pikinini ia, o yang man o yang woman ia olsem we God i stap luk olgeta; long wei ia mi minim se blong luk huia hem i save kam, be i no jes huia hem naoia. Stat wetem en long maen. Lukluk i go longwe. Hemia bae i tekem taem. Luk huia ol pikinini mo ol yut oli save kam olsem. Developem wan rilesensip we i gud inaf blong mekem se, taem yu nid blong toktok long ol yut, bae oli gat inaf respek long yu blong lisin long yu.

Mo tu, kam blong save ol papa mo mama. Faenemaot long olgeta wanem yu save mekem blong help. Respektem rol blong olgeta olsem papa mo mama.

Sista Jones: Praemeri i no gat kworom o klas presidensi insaed long hem, olsem we i gat insaed long ol yang man mo ol yang woman. Ol lida mo tija blong Praemeri, mo tu ol givhan brata mo sista, oli givim help long ol pikinini we oli no gat gospel sapot insaed long hom blong olgeta. Be, hem i impoten blong yumi oltaem givim ona ia, long rilesensip bitwin ol pikinini, ol yut mo papa mo mama blong olgeta, i nomata wanem situesen blong hom. Ol Pikinini mo Ol Yut oli givim wan rod blong invaetem ful famli blong kam mo luk, mo blong kam mo help. Hem i save kam wan rod blong mekem ful famli i kam strong moa; hemia nomata oli ol memba blong Jos Ia blong Jisas Kraes blong Ol Lata-dei Sent o no.

Sista Cordon: Yumi gat plante pikinini mo yut we oli no gat papa mo mama blong olgeta long Jos long Sandei, be oli gat ol papa mo mama we oli gat lav. Bae mi leftemap tingting blong ol lida blong kam blong save papa mo mama blong olgeta, mo faenemaot wanem drim mo tingting oli gat from ol pikinini blong olgeta. Yumi save help. Taem yumi wok wan wetem ol papa mo mama, bae yumi mekem wanwan i kam strong moa, mo bae yumi mekem hom blong olgeta i kam strong moa; mo tu, leftemap tingting blong ol pikinini mo ol yut blong oli mekem hom blong wanwan long olgeta i kam strong moa.

?Bae yufala i talem wanem long ol papa mo mama we oli fraet tumas se bae oli no save helpem ol pikinini blong olgeta blong gotru long Ol Pikinini mo Ol Yut?

Sista Cordon: Bigfala samting, i we, yumi stap mekem bigfala pat blong hem finis. Ol famli oli stap lanem gospel tugeta finis. Yumi stap mekem seves mo ol aktiviti finis. Oltaem nomo yumi gat wan wok blong stap developem yumiwan; naoia, yumi jes stap lukluk long ol wei ia we Kraes i bin groap long hem.

Taem yumi stap sidaon wetem ol pikinini blong yumi, mi ting se bae yumi laekem hemia. Yumi jes save lisin long hat blong ol pikinini blong yumi long wei we i nomol nomo. Papa blong yumi long Heven i wantem pikinini blong yu blong i groap, i faenem glad, mo i gobak laef wetem Hem. Bae yufala i filim Tabu Spirit i lidim yufala, taem we, tugeta, yufala i traehad blong mekem gospel mo Sevya Jisas Kraes i kam pat blong evri saed blong laef blong yufala.

Sista Jones: Statem wetem wei we i wok blong famli blong yu. Gat tras se bae yu kasem help we i kam long heven. Lukaotem blong Spirit i lidim yu. Ol Pikinini mo Ol Yut bae oli wan gudfala tul blong yusum blong stap olsem papa mo mama. I gat fulap samting i stap long solda blong papa mo mama tedei taem oli stap lidim mo fidim ol famli blong olgeta. Samtaem, hem i isi blong filim se ol samting i hevi tumas. Ol Pikinini mo Ol Yut bae i helpem ol papa mo mama blong tekem wanem i nid nomo aot long wanem we i impoten. Blong stap helpem ol famli blong yumi blong lan blong folem Sevya tru long insperesen blong Tabu Spirit i impoten long yumi evriwan, mo bae i tekem lav mo ol blesing blong Lod i kam.

Brata Owen: Mi ting se bae yu rili save helpem ol pikinini mo ol yut. Yu no nid blong mekem ol bigfala samting. I kam long simpol samting ia nomo blong stap fetful, stap prea mo stap krietem sam tabu evri dei fasin we oli stret mo gud, insaed long famli blong yu. Stat wetem sam evri dei fasin we oli besik, simpol, stret mo gud, mo bae yu luk ol merikel oli hapen insaed long laef blong ol pikinini blong yu.