Go mo Mekem wetem Tras long God

I Kam long Presiden Henry B. Eyring

Seken Kaonsela long Fas Presidensi

I kamaot long wan toktok blong jeneral konfrens blong Oktoba 2010.

Yangfala Nifae insaed long Buk blong Momon, i stap tantanem hat blong yumi, blong wantem developem wan tras long Lod blong save obei long ol komanmen blong Hem. Nifae i bin fesem denja, mo kolosap i ded taem hem i bin talem ol toktok blong tras ia, we yumi save mo mas filim oltaem insaed long hat blong yumi: “Bae mi go mo mekem ol samting we Lod i bin talem, from mi save se Lod i no givim wan komanmen long ol pikinini blong ol man, sapos hem i no mekem rere wan rod blong olgeta, blong oli save mekem samting ia we hem i talem long olgeta” (1 Nifae 3:7).

Tras ia i kam taem yumi save God. Yumi, bitim eni nara pipol long wol ia, tru long ol bigfala taem blong Restoresen blong gospel, yumi bin filim bigfala tangkyu from wanem we God i bin talemaot abaot Hemwan blong yumi save trastem Hem.

Long mi, i stat long 1820, wetem wan yangfala boe insaed long wan bus blong ol tri, long wan fam long stet blong Niu Yok. Boe ia, Josef Smit Junia, i bin wokbaot i go long wan ples we i haed, mo i bin nildaon blong prea, wetem ful tras ia se God bae i ansa. Evri taem mi ridim stori ia, tras blong mi long God mo long ol wokman blong hem i gro bigwan moa:

“Mi bin luk wan laet, i saen antap i kamdaon, stret antap long hed blong mi, mo laet blong hem i saen bitim laet blong san, mo hem i saen i kamdaon gogo, i kasem mi.

“ … Taem we laet ia i kasem mo stap saenem mi, mi bin luk tufala Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi. Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan—Hem, Hem i Pikinini blong Mi we Mi Lavem Tumas. !Lisin gud long Hem! (Josef Smit—Histri 1:16–17).

Papa i soemaot long yumi se Hem i stap laef, se Jisas Kraes i Pikinini blong Hem we Hem I Lavem Tumas, mo we Hem i lavem yumi inaf blong sendem Pikinini ia blong sevem yumi. Mo from se mi gat wan testemoni se, Hem i bin singaotem boe ia olsem profet, mi trastem ol aposol mo profet blong Hem tedei, mo mi trastem olsem ia we oli singaotem olgeta blong wok blong God.

Yu soem tras blong yu long God taem yu lisin long tingting ia blong wantem lanem samting mo sakem sin, mo afta, yu go mo mekem eni samting we Hem i askem. Sapos yu trastem God inaf blong lisin long ol mesej blong Hem we oli stap leftemap tingting, oli stretem yu, mo oli givim daereksen long yu, hemia tru long ol wokman blong Hem, bambae yu faenem olgeta. Mo sapos yu go mo mekem wanem we Hem i wantem yu blong mekem, paoa blong yu blong trastem Hem bae i gro i kam bigwan, mo bae i no tekem taem blong yu filim se yu fulap we yu fulap wetem tangkyu blong faenem se Hem tu, Hem i kam blong trastem yu.