Openem Doa blong Paoa blong Buk blong Momon

I Kam long Symmony Ann Park

Hem we i raetem hemia i stap long Arisona, YSA.

Pikja

Book of Mormon

Taem mi bin stap long misin long Filipin, kompanion blong mi mo mi, i bin tijim wan lesen we i gat paoa abaot hamas i impoten blong stap stadi long Buk blong Momon evri dei. Long en blong lesen, kompanion blong mi i talem wan long ol testemoni we i gat bigfala paoa abaot skripja stadi; hemia i wan testemoni we mi neva harem bifo. Hem i bin testifae se blong stap ridim Buk blong Momon i ademap wan niu paoa long laef blong hem, we i no posibol blong stap eksplenem.

I klia nomo se eksperiens blong hem wetem Buk blong Momon i bin jenisim laef blong hem, mo mi tu, mi bin wantem hemia insaed long laef blong mi.

Long naet ia, mi bin disaed se bae mi ridim Buk blong Momon bakegen. Stat long Stat.

Mi bin spendem plante taem long ni blong mi, blong stap eksplenem long God se mi bin wantem blong gotru long jenis long laef, mo paoa we i kam long Tabu Spirit.

Ansa we mi bin kasem hem i: Rid. Jes rid.

Mekem se mi bin mekem hemia nomo. Mi draonem mi long riding wetem niu strong tingting. Mi luklukgud long wanwan ves, japta, mo pej. Taem mi stap rid i go, mi bin faenem sam ves we oli bin givim ansa long ol kwestin blong mi, i mekem wari blong mi i isi, mo i help blong leftemap ol hevi trabol blong olgeta we mi bin stap tijim.

Samples wan manis afta, mi luksave se, insaed long mi, wan samting i stap jenis. Paoa blong mi blong lavem ol narafala man i kam antap; mi bin gat moa hop long fiuja; mi bin save wok had moa, mo longtaem moa, evri dei; mi bin lukluk moa long wok; mo mi bin stat blong filim plante moa glad.

Wan dei, long ol stadi blong mi, mi kam krosem wan kwot blong Presiden Esra Taf Benson (1899–1994), foma presiden blong Jos: “I gat paoa insaed long Buk blong Momon, we bae i stat blong kam insaed long laef blong yufala stat long taem ia we yu rili series blong stadi long buk ia. … Taem yu stat blong hanggri, mo tosta from ol toktok ia, bae yu faenem laef i kam moa gud”¹.

Taem mi bin gohed blong stadi, mi bin stat blong rili andastanem wanem nao hem i bin minim. Mi bin stap faenem laef we i kam moa gud.

Taem mi lukluk i gobak, mi bin biliv strong se wan long ol risen we oli putum mi wetem kompanion ia, i blong mi save stap long naet ia blong save harem hem i serem testemoni blong hem. Mi bin filim olsem we, evri gudfala pat blong laef blong mi—lav, hop, tras, had wok, strong tingting, mo glad—oli kam strong moa.

I bin gat wan niu laet insaed long laef blong mi, mo mi bin save se i bin ril.