Batbayar wetem Buk we i gat Pikja
Ibin wan dei wetem bigfala win long Mongolia. Batbayar, we i gat naen yia, i stap wokbaot i go hom afta we hem i kamaot long bas long bas stop afta long skul. Hem i holem strong kot blong hem long win ia. Laki, hem i no stap longwe long haos blong ol bubu blong hem, ples we hem i stap long hem.
“!Halo!” Batbayar i talem taem hem i kam insaed.
“Welkam hom,” Bubuwoman i talem. “Mi mekem sam khuushuur blong yu kakae.”
“!Tangkyu!” Batbayar i pusum han blong wan long ol hot mitpae ia.
“!Yu wet! Yu no kakae wan kasem taem ol misinari oli kam,” Bubuman i talem. “Bae oli kam i no longtaem nao.”
Batbayar i laekem tumas taem we ol misinari blong jos blong Bubuwoman mo Bubuman oli kam blong visit. Oltaem, hem i stap lanem plante samting aot long olgeta. Be i gat wan problem nomo.
“?Bae oli askem mi blong rid aot long Buk blong Momon bakegen?” Batbayar i askem. “Riding i had long mi.”
“Hemia nao oli stap tekem wan nara buk i kam tedei,” Bubuwoman i talem.
“?Wanem buk?” Batbayar i askem.
“Bae yu luk,” Bubuman i talem.
I no longtaem afta, ol misinari oli kam. Tugeta, oli kakae gudfala mitpae blong Bubuwoman. Nao Batbayar i askem: “?Bubuwoman i talem se yu karem wan buk i kam blong mi?”
Sista Heitz i talem: “Mi ting se bae yu laekem buk ia. I gat fulap pikja insaed.”
Batbayar i lukluk long kova blong hem. Ol Stori long Buk blong Momon, i stap long hem. Wan pikja long kova i soem ol pipol we oli stap bildimap wan sip.
Batbayar i talem: “Mi tingbaot stori ia. Man ia i no save olsem wanem blong bildim wan sip. Mekem se hem i prea. Mo God i bin helpem hem.”
“I stret,” Sista Enkhtuya i talem. “?Bae yu traem ridim buk ia? Afta, yu save prea blong save sapos ol samting we hem i stap tijim oli tru.”
“Bae mi mekem.” Batbayar i promesem.
Long naet ia, hem i ridim buk ia wetem ol pikja. Hem i ridim stori ia abaot sip ia. Afta, hem i prea. Nao hem i slip, i stap tingting long man ia we i stap bildim sip mo olsem wanem God i bin helpem hem.
Stat long dei ia, evri naet Batbayar i ridim wan stori. Afta, hem i prea. Mo evri naet, hem i bin go slip i tingting long wanem hem i bin stap rid.
Taem ol sista misinari oli kam bakegen, oli bin tijim Batbayar moa abaot Jisas Kraes. Batbayar i bin lan abaot ol profet. Hem i bin lan abaot ol komanmen blong God. Hem i gogohed blong go long jos wetem Bubuwoman mo Bubuwoman. Mo hem i bin gohed blong stap rid mo stap prea.
Wan dei, Batbayar i gat wan impoten samting blong talem long tufala bubu blong hem. “Taem mi ridim ol stori insaed long buk ia wetem ol pikja, hat blong mi i harem gud,” hem i talem. “Taem mi prea, mi filimsave se oli tru. Mi ting se mi mas baptaes.”
Tedei, Batbayar i wan memba blong Jos. Hem i stap kam gud moa blong stap rid. !Mo hem i stap rid yet long Buk blong Momon evri naet!