Blong Save Hem I Gud be I No Inaf

I Kam long Steven C. Harper

Profesa blong Jos Histri mo Jos Doktrin, Brigham Yang Yunivesiti

Hemia sam stori blong ol fasfala memba blong Jos we oli bin harem ol testemoni blong ol witnes blong Buk blong Momon.

Ol pikja oli kam long Dan Bur

Ating sapos yu no luk ol buk ia we oli wokem long gol, o yu no luk wan enjel, nekis samting we i gud moa i blong harem testemoni blong wan witnes we i luk Buk blong Momon. Plante long ol fasfala memba blong Jos oli bin gat janis ia.

Wanem i kam afta, oli ol stori blong sam memba we oli bin toktok wetem ol witnes ia we oli bin luk Buk blong Momon. Be, bae yumi luk, olsem we Presiden Russell M. Nelson i tijim, se blong kasem wan testemoni abaot Buk blong Momon, !hem i “naes, be hem i no inaf!”¹

Rebecca Williams: “Man I Stap Bilivim Toktok blong Olgeta”

Rebecca Swain Williams i bin harem samfala long ol witnes we oli bin luk Buk blong Momon; oli bin stap long Ohaeo long stat blong yia 1830. Hem i talem testemoni blong hem long papa mo ol brata blong hem: “Mi bin harem semfala stori long samfala memba blong Smit famli, mo stret aot long ol trifala witnes. Mi bin harem olgeta oli talemaot long wan pablik miting se oli bin luk wan Tabu Enjel i aot long heven i kam daon, mo i tekem ol buk ia, mo i putum olgeta buk ia long fored blong ae blong olgeta.”

Taem ol memba blong famli blong olgeta oli bin sakemaot testemoni blong olgeta, Rebecca i no bin ronwe. Hem i bin gohed blong lavem olgeta, prea from olgeta, mo tekem gudfala kaonsel blong papa blong hem i impoten. Hem i bin gohed tu blong testifae long papa blong hem se ol witnes blong Buk blong Momon oli talem trutok: “Oli ol man we oli gat ol gud fasin mo man i stap bilivim toktok blong olgeta. … Oli bin luk wan enjel blong God mo oli bin toktok wetem enjel ia.”²

Kolosap long en blong ol yia 1830, wan bigfala taem we man i no stap agri insaed long Jos, Rebecca i bin gohed blong stap fetful, i jusum blong stap folem ol tijing blong Buk blong Momon.³

Wiliam MakLelin: “Gat Wok Ia … blong Talem se Hem I Luksave Trutok”

Wan moning, long yia 1831, wan yang skultija, nem blong hem Wiliam MakLelin, i bin harem se sam man oli stap wokbaot i go long Misuri blong prij abaot wan niu buk, we oli talem se hem i “wan Revelesen we i kam long God.” Hem i hariap blong harem olgeta. Hem i bin lisin long Deved Witma we i testifae se hem i bin “luk wan Tabu Enjel we i bin talemaot trutok long hem long saed blong histri ia.” Hem i bin wantem tumas blong save se ol testemoni blong olgeta i tru o nogat. Hem i bin folem olgeta blong samples 644 kilometa, i go long Indipendens, Misuri; long ples ia hem i bin mitim mo i bin intaviu ol nara witnes, wetem Martin Haris mo Haeram Smit.⁴

Wiliam i bin intaviu Haeram blong plante aoa. “Mi bin askem ol ditel long hao histri ia i bin kamaot,” Wiliam i raetem. Long nekis moning, afta we mi prea blong Lod i lidim mi long trutok, hem i bin luksave se “hem i gat wok ia, olsem wan ones man, blong talem se hem i luksave trutok mo Buk blong Momon i tru.”⁵

Long ol yia afta, fet blong Wiliam i bin gotru long tes mo i bin kam strong moa tru long ol joes blong hem, mo tru long ol agens we ol Lata-dei Sent oli bin fesem. Taem we Ol Sent we oli bin stap long Jakson Kaonti, Misuri, man i atakem olgeta, fren blong Wiliam, Haeram Pej, wan long Olgeta Eit Witnes, oli bin kilim hem wetem wan klab mo oli bin wipim hem; ol man we oli mekem hemia oli bin talem long hem se bae oli lego hem i fri sapos hem i talem se Buk blong Momon i no tru. “?Olsem wanem bae mi tanem baksaed long wanem we mi save se hem i tru?” Haeram i talem. Mekem se oli kilim hem bakegen.

Wiliam i kam strong moa tru long testemoni blong Haeram—mo i tru, hem i bin fraet bigwan se bae oli kilim hem. Taem we Wiliam i harem se samfala man long eria oli bin givim bigfala mane blong oli kasem hem mo Oliva Kaodri, oli aot long taon blong oli haed long ol bus wetem Deved Witma. Longwe, Wiliam i bin intaviu tu long Olgeta Tri Witnes. Hem i talem: “Mi neva bin luk wan open visen long laef blong mi, be yufala, yufala i talem se yufala i luk, mo from hemia, yufala i save se i tru. Naoia, yufala i save se laef blong yufala i stap long denja long evri aoa, sapos ol rabis man ia oli kasem yumi. Sapos yufala i fraet long God, yufala i traem talem long mi se ?Buk blong Momon ia i tru o no?

Oliva i talem: “Brata Wiliam. God i bin sendem tabu enjel blong hem blong talemaot long mifala se translesen blong buk ia i tru, mo from hemia, mifala i save se i tru. Mo nomata se ol rabis man ia bae oli kilimded mifala, yet, mifala i mas talemaot se hem i tru.”

Deved i ademap: “Oliva i bin talem tabu trutok long yu, from se bae oli no save giaman long mifala. !Mi talem tru long yu se buk ia i tru!”⁶

Deved, Martin, Haeram, Oliva, mo Wiliam, wanwan long olgeta ia oli bin kam blong save se Josef Smit i bin transletem Buk blong Momon tru long paoa blong God. Oli bin save se gospel we oli bin raetem long ol buk we oli wokem long gol ia, i tru. Be afta long hemia, oli lego ol kros blong olgeta wetem Josef i gro bigwan kasem taem we oli stop blong stap laef folem ol tijing blong Buk blong Momon.

From se hem i bin witnesem joes blong olgeta, Profet Josef i bin testifae se Buk blong Momon i tru, be tu se—“i moa stret bitim eni narafala buk long wol, mo i ki ston blong relijin blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk.”⁷

Sally Parker: “Strong long Fet”

Sally Parker i bin wan neba blong Lusi Mak Smit long Ketlan, Ohaeo. Sally i raetem: “[Lusi] i talem ful stori long mi. Taem hem i bin askem Lusi se hem i bin luk ol buk ia, “[Lusi] i talem se no, from se i no blong hem i luk olgeta, be hem i bin filim mo holem olgeta, mo mi bilivim evri samting we hem i bin talem, from se mi bin stap wetem hem eit manis, mo hem i wan long ol bes woman.”

Long 1838, Sally i bin harem Haeram Smit i serem witnes blong hem tu: “Haeram i talem se hem i bin luk ol buk ia long ae blong hem, mo i bin holem olgeta wetem ol han blong hem.”⁸

Long kolosap en blong ol yia 1830, taem plante oli bin stap aot long Jos, Sally Parker i toktok from lus blong felosip wetem olgeta mo i mekem bakegen strong tingting blong stap folem ol tijing blong Buk blong Momon. Sally i raetem: “Mi minim se blong holemtaet fet ia we i olsem wan smol sid blong masted, o sid blong nambangga.” “Mi filim paoa blong hem insaed long hat blong mi naoia. Mi mi strong long fet ia naoia semmak olsem mi bin strong long taem we mifala i bin baptaes mo maen blong mi i semmak i stap. Mi minim blong holemtaet gospel ia kasem we bae mi ded.”⁹

Rhoda Greene: “Hem I Bin Gat Spirit blong God”

Lusi Mak Smit i bin toktok long jeneral konfrens long 1845, afta we evriwan long ol witnes ia blong Buk blong Momon insaed long famli blong hem oli bin ded from sik, o oli bin kilimded olgeta. Hem i tokbaot wan stori blong boe blong Samuel, long saed blong fas misin blong hem.

Samuel, wan long Olgeta Eit Witnes, i bin visitim hom blong Rhoda Greene, we hasban blong hem i bin stap long wan misin blong wan nara jos. Samuel i bin askem Rhoda sapos hem i wantem wan buk. Hem i eksplenem: “Hem i buk ia, Buk blong Momon, we Brata Josef i bin transletem aot long ol buk we oli bin stap insaed long graon.”

Rhoda i bin akseptem wan kopi blong buk ia blong ridim mo blong soem long hasban blong hem. Taem Samuel i bin kambak afta, Rhoda i bin talem long hem se hasban blong hem i no intres, mo bae hem i no save pem buk ia. Samuel i harem nogud smol mo i tekem buk, mo i rere blong aot. Rhoda i bin talem afta long Lusi se, Samuel i bin stop smol mo i lukluk hem. “Hem i neva bin luk wan man i luk olsem,” Lusi i talem long konfrens toktok blong hem. “Hem i bin save se hem i bin gat Spirit blong God.”

“Spirit i talem long mi blong no karem buk ia,” Samuel i talem long Rhoda, we i bin nildaon mo i bin askem Samuel blong prea wetem hem. Rohda i kipim buk, i ridim, mo i kasem wan testemoni abaot buk ia. Long en, hasban blong hem tu i kasem wan. Tufala i bin jusum blong folem ol tijing blong buk ia truaot long laef blong tufala.

Lusi i testifae: “Mo olsem ia nao wok i stat, mo afta, i go raon olsem sid blong masted.”¹⁰

Rhoda Greene i wan bubuwoman blong mi. Tingting blong mi i kam antap from testemoni blong hem abaot Buk blong Momon, mo from ol witnes we oli bin raetemdaon testemoni blong olgeta, mo tu, testemoni blong olgeta we oli bin harem olgeta. Tingting blong mi i kam strong moa from ol joes blong olgeta blong folem wanem we Buk blong Momon i stap tijim olgeta.

Wanwan long yumi i save kam ol witnes abaot Buk blong Momon, long taem blong yumi tedei, taem we Tabu Spirit i konfemem long yumi, se buk ia i tru. I no longtaem afta we mi aot blong go long misin blong mi, mi bin finisim ridim Buk blong Momon, afta, mi bin nildaon mo mi talem wan simpol prea, wetem tru tingting mo wan tru hat, mo wetem fet long Jisas Kraes (luk long Moronae 10:3–4). Mi bin filim wan strong tingting mo filing we i talem: “Yu save finis se hem i tru.” Hemia i kam wetem wan pis ia we mi neva wantem blong stopem. Mi bin save stat long tetaem ia se Buk blong Momon i tru.

Be, hemia i no inaf. Presiden Russel M. Nelson i tijim: “Taem mi stap harem eniwan, iven miwan, i talem: ‘Mi save se Buk blong Momon i tru,’ mi wantem singaot se: ‘!Hemia i gud, be hem i no inaf!’ Yumi nid blong filim, dip ‘insaed long’ hat blong yumi, se Buk blong Momon i toktok blong God, mo i no gat samting i save talem se i no tru. Yumi mas filim hemia dip insaed we bae yumi neva wantem blong laef wan dei, we yumi no gat buk ia wetem yumi.”¹¹ Ol tijing blong Presiden Nelson oli tru. Hadwok blong mi, we i gogohed nomo, blong stap laef folem ol tijing blong Buk blong Momon, i bin tekem mi i go kolosap moa long God bitim eni nara samting.

Ol Not

1. Russell M. Nelson, “Buk blong Momon: ?Bae I Olsem Wanem Sapos Yu No Gat? Https://www.churchofjesuschrist.org/general-conference/2017/10?lang=bis, Okt 2017).

2. Rebecca Swain Williams to Isaac Swain, Youngstown, New York, June 12, 1834, oli jenisim speling. Long ol toktok we oli raetem mo ol foto blong leta insaed long Janiece Johnson, “Give Up All and Follow Your Lord,” BYU Studies, vol. 41, no. 1 (2002), 97–102.

3. Luk tu long Janiece Lyn Johnson, “Rebecca Swain Williams: Steadfast and Immovable,” Ensign, Apr. 2011, 38–41.

4. Luk long The Journals of William E. McLellin: 1831–1836, ed. Jan Shipps and John W. Welch, (1994), 29–33.

5. The Journals of William E. McLellin, 33, oli yusum standet fasin blong raet.

6. Insaed long William E. McLellin’s Lost Manuscript, ed. Mitchell K. Schaefer (2012), 165–67.

7. Josef Smit, long Fas toktok long Buk blong Momon. Blong lukluk gud long tijing ia, luk long Scott C. Esplin, “Getting ‘Nearer to God’: A History of Joseph Smith’s Statement,” in Living the Book of Mormon: Abiding by Its Precepts, ed. Gaye Strathearn and Charles Swift (2007), 40–54.

8. Insaed long Janiece L. Johnson, “‘The Scriptures Is a Fulfilling’: Sally Parker’s Weave,” BYU Studies, vol. 44, no. 2 (2005), 116, 115.

9. Insaed long Johnson, “‘The Scriptures Is a Fulfilling,’” 117.

10. Lucy Mack Smith, “This Gospel of Glad Tidings to All People,” in Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (2017), 24.

11. Russell M. Nelson, “Buk blong Momon: ?Bae Laef blong Yu I Olsem Wanem Sapos Yu No Gat?61.

Ol Profesi blong Ol Witnes

2 Nifae 27:12 “Taswe, long dei ia taem we buk ia bae oli givim long man ia we mi bin tokbaot, buk ia bae i stap haed long ol ae blong wol, mekem se i no gat ae blong wan man we i luk buk ia, be ol trifala witnes ia nomo bae oli luk buk ia, tru long paoa blong God, wetem man ia we bae oli givim buk ia long hem; mo olgeta bae oli talem testemoni blong olgeta long saed blong buk ia wetem ol samting insaed long hem, se oli tru.”

Ita 5:2–3 “Mo luk, bae yu save gat janis blong soem ol buk ia long olgeta we bae oli help blong karem wok ia i kam;

“Mo bae oli soemaot olgeta long trifala tru long paoa blong God; taswe, bae oli save stret, se ol samting ia oli tru.”

Famli blong Profet Josef Smit olsem Ol Witnes

Josef Smit Senia i bin gotru long kalabus mo fo dei we hem i no kakae; be hem i no wantem tanem baksaed long Buk blong Momon.

Lusi Mak Smit i bin harem ol testemoni blong wanwan blong Olgeta Tri Witnes—Martin Haris, Oliva Kaodri, mo Deved Witma—mo tu, hemia blong boe blong hem, Josef. Stret afta we wan enjel i bin soem ol buk we oli wokem long gol, mo ol nara samting i go long Olgeta Tri Witnes long yia 1829, Josef i bin talem long mama blong hem: “Lod i bin mekem se bae oli soem ol buk ia long 3 moa wetem mi, we mi bin luk wan enjel mo bae mi mas testifae se wanem mi talem i tru” “Lucy Mack Smith, History, 1844–1845,” pej [11], buk 8, josephsmithpapers.org).

Samuel Smit i bin testifae long Brigham Yang: “Mi save se buk ia i wan revelesen we i kam long God, we oli bin transletem tru long presen mo paoa blong God” (insaed long “History of Brigham Young,” Millennial Star, vol. 25, no. 23 [June 6, 1863], 361).

Haeram Smit, we i bin stap long Libeti Kalabus wetem Josef, i bin talem: “Oli mekem nogud long mi, mo oli sakem mi insaed long wan hol, mo mi mas stap ia from fet blong mi, mo from ‘testemoni ia abaot Jisas Kraes.’ Be, mi talem tangkyu long God se mi bin filim wan strong tingting blong mi mas ded, be i no blong sakemaot wanem we ae blong mi i bin luk, o wanem we han blong mi i bin holem [ol buk we oli transletem Buk blong Momon aot long hem].’ mo buk ia mi bin talem testemoni blong mi abaot hem taem oli bin askem mi blong mekem” (“To the Saints scattered abroad,” Times and Seasons, vol. 1, no. 2 [Dec. 1839], 23; luk tu longM. Russell Ballard, “Brothers Bound by Love and Faith,” Ensign, Sept. 1994, 65).