Stap Olsem Nifae
Taem we Nifae i bin talem long papa blong hem: “Bae mi go mo mekem ol samting we Lod i bin talem” (1 Nifae 3:7), hem i givim yumi wan eksampol we i givim insperesen abaot fet mo strong tingting blong stap obei. Komitmen blong Nifae blong go mo mekem, i tekem rus insaed long tufala impoten kwaliti we yumi evriwan i save developem: testemoni blong hemwan abaot Lod mo ol profet blong Hem, mo strong spirit blong hem blong save gohed.
Stap Developem Wan Testemoni
Nifae i bin stap obei from se hem i bin askem mo kasem testemoni blong hemwan abaot ol komanmen we Lod i bin givim long papa blong hem (luk long 1 Nifae 2:16–20). Hem i bin save se wok ia, blong kasem ol buk we oli wokem long bras, bae i had. Be, hem i no bin olsem ol brata blong hem; hem i bin save se Lod bae i stap wetem hem, mo bae i mekem rere wan rod blong oli mekem wok ia i kamtru.
Fet ia, long God mo profet blong Hem, i bin blesem mo sapotem Nifae truaot long laef blong hem, mo i bin helpem hem blong mekem ol merikel i wok. Semmak olsem Nifae, yumi save mekem ol bigfala samting insaed long laef blong yumi taem yumi stap traehad blong stap obei long kaonsel we yumi kasem long ol profet we oli stap laef, long ol kwaet toktok blong Tabu Spirit, mo tru long ol skripja. Eksampol. Profet blong Lod tedei, Presiden Russell M. Nelson i bin askem yumi blong help blong karem Isrel i kam tugeta, mo rere blong kambak blong Sevya.1
Taem yumi stap stadi long toktok blong God mo obei long hem, fet blong yumi bae i gro mo bae yumi filim, insaed long hat blong yumi, wan strong tingting blong gohed blong stap obei, iven taem yumi save se ol samting oli had.
Stap Developem Fasin blong Stanap Kwiktaem Afta Wan Hadtaem
Eksampol blong Nifae i stap tijim tu abaot ol fasin olsem hemia blong Kraes, abaot fasin blong gohed afta wan hadtaem—blong wok tru long ol jalenj, be i no blong lukaotem wan isi wei blong aot. I gat ol taem long evri laef blong yumi, taem oli askem yumi blong mekem sam samting we oli had mo i bigwan. Long ol situesen olsem, sapos yumi dipen nomo long fet blong yumi long Kraes mo jusum “raet ia we i moa had, be i no rong ia we i moa isi,”2 bambae yumi gat blesing.
Taem yu faenem se yu fesem wan desisen o wok we i had, blong gat fasin ia blong “go mo mekem” bae i helpem yu blong gogohed. Taem yu fetful blong mekem folem rod we oli soem long yu, i stap soem long Lod se Hem i save dipen long yu, mo yu save mekem fet blong yu long Jisas Kraes i kam antap moa.
Taem yu fetful blong stap wok blong developem testemoni blong yu, paoa blong yu blong gogohed long saed blong spirit, mo gat wan fasin blong “go mo mekem”, bae Lod i blesem yu, i mekem yu kam strong moa, i sapotem yu long yia ia mo truaot long laef blong yu.