Pusum Tingting blong Jeneresen we I Stap Kam Antap
Hem we i raet i stap long Yuta, YSA.
I gat fofala wei blong helpem ol pikinini blong yu blong oli putum mo kasem ol gol we oli gat mining, blong oli save groap olsem we Sevya i bin mekem.
Pikja i kam long David Green
Olsem ol papa mo mama, mo olsem ol lida, yumi wantem helpem ol pikinini mo ol yut blong oli kam ol disaepol blong Jisas Kraes long ful laef blong olgeta; bae oli gat samting insaed long hat blong olgeta we bae i pusum olgeta blong givim seves long Lod mo mekem ol misin blong olgetawan i hapen.
Ol Pikinini mo Ol Yut i wan risos we i simpol be i gat paoa blong helpem ol pikinini mo ol yut blong groap long saed blong spirit, long saed blong sosol laef, long saed blong bodi, mo long saed blong waes blong olgeta, semmak olsem we Sevya i bin mekem (luk long Luk 2:52). Hemia i save hapen taem oli stap lanem mo laef folem gospel blong Jisas Kraes, taem oli tekpat long ol seves mo aktiviti we oli gat mining mo oli gud tumas, mo taem oli setem mo kasem ol gol blong olgetawan. Olsem papa mo mama long stori we i stap daon ia, maet bae yumi filim se i gat fulap hevi samting finis long yumi, mo i no nid blong ademap gol blong wan narawan i kam long lis blong yumi. O, yumi save wari se ol pikinini blong yumi bae oli no save groap sapos yumi no pusum olgeta smol.
Storian blong Setem Gol. Eksampol 1:
Alana, i gat 15 yia, i sidaon wetem mama blong hem, Rachel,tufala i gotru long wan lis we tufala i gat blong samfala gol se Alana i save wok long olgeta. Papa blong Alana, Jeff, i wokbaot i kam pas. “Papa. ?Yu ting se bae mi wok long wijwan?” Alana i askem.
Jeff i lukluk long hanwaj blong hem, i tanem fes smol, mo i sakem ae long lis. “Ah, mi luk hemia nao i isiwan. “Bae yu “Lanem wan hym baehat” Yu save tikim hemia hariap nomo. ?Wijwan bakegen yu luk se i isi?”
Rejel i toktok, i tingbaot se Alana i no bin wantem traem blong resis long skul. “Ating yu nidim blong mekem wan samting we i had smol! ?Bae yu mekem wan samting wetem eksasaes?” hem i talem.
“Ah no,” Alana i talem, mo i karem fon blong hem i go. “Mi ting se mi oraet.”
?Olsem Wanem Ol Papa mo Mama, mo Ol Lida Oli Save Help?
Ol papa mo mama oli save mekem plante samting blong helpem ol pikinini mo ol yut blong oli gat samting we i pusum olgeta blong stap praktisim ol gudfala valiu, mekem ol gudfala joes, mo stap glad long progres blong olgeta mo ol samting we oli mekem i kamtru.
Tingting long wan taem we yu bin gat tingting strong blong wok from wan gol. ?Wanem i bin pusum yu? Janis i stap se, yu bin luk wan janis o wan skil we yu rili wantem o yu bin luk wan problem we i nid blong stretem. Eksampol mo sapot blong ol narawan oli bin givim insperesen long yu blong traem.
Semmak, ol pikinini mo ol yut ia, bae samting i pusum hat mo tingting blong olgeta taem bae oli (1) prea blong disaed wanem we oli wantem (i no jes wanem ol narawan oli wantem blong olgeta), (2) bae oli krietem wan plan blong kasem wanem oli wantem, (3) bae i no gat tumas praes o panismen we bae i pusum olgeta blong mekem samting, mo (4) bae oli filim se ol papa mo mama blong olgeta oli stap long saed blong olgeta.
1. Helpem olgeta blong oli faenemaot wanem nao oli wantem tumas
Evriwan i wantem wan samting: blong save pat blong wan tim, blong slip moa, blong filim se oli no stap olgetawan, blong stap kolosap moa long God. Lod mo ol mesenja blong Hem, fulap taem oli askem ol pipol: ?Yufala i wantem wanem?” (luk long Mak 11:24; 1 Nifae 11:1–2; Alma 18:15; 3 Nifae 27:1–2; Ita 2:23–25). Be, blong save wanem yumi wantem tumas, i no jes wanem yumi wantem naoia, i tekem praktis mo fasin blong tingtingbak long yuwan.
Taem yu stap tingting long wan pikinini o yut we yu wantem helpem, askem yuwan.
-
?Olsem wanem nao mi presentem ol niu eksperiens long olgeta, ol niu valiu, mo aedia long wan ples we i gat gudfala rilesensip mo gud taem?
-
?Bae mi letem olgeta oli fesem ol risal blong ol pua joes blong oli save mekem ol joes we oli moa gud?
-
?Wetaem nao mi save askem olgeta abaot wanem we oli biliv mo tekem se i impoten? (Luk lis we i kam wetem, “Ol Help Kwestin blong Faenem Samting.”)
-
?Olsem wanem mi save poenemaot wanem oli strong long hem? (Traem: “Mi luk se yu yu rili gud long . ? Olsem wanem bae yu yusum hemia blong wok blong Lod?”)
2. Helpem ol yut blong krietem wan plan
Taem oli disaed gud long wan gol, plante taem ol yut ia oli gud blong mekem wan plan. Maet ol yang pikinini oli nidim sam moa aedia. Givim tingting nomo taem tingting blong olgeta i fas. !Yu mas glad, be yu no harem nogud sapos oli no laekem ol aedia blong yu, be oli laekem blong olgeta!
Blong helpem ol narawan blong krietem wan plan, yu save askem:
-
?Wanem nao gol blong yu? (Ol gol olsem “Gat naes fasin” oli had blong luk stret samting blong mekem sapos yu no yusum ol spesifik aksen olsem “Talem wan gud toktok long wan evri dei,” o “Talem sore taem mi kros.”)
-
?From wanem gol ia i impoten long yu? (?Olsem wanem bae i helpem olgeta blong laef folem ol valiu blong olgeta, o kam moa olsem Sevya?)
-
?Hemia i wan gud taem, o no, blong wok long gol ia? (?From wanem, yes; mo from wanem, no?)
-
?Wanem step nao, we bae i smol mo i isi, blong yu stat wetem? (Mekem olgeta oli tingbaot se, aksen i save pusum tingting blong man. Helpem olgeta blong stat, o stat bakegen, wetem wan samting we i smol mo simpol.)
-
?Olsem wanem nao yu save setemap ol samting blong sapotem plan blong yu? (Tingting blong mekem ol samting blong rimaenem yu, hangem sam toktok blong leftemap tingting blong yu, mekem wan jat o taemtebol blong folemap progres blong yu, karemaot ol temtesen, karem ol stret tul, o askem help.)
-
?Wanem ston o ol samting we oli save kam blokem rod blong yu? ?Olsem wanem bae yu handelem o fesem olgeta? (Helpem olgeta blong tingbaot plan blong olgeta, faenemaot stret se wanem nao i go rong, praktisim ol pat we oli moa had, traem wan niu teknik, o stretem gol.)
Blong helpem ol narawan taem samting i stap go slo, yu save serem ol eksperiens aot long laef blong yu, o aot long laef blong famli blong yu, abaot pipol we oli stap fesem ol tes mo oli strong blong stanap bakegen mo gogohed. Mo tu, traem blong askem:
-
?Wanem nao yu bin traem? ?Wanem nao sam nara samting we yu save traem?
-
?Huia i save help? ?Olsem wanem mi save help?
-
?Wanem aedia nao i kam long maen blong yu taem yu stap prea abaot hemia?
3. Lukaot taem yu yusum ol praes mo ol panismen
Ol smol praes i save helpem wan blong traem wan samting we i niu, mekem wan had samting i kam wan glad blong mekem, o i blong selebretem sakses. Be taem oli givim praes tumas, ol praes ia oli save mekem se wan i no tingting hevi long wanem hem i stap wok from. Ol pipol we oli stap mekem wan wok finis, bae oli nomo mekem hemia tumas sapos oli stap kasem praes from; bae oli no mekem moa; so, i minim se i no naf blong mekem samting jes blong kasem wan praes. Mo long semtaem we ol pikinini oli nid blong gotru long risal blong ol joes we oli no gudgud tumas, oli stap lan blong gat fraet mo stap longwe long ol pipol we oli stap panisim olgeta, be oli no stap lanem blong tekem ol gud valiu insaed long hat blong olgeta.
I tru, pipol i wantem se bae oli mas pem olgeta from wok, be tu, oli save givim smol praes moa, o gud toktok blong givim wan fidbak we i gud. Be taem yumi kam blong tokbaot gospel mo fasin blong kasem wan gol blong yuwan, ol praes we oli kamaot insaed long yu, oli ol praes ia we bae oli givhan long tingting blong yu blong wan longfala taem moa. Ol praes we yumi kasem insaed long yumi, o oli givhan long tingting blong yumi oli:
-
Stap filim Spirit.
-
Filim se yumi joen long papa mo mama, wetem ol lida mo ol fren.
-
Stap laef folem ol gud valiu.
-
Stap lanem samting, stap traem ol niu samting, mo stap stretem ol problem.
-
Gat gud hapi taem.
-
Mekem wan samting i defren blong mekem gud.
Helpem ol yang pipol blong luksave mo tingting hevi long ol praes ia we i givhan long tingting, o yumi filim insaed long hat. Mo wanwan taem, !givim wan smol praes we i go wetem wan wok we oli mekem i gud tumas!
4. Helpem ol yut blong filim lav blong yu
Ol rilesensip we i gat lav insaed, oli wan long ol wei ia we oli moa impoten blong lidim tingting blong man blong wok from ol valiu, ol gol, mo pusum tingting blong mekem samting ?Olsem wanem nao ol pipol oli bin talemaot long yu se oli lavem yu tru, mo oli tekem yu impoten long olgeta? ?Olsem wanem nao yu disaed se huia nao i wan sef man o woman blong talem samting long hem long wan ones fasin; olsem blong talem ol mistek o ol samting we yu stap gat hadtaem wetem? Sapos yu filim se oli no rili lavem yu long hom, ?tingting long wanem samting nao yu nidim, be yu no kasem insaed long hom?
Ol ansa blong yu oli save helpem yu blong save olsem wanem blong toktok long ol yang pipol se yu tekem olgeta oli impoten, mo oli save toktok open wetem yu.
Wetem praktis mo help blong heven, yumi save help blong pusum mo lidim tingting blong jeneresen ia we i stap kam antap.
Storian blong Setemap Gol: Eksampol 2:
Alana, 15 yia, i sidaon wetem mama blong hem, Rachel mo tufala i gotru long wan lis blong ol gol we Alana i save wok long olgeta; semtaem, papa blong Alana, i wokbaot i kam pas. “Papa. ?Yu ting se bae mi wok long wijwan?” Alana i askem.
Jeff i lukluk long hanwaj blong hem, i tanem fes smol, mo i sakem ae long lis. “Ah, mi luk hemia nao i isiwan. “Bae yu “Lanem wan hym baehat” Yu save wok long hemia kwik, mo tikim se i finis. ?Wijwan bakegen yu luk se i isi?”
Jeff i stop smol. Wan samting i no stret gud, mekem se hem i tekem taem blong tingting se wanem i rong.
Mi mi let, hem i tingting. Mi wantem hariap nomo wetem hemia. Mi mi no gud tumas blong wokem ol samting ia blong stap olsem wan papa. Ah. Hem i lukluk gel blong hem, mo afta, i luksave se hem i stap filim sam nara filing tu. Hop. Glad. Hemia i no blong jes tikim samting long lis. Hem i abaot gel blong hem i groap. Mo hemia i wan janis blong joen wetem hem long saed blong evri samting. Wan smael i flasem fes blong hem.
“Okei. Yumi stop smol mo tingting se, ?hemia i wanem,” hem i talem. “?Bae olsem wanem sapos wanwan long yumi i raetemdaon wanem hem i filim Spirit i pusum hem blong wok long hem?”
“Ah. Okei,” Alana i talem. Rejel i faenem ol pensel mo pepa, mo oli spendem samfala minit blong tingting mo raet.
“Okei,” Rachel i talem. “?Wanem nao?”
Alana i tingbaot: “Mi ting se yumi sapos blong prea from hemia, mo afta, jusum wan gol mo mekem wan plan. Be Papa, ?yu yu rili ting se Papa long Heven i kea abaot wijwan gol nao bae mi jusum?”
Jeff i tingting i go. “Yu gat plante gudfala aedia, so maet Papa long Heven i jes wantem yu blong jusum wan blong yu stat wetem. Be mi mi sua long wan samting. Papa long Heven i kea abaot yu.”
“Mi save se yu wantem yusum ol presen blong yufala blong mekem samting i defren,” Rejel i ademap, “mekem se, sapos wan long ol samting ia i moa impoten, nao mi sua se Papa long Heven bae i wantem yu blong yu filim hemia.”
Alana i smael, mo afta, i tingbaot: “Presiden Nelson i bin askem ol yut blong skelem gud evri pat blong laef blong yumi. ?Mi save go karem wanem we mi bin raetem?”
“!Yes! Jef i talem, mo i smael. Hem i lukluk long hanwaj blong hem bakegen. “O lala, mi mas ron i go nao. Faenem wanem yufala i bin raetem mo bae yumi tokbaot tedei long naet, ?stret? Mi gat sam kwestin we bae i save helpem yufala.”
!Tru ia!” Alana i talem mo i smael. “Mo, Papa, Mama, Tangkyu tumas.”