Ol Yang Adalt
Fasin blong Sakem Sin I Wan Presen
Foto i kam long Getty Images
Samtaem, mi ting se i isi blong ol yang adalt oli biliv se fasin blong sakem sin i wan samting we i mekem man i fraet. Hem i tru we i save mekem man i fraet blong admitim wanem yumi bin mekem, mo sapos yumi fraet; hem i minim blong lusum lav long ol pipol we yumi kea long olgeta, o lav blong Papa long Heven. Taem yumi lukluk olsem long fasin blong sakem sin, nao bae yumi gat temtesen ia blong jes konfesem “wanem i inaf” blong gotru long wanem we i stap olsem wan tes, i go blong muv i go long nekis level. Be, mi bin lan inaf tru long ol eksperiens blong mi se, tru fasin blong sakem sin i no luk olsem. Fasin blong sakem sin, oltaem i no mekem tingting blong man i stap gud, be, sapos yumi andastanem hamas Lod i lavem yumi mo i wantem helpem yumi, fraet ia bae i lus nomo taem yumi stap praktisim fet blong yumi long paoa blong Hem blong mekem yumi kam klin. Mi bin lanem se taem mi stap praktisim fet blong mi long Kraes tru long fasin blong sakem sin, ol mistek blong mi we oli pas, oli nomo talemaot wanem bae i laef blong mi naoia, o long fiuja (ridim moa long atikol blong mi long pej 44).
Long ol dijitol atikol nomo, Evita i poenemaot se, tru fasin blong sakem sin i tekem i kam tangkyu long hat blong yumi from Sevya mo Atonmen blong Hem mo i givim yumi paoa blong stanap agensem ol temtesen long fiuja. Leah i ademap se yumi no iven nid blong wet from sakramen long Sandei—blong tanem yumi long Lod tru long fasin blong sakem sin, evri dei, i givim yumi paoa blong katemaot ol smol smol nogud fasin we oli tekemaot yumi long Hem. Mo sapos yumi mekem ol series mistek, Jori i serem se, rod ia blong sakem sin i save tijim yumi abaot lav we Sevya i gat long wanwan long yumi.
Fasin blong sakem sin, hem i wan presen we mi mi talem tangkyu se mi gat long laef blong mi. God i save se yumi ol man kaen, mo yumi mekem ol krangke joes samtaem. I nomata se yumi no stret evriwan, yet, i gat hop i stap blong yumi. Sapos yumi putum tras blong yumi long Sevya, bambae Hem i wokbaot wetem yumi long rod ia we i gobak long Papa blong yumi we i stap long Heven—nomata se i tekem longtaem o no.
Wetem fulap lav,
Richard Monson