Moa Gud Smol Evri Dei
I Kam long Sista Joy D. Jones
Praemeri Jeneral Presiden
Taem mi smol, mi stap plei vaeolin. Mi wantem se i mas saon naes. Mi wantem plei blong papa mo mama i harem mo talem: “!O Joy! Hemia i naes tumas!” Be i no saon naes. !I mekem sora i fas!
Samtaem, taem mi no praktis, tija bae i talem: “Joy, ?yu bin praktis long wik ia?” Hem i mekem mi wantem praktis blong mi save plei gud moa long nekis wik blong hem.
Taem mi lukluk i gobak, blong stap plei vaeolin i wan gud eksperiens from se i bin had. I nomata se mi no laekem blong stap praktis, mi bin lanem plante aot long fasin blong setem wan gol mo praktis from smol smol evri dei.
Hemia i wanem mi hop se bae yu mekem. Traem blong mekem gud smol evri dei. Papa long Heven i no wet blong luk se bae yu save mekem evri samting long wan taem. Laef, hem i blong stap lanem samting, mo stap groap smol smol i go. Hem i wantem yu blong stap gohed blong traem. !Mo Hem i wantem yu blong stap glad blong groap!
Samtaem, bae yumi had long yumiwan. Yumi stap tingting: “Mi mestem. Mi no save mekem,” mo afta, yumi givap. Be Sevya i stap talem: “Yu gohed. !Mi mi stap ia blong helpem yu!” From Jisas Kraes, yumi no nid blong mekem samting yumiwan. Yumi save girap, mo traem bakegen wetem help blong Hem. Hemia nao laef.
Sapos i gat wan samting we mi wantem tumas blong yu yu mas save insaed long hat blong yu, hem i we, Papa long Heven i stap lavem yu. Maet yu stap fesem sam had samting, be oli bin mekem yu yu rere blong kam long wol long taem naoia. Jes gohed blong traem mo gohed blong stap serem laet blong yu. Papa long Heven bae i blesem mo bae i lidim yu taem yu stap folem kavenan rod ia. ●