Fasin we I Kaen I Impoten
Talem Sore
Wan dei, long skul, sam long ol fren blong mi oli stap jikim wan nara studen mo oli stap singaot spolem hem wetem sam nem. Mi luk se i fani, mekem se mi joenem. Blong sam wik, mi joenem ol fren blong mi mo stap jikim hem.
Sam wik afta, boe ia i talem long mi filing blong hem taem we mifala stap jikim hem. Hem i harem nogud long ol toktok blong mifala, iven we hem i stap priten se hem i no wantem save se mifala i stap jikim hem. Hem i talem se hem i stap krae evri naet. Kolosap mi krae tu taem hem i stap talem long mi. Mi wantem helpem hem mo mi disaed blong talem sore long hem from wanem mi bin talem long hem.
Long nekis dei, mi go luk hem mo mi putum han blong mi raon long solda blong hem. Mi talem: “Mi sore tumas se mi mi stap mekem fani nogud long yu.” Hem i talem yes wetem hed blong hem, mo ae blong hem i fulap long krae. Be ol nara pikinini, oli stap jikim hem yet. Nao, mi tingbaot wanem mi bin lanem long Praemeri klas blong mi: jusum raet.
Mi talem strong long ol fren blong klas se: “!Yufala i stop blong jikim hem! ?Yufala i no save se hem i harem nogud tumas long hemia? Plis yufala i talem se yufala i sore from samting we yufala i bin mekem, mo kam wan fren blong hem.”
Be oli no wantem jenis isi olsem. Be, oli kros long mi, mo talem: “Ei, ?wanem i rong long yu? !Yu tu yu stap jikim hem!”
Mi stil harem nogud long wanem mi bin mekem bifo. Mekem se mi talem: “Mi mi talem sore finis long hem. Mi wantem yufala i save se hemia i mekem hem harem nogud tumas, mo yufala i stop tu blong stap jikim hem.”
Wan long olgeta i talem sore, mo mifalatri i kam ol gudfala fren. Sam pipol oli stil stap jikim hem, be hem i harem gud nao from se hem i gat mifala i stap. Bae mi jusum raet taem mi helpem wan fren we i stap long nid. ●