Dijitol Nomo: Blong Ol Yang Adalt
Olsem Wanem Buk blong Momon I Openem Ol Heven long Mi
Taem yumi stap stadi long Buk blong Momon long yia ia, mi wantem serem se mi gat wan testemoni abaot paoa mo paoa blong lidim tingting we buk ia i save gat long laef blong yu.
Hem we i raet i stap long Yuta, YSA.
Mi bin gat wan testemoni abaot Buk blong Momon stat long fas taem we mi bin ridim taem mi bin yangfala. Be blong talem tru, skripja “stadi” blong mi long ol manis bifo long Oktoba 2018 Jeneral Konfrens, i olsem se mi stap ski nomo antap long ol skripja. Mekem se, taem Presiden Nelson i bin givim jalenj long ol woman blong Jos blong ridim Buk blong Momon bifo en blong yia, mi filim se i jes invitesen ia nao we mi bin nidim.
Invitesen blong hem i bin kam wetem sam promes we i gat paoa tu. Hem i talem: “Mo, taem yu prea mo stadi, mi promesem yufala se ol heven bae oli open long yufala” (“Ol Sista Oli Tekpat long Kam Tugeta blong Isrel,” Liahona, Nov 2018, 68).
Taem mi bin stap lisin i go, mi bin filim se mi glad tumas blong komitim mi bakegen long buk ia we mi bin groap wetem mo lavem tumas, mo mi no bin save wet blong ol heven oli open long mi.
Mo oli bin open. Long plante wei. Afta we mi bin komplitim jalenj ia blong Buk blong Momon, mi bin spenem taem blong tingting hevi long eksperiens ia we mi bin gat, mo mi gohed blong gat. Mi bin sapraes long wanem mi bin lanem, wanem mi bin filim, mo huia mi stap kam, taem mi bin stadi long ol pej ia blong insperesen.
Wanem Mi Bin Lanem
Taem mi bin ridim Buk blong Momon long wan spid we i moa kwik bitim we mi stap mekem oltaem, ol stori ia oli kam laef. Mi bin filim se mi joen gud long olgeta ia, we testemoni blong olgeta mo eksperiens blong olgeta, oli fulumap buk ia.
Aot long brata blong Nifae, Sam, mi bin lanem se kwaet fasin blong stap stret mo gud, i wan hae mo gud fasin. Aot long Alma, mi bin lanem se mi no mas lego fet blong mi. Aot long boe blong hem, mi lanem se i neva let tumas blong kam kolosap long Kraes mo gat eksperiens ia long paoa blong Atonmen blong Hem we i no gat en, we i paoa blong klinim man (luk long Mosaea 27; Alma 36). Papa blong Lamonae i bin givim insperesen long mi blong mekem moa sakrifaes i go long God (luk long Alma 22:15, 18). Pahoran i tijim mi blong mi mas stap kwaet mo stap olsem Kraes taem mi filim se oli no andastanem mi (luk long Alma 61). Aot long brata blong Jared, mi bin lanem se, nomata i nidim blong yumi mas tekem aksen, hemia i no inaf; yumi nidim help blong Kraes mo paoa blong Hem we i save mekem ol samting oli hapen (luk long Ita 2–3). Aot long Moronae, mi bin lanem se, nomata bae yumi save filim se yumi stap yumiwan, bae yumi filim se yumi neva stap yumiwan (luk long Momon 8:3, 5).
Mi bin lanem blong askem samting long Lod plante taem, blong prea wetem strong paoa mo wetem fet. Mi bin lanem se i impoten blong kipim ol rekod mo blong stap serem testemoni, mo tu, stret wei blong sakem sin. Mi bin lanem se God i gat tingting long evriwan, se Kraes i gat bigfala sore, mo we Tufala i wan long evri stamba tingting.
Mi bin lanem se “blong kakae long ol toktok blong Kraes” (2 Nifae 32:3) i givim daereksen ia we mi nidim long laef blong mi.
Mi bin lanem, bakegen, se Josef Smit i no bin—mo i no bin save—raetem buk ia.
Wanem Filing Mi Bin Gat
?I jes hapen nomo se mi bin ridim ol sam blong Nifae (2 Nifae 4) long wan dei we mi bin filim daon from mi no save mekem sam samting mo from ol wiknes blong mi? No i no jes hapen nomo. ?I bin wan gud aksiden we mi faenem toktok blong King Limhae: “O, ol wok blong Lod oli nambawan tumas, mo hem i save gat longfala tingting from ol fasin blong ol pipol blong hem” (Mosaea 8:20) long taem we mi filim se mi stap miwan blong gotru ol tes blong mi? !No! Wetem God, i no gat samting we i jes hapen olsem, be i gat ol sore blong Hem we oli oganaesem gud i stap, mo mi mi bin kasem plante taem mi bin stap rid. Mi bin rili filim lav ia we Papa long Heven i gat long mi, mo mi bin filim pis ia we i no gat samting we mi save komperem wetem; mo hemia mi bin filim taem mi bin draonem mi insaed long Buk blong Momon.
Hiling paoa blong Sevya nao mi bin stap filim truaot long riding blong mi long Buk blong Momon. Wan ves afta nara ves i stap testifae abaot gladhat blong Hem, sore, bigfala hat mo lav blong Hem we i no gat en. Taem mi bin stap rid abaot Jisas Kraes, mi bin filim se mi fulap wetem fasin blong talem tangkyu from sakrifaes blong Hem. Wan long ol merikel we i moa hae we mi bin gotru long hem taem mi bin stap rid, i filing ia blong kasem ful fogivnes from wan longfala laen blong ol nogud joes we mi bin mekem, plante yia i pas. Mi bin filim se i olsem se Sevya i bin stap toktok i kam stret long mi taem mi bin stap rid. Insaed long hat blong mi, mi bin filim ol toktok ia, hem i taem blong muv i go fored. Kraes i bin givim hiling ia we mi bin nidim.
Nomata we mi no bin luk Kraes we i laef bakegen long ded semmak olsem Ol Man blong Nifae (luk long 3 Nifae 11), mi bin filim we Hem i stap insaed long laef blong mi taem mi bin stap rid abaot Hem insaed long Buk blong Momon. Hem i rili andastanem wanwan long yumi mo ol tes we oli blong yumi nomo, mo Hem i gat paoa blong sevem yumi, givim kamfot long yumi mo hilim yumi.
Huia Mi Stap Kam
Evri dei, taem mi stap draonem miwan insaed long Buk blong Momon, mi mi kam blong save wet longtaem moa, gat moa lav mo sore, mo gat moa hop. Mi nomo stap selfis tumas, mo mi no wantem save tumas abaot ol samting blong wol ia.
From Buk blong Momon mo Spirit ia we buk ia i tekem i kam insaed long laef blong mi, mi mi wan moa gud mama, waef, gel mo fren. Mi mi wan disaepol blong Jisas Kraes we mi komitim mi moa.
?Olsem wanem nao, wan buk nomo, i gat evri ansa? ?Olsem wanem nao, wan buk nomo, i save mekem plante samting i hapen?
Wan buk we God nomo i mekem i gat kaen paoa olsem. Mo mi save se i rili kam long God.
Semmak olsem Presiden Nelson i bin promesem, ol heven oli rili bin open long mi, long plante moa wei we tingting blong mi i save tingting long hem. Mekem se, bae mi gohed blong ridim mo stadi long Buk blong Momon. Bambae mi gohed blong luklukgud insaed long ol pej blong hem, mo faenem Kraes long ples ia, from se, buk ia, i rili abaot Hem.