Wan Gudgudfala Niu Japta
Pikja i kam long Carolyn Vibbert
Mi bin putum en long wan japta blong laef blong mi taem mi bin kam wan wido long Oktoba 2010. Long taem ia, mi bin wok olsem wan tija long Saot Franis. Wan aksiden long wok i mekem se mi no save muv raon tumas, mo mi no glad se mi no save karembak helt mo paoa blong mi. Mi bin glad long wan gudfala laef long wok blong kolosap 11 yia. Mi bin lavem wok blong mi. Mi bin gat fulap fren. Be mi nomo save mekem evri samting we wok blong mi i stap askem mi.
Mi mas admitim se, afta long moa long 33 yia blong stap praktisim Tok blong Waes, mi bin stap askem miwan se from wanem nao mi no bin save “ron mo no taet” o “wokbaot mo ae i no tudak” (luk long Doktrin mo Ol Kavenan 89:20). Nao, mi mas ritae eli bitim wanem we mi ting long hem, mo mi endem wan moa japta blong laef blong mi.
Mi bin stap laef wetem gel blong mi taem we hem i kasem notis se, wok blong hem, oli transferem i go long eria blong Paris. Mi disaed se bae mi go wetem hem mo bae mi openem wan niu japta long laef blong mi long wan niu ples.
I no longtaem afta we mitufala i kasem ples ia, oli bin singaotem mitufala blong go wok long Paris Franis Tempol. Koling blong mi insaed long tempol i bin konfemem long mi se mi bin stap long raet ples long wan raet taem, from se Lod i bin tekem mi, mi go long ples ia. Mi bin gat fulap glad blong stap givim seves oltaem insaed long haos blong Lod, mo hem i gud tumas blong serem ol kaen taem olsem insaed long tempol wetem gel blong mi. !Hemia i fulumap hat blong mi wetem glad!
Tedei, mi luk bigfala blesing ia we, long fas ples, i bin haed biaen long wan harem nogud. From se mi no save muv raon tumas, mi no save mekem wok blong mi, mo blong mi mas ritae eli, evri samting ia i bin had. Be mi save se Lod blong yumi, Jisas Kraes, i bin stap karem mi. Hem i bin helpem mi blong laef long wan slo laef, mo blong mi spel, mi gat hop, mo gat pis, we naoia, oli wan bigfala pat blong laef blong mi.
Evri taem mi stap wokbaot tru long ol doa blong tempol, mi filim Tabu Spirit. Long ol taem we i had, wetem hevi trabol blong wol antap long yumi, hem i gud tumas blong save se Lod i bin givim yumi ol tabu ples, we evri samting i stap long oda mo i naes insaed long olgeta. Mi filim bigfala tangkyu from niu japta ia blong tempol seves insaed long laef blong mi. !Hem i bigwan tumas!