“Evri Samting I Bin Hapen long Waes Tingting blong Hem we I Save Evri Samting”
Pikja we i kam long Christopher Wormell
Taem mi go long misinari trening senta olsem wan fultaem misinari, mi faenemaot se i gat fulap samting blong lanem. Mi mekem bes blong stadi, blong mekem testemoni blong mi i kam strong moa, mo blong bildimap fandesen ia we mi bin gat finis. Bae mi prea, mi askem wan kwestin long Papa long Heven, mo afta, bae mi lukaotem ol ansa. Praktis ia i bin jenisim laef blong mi.
Wan dei, taem mi bin stap olsem wan misinari long Peru, wan fren elda i kasem wan leta we i stap talem long hem se papa blong bes fren blong hem i bin ded, we i no gat man i ting se bae i olsem. Hem i stap krae. “?From wanem bae Papa long Heven i letem hemia i hapen?” hem i talem mo krae.
Kwestin ia i stikim hat blong mi. Long naet ia, mi bin nildaon mo mi askem semfala kwestin ia long Papa long Heven. Afta, taem mi stap luklukgud insaed long Buk blong Momon, ae blong mi i foldaon long 2 Nifae 2:24, we i talem se: “Be luk, evri samting i bin hapen long waes tingting blong hem, we i save evri samting.”
Skripja ia i draon insaed long hat blong mi mo i no livim mi. Mi bin raetem wan kad i go long elda ia, mo mi yusum skripja ia olsem pat blong testemoni blong mi. Mi talem gud long hem se evri samting bae i oraet from se Papa long Heven i mekem olgeta samting long waes tingting. Yumi save trastem Hem from se Hem i lavem yumi mo i save evri samting.
Abaot wan yia mo haf afta, mi bin stap givim seves long ol hil blong Peru mo mi kasem wan telefon kol we i kam long misin presiden blong mi. Hem i talem se papa blong mi i kasem wan strok, mo i stap long nogud situesen. I no longtaem afta, papa blong mi i pasawe. Mi harem nogud tumas, mo eni kaen kwestin i kam spolem mi: “?Olsem wanem bae mi winim hemia?”
Mi bin prea long Papa long Heven blong kasem wan ansa. Plante taem, mi bin wantem blong save se from wanem papa blong mi i go we mi no gat janis blong talem tata long hem. Mi karem Buk blong Momon, mi openem, mo ridim olsem semfala toktok ia we mi bin serem wetem elda ia plante manis bifo: “Be luk, evri samting i bin hapen long waes tingting blong hem, we i save evri samting.” Ol toktok ia, olsem wan blangket, oli kavremap mi wetem pis mo oli givim mi wan gladhat long wan taem we mi bin filim se mi lus.
Papa blong mi long wol ia i bin lus, be Papa blong mi long Heven bae i stap oltaem blong mi. Papa long Heven i mekem evri samting long waes tingting blong Hem, mo taem yumi stap luklukgud mo mekem bes blong yumi blong yumi rere, bae yumi faenem ol gudgudfala ansa.