Kam Tugeta blong Isrel tru long Wok blong Givhan

Wok blong givhan i wan janis blong folem kaonsel blong profet blong mekem Isrel i kam tugeta.

Presiden Russel M. Nelson i bin invaetem yumi blong help blong mekem Isrel i kam tugeta—“samting ia we i moa impoten we i stap tekples long wol tedei.”¹

Blong olgeta we oli wantem kam pat blong wok ia blong mekem Isrel i kam tugeta, wok blong givhan i wan janis we i gud tumas. From se, wok blong Lod blong fasin blong sevem man i wan wok we evri samting i stap insaed, wok blong givhan i wan rod we i kamtru long insperesen, blong i jenisim laef blong ol pipol. Sapos yu stap givhan long ol lesaktiv memba, o sapos yu stap invaetem olgeta blong helpem yumi taem yumi stap givim seves long olgeta aotsaed long jos blong yumi, wok blong givhan i givim ol janis blong mekem Isrel i kam tugeta.

Tekem Hevi Trabol blong Wanwan long Yumi

“Ol sipsip blong yumi, ating oli stap harem nogud, oli lus, o iven oli disaed blong go lus; olsem man blong lukaot long sipsip, yumi save stap olsem ol faswan blong luk nid blong olgeta. Yumi save lisin mo soem lav we i no jajem man, mo givim hop mo help wetem gudfala jajmen blong Tabu Spirit.” —Bonnie H. Cordon²

“Kwaet nomo, mi stap lukluk woman ia we i sidaon long saed blong mi long flaet blong mi we i go hom, hemia long 7 klok moning. Hem i bin tekem wan strong dring bifo plen i aot, mo taem hem i askem mi sapos mi mared, ol nogud jajmen abaot hem, oli stap blong hipap.

“‘Yes. Mi mi gat fo pikinini mo fo apupikinini,’ mi ansa wetem sam hae tingting.

“Afta nao, hem i talem wan samting we i jenisim evri samting. Hasban blong hem i ded, hemia wan dei bifo, afta we hem i stap long koma blong faef dei. Nomata we hem i wan imejensi dokta, hem i no bin save sevem hem afta we hem i foldaon taem tufala i stap holidei.

“Mi bin sem se ol kwik jajmen blong mi oli go longwe tumas. ?Wanem nao bae mi save talem long hem? Taem mi traem putum ol tingting blong mi i kambak long laen, mi bin filim Papa long Heven i kapsaetem Spirit blong Hem blong mi save givhan long woman ia, mo serem sam long ol gudfala trutok blong gospel.

“Mi bin lanem se, i nomata se hem i no stap go long jos, hem i bin biliv long Jisas Kraes mo hem i bin stap ridim Baebol. Taem mi askem hem sapos hem i save abaot Jos Ia blong Jisas Kraes blong Ol Lata-dei Sent, hem i talem se hem i save smol nomo. Mi bin serem wetem hem wan mesej blong wan Jeneral Konfrens, we i kam long Elda Richard G. Scott (1928–2015), we taetol blong hem i: ‘The Eternal Blessings of Marriage,’ (Ol Blesing blong Mared we Oli No Save Finis,) mo afta, mi bin testifae abaot ol famli we oli no save finis, mo olsem wanem nao, Papa long Heven i save mo i lavem wanwan long yumi. Mi bin faenem se hem i bin stap go long Hawae, YSA; hem i bin groap long ples ia, mo mi bin leftemap tingting blong hem blong visitim Lae Hawae Tempol.

“Mitufala i go wanwan long Sol Lek Siti, Yuta eapot. Mi mi glad tumas se Lod i bin save yusum mi, i nomata ol rong we mi gat, blong go toktok long wan sista we i nidim lav mo kamfot.”

John Tippetts, Yuta, YSA

OL PRINSIPOL BLONGTINGTING LONG OLGETA

“Ol nogud jajmen”

Stap kwik blong jajem man, i wan fasin we i save holemtaet yumi blong luk tabu paoa insaed long wanwan man o woman (luk long Matiu 7:1).

“Kapsaetem Spirit blong Hem”

Trastem promes ia blong God, se bae Hem i givim long yumi wanem blong talem long evri taem (luk long Doktrin mo Ol Kavenan 100:5–6).

“Bin Lanem”

Askem wanem ol narawan oli stap biliv long hem, lisin wetem lav mo sore, mo tritim ol bilif blong olgeta wetem respek.

“Testifae”

Lukaot ol janis blong serem testemoni long wei we Lod i bin wok insaed long laef blong yu (luk long Mosaea 24:14).

“Leftemap Tingting”

Invaetem olgeta blong mekem samting folem trutok we i stap, blong mekem se Tabu Spirit i save testifae long olgeta (luk long Jon 7:17; Moronae 10:5).

Stap Sevem Ol Memba weOli Stap Kambak

“Wetem lav we i pusum yumi, ol merikel bae oli hapen, mo bae yumi faenem ol wei blong karem ol sista mo brata we oli ‘lus’ oli kam pat fulwan long gospel blong Jisas Kraes.” —Jean B. Bingham³

“Mi bin inaktiv blong sikis yia o moa taem we hasban blong mi mo mi i bin muv i go long wan niu taon. Niufala Rilif Sosaeti presiden blong mi i bin kam visitim mi, mo i askem sapos hem i save sendem wan sista blong kam visitim mi. Mi no wantem tumas, be mi talem se mi agri. Sista ia, i bin visitim mi evri manis, nomata we hem i no save stap kolosap long ol dog—!mo mi gat wan dog we i naes tumas! Hem i givhan blong tu yia taem, mo hemia i tajem mi bigwan.

“I nomata we ol visit blong hem oli ol sosol visit nomo, wanwan taem bae hem i askem mi ol kwestin we oli lidim mitufala blong tokbaot ol samting long saed blong spirit. Hemia i mekem mi no filim gud tumas, be oli bin pusum mi blong disaed we mi wantem gohed blong folem rod blong gospel, o stap long ples ia we mi bin stap long hem. Desisen ia, i wan samting we mi gat hadtaem wetem, be mi bin jusum blong storian wetem ol sista misinari.

“Long dei ia we mi bin go long sakramen miting blong fas taem afta long sikis yia, mo bin fraet tumas blong go insaed. Taem mi wokbaot i go insaed long jos, givhan sista blong mi i bin stap wet long mi, mo hem i wokbaot wetem mi long japel. Afta long hemia, hem i wokbaot wetem mi i gobak long trak, i askem mi wanem i bes wei blong hem i save helpem mi taem mi stap kam antap blong kam kolosap moa long Sevya.

“Taem mo lav blong givhan sista blong mi i bin helpem mi blong kambak long jos, mo mi tekem se ol hadwok blong hem, oli wan long ol hae presen we wan i bin givim long mi. Mi talem tangkyu tumas se hem i bin stap ia long saed blong mi, taem mi bin stap wokbaot i gobak long Jos blong Sevya.”

Oli holemtaet nem, Britis Kolombia, Kanada

Ol Prinsipol blongTingting long Olgeta

“I bin visitim mi evri manis, nomata we hem i no save stap kolosap long ol dog”

?Olsem wanem yu save soem se yu kea abaot olgeta we yu stap givhan long olgeta i moa bitim eni nara samting? (luk long Doktrin mo Ol Kavenan 121:44).

“Ol Kwestin”

Blong stap askem ol stret kwestin i save help blong pusum wan blong i skelembak hemwan bakegen. Tingbaot se wok blong givhan blong yumi i gat wan stamba tingting biaen long hem; mo stamba tingting ia i go bitim fasin ia blong stap mekem fren nomo.⁴

“I bin stap wet long mi”

Evriwan i sapos blong filim se oli welkam (luk long 3 Nifae 18:32).

“I bin stap ia long saed blong mi, taem mi bin stap wokbaot i gobak”

Sapot blong yumi i save mekem samting i kam defren long olgeta we oli bin stap folfoldaon mo oli wantem kambak long Sevya mo kasem hiling (luk long Hibrus 12:12–13).

Wok blong Givhan mo Kam Tugeta blong Isrel

“Long wanem wei we i nomol long yu, serem wetem ol pipol from wanem Jisas Kraes mo Jos blong Hem i impoten long yu. …

“ … Wok blong yu hem i blong serem wanem i stap long hat blong yu mo laef folem ol bilif blong yu.” —Elda Dieter F. Uchtdorf⁵

Wok blong givhan mo fasin blong serem gospel, tufala i wok wan. Hemia sam wei we yumi save mekem ol fren mo ol neba blong yumi oli kam tugeta taem yumi stap givhan—o blong stap givhan taem yumi stap pulum tugeta ol fren mo ol neba blong yumi:

Givim seves tugeta. Lukaotem samfala janis blong invaetem wan fren o wan neba blong joenem yu blong givhan long nid blong wan narawan. Askem olgeta blong helpem yu blong rere long wan kaekae blong wan niu mama, klinim yad blong wan neba we i olfala, o klinim hom blong wan we i sik.
Tij tugeta. Tingting blong invaetem wan fren o wan neba we i no stap kam oltaem blong i akseptem blong ol misinari oli tijim wan misinari lesen long wan narawan, insaed long hom blong hem; o blong i sapotem yu blong ol misinari oli tijim wan lesen insaed long hom blong yu, o blong go wetem yu, long wan lesen we oli stap tijim insaed long hom blong wan narawan.
Go aot mo toktok. Antap blong stap givhan long olgeta we oli givim nem blong olgeta long yu, yu save go aot mo toktok tu long ol narawan taem yu luk se i gat wan nid i stap. Askem sapos yu save draevem olgeta i go long ol miting blong Jos. Invaetem ol pikinini blong olgeta blong kam long ol aktiviti blong Yut o Praemeri. ?Wanem nao ol nara wei we yu save givhan o mekem man i kam tugeta?
Yusum ol risos we Jos i bin givim. Jos i stap givim plante risos long ol memba; hemia i blong helpem olgeta blong stap serem gospel. Yu save gotru long “Misinari” seksen insaed long Gospel Laebri ap, wajem ol vidio long “Come and See” (Kam mo Luk, (long ChurchofJesusChrist.org/go/12011), mo visitim ComeUntoChrist.org blong gat ol aedia long wei blong pulum tugeta Isrel insaed long ol komuniti blong yumi.