Ol Pikinini mo Ol Yut: Wan Evri Dei Laef Lukluk
Ol foto oli kam long Randy Collier
Maet bae yu sapraes blong luk se, Ol Pikinini mo Ol Yut, oli no gat wan ditel lis blong tikim long saed blong ol evri dei gol we yu sapos blong mekem. !Yu stap mekem ol bigfala gud samting finis! Be, rod ia, blong wanwan, oli bin krietem blong helpem yu blong kam kolosap moa long Sevya long sam wei we, ol nid mo ol intres blong yu, oli givim insperesen long yu.
Stamba tingting blong Ol Pikinini mo Ol Yut i blong helpem yu blong mekem fet blong yu long Jisas Kraes i kam strong moa. Luk 2:52 i stap tijim yumi se taem Jisas Kraes i bin yangfala, Hem i “stap groap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem.” Hem i bin laef long wan laef we i gat balens long hem, mo yu tu, yu save mekem. Taem yu lukluk nomo long ol defren pat blong laef blong yu long saed blong spirit, long saed blong sosol, long saed blong bodi, mo long saed blong waes, bae yu save kam moa olsem Sevya.
Ditel blong peinting ia, Long Saed blong Ol Kwaet Wota i kam long Simon Dewey
Olsem Wanem Program Ia I Wok
Ol Pikinini mo Ol Yut i leftemap tingting blong yu blong yu groap long saed blong spirit, sosol laef, long saed blong bodi mo long saed blong waes taem yu wok strong blong lanem gospel, gat seves mo aktiviti, mo developem yuwan.
Stap Lanem Gospel
Semmak olsem we Sevya “i bin groap long waes blong hem” (Luk 2:52), yu tu, yu save groap o kam antap long save blong yu, mo long hamas yu andastanem gospel. Evri prinsipol blong gospel we yu stap lanem, bae i helpem yu blong save olsem wanem Sevya i save mekem yu kam strong moa mo bae i blesem yu long evri pat blong laef blong yu.
Yumi gat plante risos we yumi save yusum blong lanem moa abaot ol prinsipol blong gospel mo kam moa olsem Sevya. Eksampol: prea, skripja stadi, mo Spirit i stap olsem fandesen. Famli blong yu mo ol lida blong Jos oli save helpem yu blong lanem moa abaot Sevya. Kurikulom ia, Kam Folem Mi mo seminari, oli save lidim yu long stadi blong yu. Taem yu stap yusum ol risos ia blong lan abaot Jisas Kraes mo gospel blong Hem, bae rilesensip blong yu wetem Hem bae i kam antap.
Seves mo Ol Aktiviti
Blong stap givim seves long ol narawan, oli wan long ol stamba samting we Sevya i bin mekem taem Hem i bin stap yet long wol ia. Taem yu faenem ol simpol mo gudfala wei blong helpem olgeta insaed long famli mo komuniti blong yu, yu stap folem eksampol blong Hem mo stap komitim yu blong kam moa olsem Hem.
Ol grup aktiviti we oli gat mining, oli save helpem yu mo ol nara yut blong faenem ol wei blong givim seves long ol narawan taem yu stap groap tugeta long saed blong spirit. Gud hapi aktiviti, mo ol aktiviti we i leftemap tingting oli helti blong gat. Taem yufala i stap kam tugeta olsem wan grup blong ol yang mo fetful Lata-dei Sent, plante taem yu save lan mo mekem plante moa bitim we yu save mekem yuwan nomo.
Divelopmen blong Yuwan
Papa long Heven mo Jisas Kraes oli kea bigwan abaot yu mo abaot huia yu stap kam olsem. Taem yu stap mekem ol gol blong gro i kam huia we Papa long Heven i wantem yu blong kam, yu save kam kolosap moa long Hem mo long Pikinini blong Hem.
Evriwan i spesel, mekem se ol gol blong yu blong kam antap, bae oli folem nomo ol nid blong yu. Eksampol. Sapos yu wantem blong lan blong plei ol hym long piano, yu save putum wan gol blong stap praktis evri dei. Sapos yu wanem kam gud moa long skripja stadi, yu save putum wan stret taem long evri dei, blong yu rid. Lukaotem Spirit blong i lidim yu blong yu kam antap wetem wan plan we bae i wok gud moa long yu.
Ol Pikinini mo Ol Yut, i blong YU
!Yu nao bae yu tekem plante samting aot long hem! Taem yu stap putum ol gol blong yuwan blong stap stadi mo laef folem gospel, stap tekpat long ol seves mo ol aktiviti, mo stap developem yuwan, bambae yu lanem moa abaot yuwan mo huia i ril yu. Wok ia blong stap kam wan disaepol blong Jisas Kraes i save kam wan jalenj; be hem i wan gol we i save givim gud samting long yu.
Ol Twin Sista Oli Putum Ol Pikinini mo Ol Yut long Aksen
Ol yut olsem yu, oli stat finis blong luk ol blesing blong stap traehad blong kam moa olsem Jisas Kraes long evri dei laef blong olgeta. Danika mo Natasha R., we tufala i gat 15 yia mo tufala blong Ohaeo, YSA, tufala i twin sista we oli disaed blong mekem hemia. Papa blong tufala i blong Taelan, mo from se samtaem, oli stap go visitim ol famli longwe, Danika mo Natasha, tufala i disaed we tufala i wantem lanem moa abaot kaekae mo lanwis blong Taelan.
Danika i putum fol blong lan blong kukum sam sup blong Taelan. Hem i go pem ol samting blong kuk wetem mo i bin praktis wan niufala fasin blong kuk wetem papa blong tufala. Natasha i bin wantem blong lan blong toktok wetem famli blong hem long Taelan, mekem se hem i putum gol blong lanem wan niu toktok evri dei. Hem i yusum wan websaet blong helpem hem blong stadi long lanwis ia, mo praktis blong talem ol toktok wetem papa blong hem.
Taem Danika mo Natasha i bin wok long gol blong tufala, tufala i bin wantem blong serem wanem tufala i bin lanem wetem ol nara yang woman insaed long wod blong tufala. Ol lida blong tufala i bin helpem tufala blong oganaesem wan aktiviti blong lanem moa abaot Taelan. Long aktiviti ia, Danika i kukum sup blong evriwan, mo Natasha i bin tijim olgeta blong talem sam toktok long lanwis blong Taelan.
Ol sista ia, oli bin putum tu fren blong tufala, Grace, i stap long aktiviti ia. Grace i bin gat wan gol blong hemwan blong kam gud moa blong toktok long fored blong pablik, mekem se hem i givim wan presentesen long hao blong yusum ol jopstik blong oli save kaekae sup blong olgeta.
Taem oli bin praktisim gol blong olgeta mo stap wok wetem ol lida blong olgeta, mo ol nara yang woman, Danika mo Natasha oli bin save mekem wan plan blong gat wan gud hapi naet blong stap glad wetem ol fren blong olgeta.
Ol Blesing blong Stap Tekpat long Ol Pikinini mo Ol Yut
Danika mo Natasha i bin serem se oli bin kasem plante blesing taem tufala i bin traehad blong lanem moa abaot famli histri blong olgeta, mo selebretem hemia wetem famli blong olgeta mo ol nara yang woman. Eksperiens blong tufala i kam wetem plante jalenj long hem. Natasha i eksplenem: “Taem mi bin stap long skul, mi bin stap lanem lanwis blong Taelan, mekem se i bin had samtaem blong faenem taem blong mekem hemia.” Danika i ademap: “Long aktiviti, mi bin gat hadtaem smol blong mekem sup ia miwan, from se papa blong mi i no bin stap.” Be tufala sista i bin agri long en se, i bin wan gud samting.
Danika i talem: “Mi laekem se mi bin spendem taem wetem papa blong mi, mo i bin helpem mi blong filim kolosap moa long famli blong mi.” Hem i eksplenem tu se: “Blong mekem mo kipim ol gol blong miwan i bin helpem mi blong kam kolosap moa long Jisas Kraes taem Hem i givim wan klia rod blong mi helpem miwan, mo tu, blong mi helpem ol narawan. Mi nomo stap mekem nating, olsem mi bin mekem long sam naet, be mi mas putum wan standet blong mi folem mo kipim, mo hemia i givim mi moa taem blong tingting abaot Kraes.”
Natasha i bin talem se, taem hem i bin mekem mo kipim gol blong hem, “i rili mekem mi tingting bigwan moa abaot wanem mi nidim mo wantem, blong kam kolosap moa long Kraes.” Hem i tekem not tu se, nomata hem i tanem ae blong hem blong lukluk long wan nara gol, hem i bin kasem insperesen blong gohed blong lanem lanwis blong Taelan: “Fas gol blong mi i blong lanem lanwis blong Taelan blong mi save toktok wetem famli blong mi long Taelan, mekem se mi wantem blong gohed blong stap lanem lanwis blong save toktok wetem olgeta.”
Gudfala balens blong Danika mo Natasha long saed blong divelopmen blong tufala i bin helpem tufala blong lanem moa abaot kalja blong papa blong tufala, gat gud hapi taem wetem ol fren, mo kam kolosap moa long famli blong tufala, mo long Sevya—mo hemia nao wanem hem i Ol Pikinini mo Ol Yut.
Taem yu tekpat long Ol Pikinini mo Ol Yut, i save helpem yu blong bildimap ol rilesensip blong yu wetem famli blong yu, ol nara yut mo ol nara memba blong wod, mo speseli Sevya taem yu stap lukluk long wei blong kam gudfala yu.