?Bae Hem I Andastan?
Pikja i kam long Allen Garns
Long 2005, mi bonem, bifo taem, trifala pikinini: Milena, Mateo mo Nelson. Milena i helti taem i bon, be tufala smol boe, tufala i no oraet gud. Mateo i bin ded from ol sik ia, afta tri manis we hem i bon.
Wan manis afta we Mateo i lus, oli faenem se Nelson i gat wan sik long bren, mekem se hem i no save toktok gud, mo sora blong hem i fas. Mitufala i harem nogud tumas. Ol dokta oli talem se bae hem i neva wokbaot. Long tetaem ia, mitufala i glad tumas from save we mitufala i gat from gospel blong Jisas Kraes. Hem i bin helpem mitufala blong andastanem from wanem yumi stap gotru long fasin blong agens long laef ia.
Tru long fet mo long hadwok, Nelson i bin lan blong wokbaot mo blong toktok tru long saen lanwis. Hem i mekem i gud moa bitim wanem we ol dokta oli bin talem. Hem i bin groap we hem i hapi insaed long famli blong mifala, mo insaed long gospel.
Nomata ol samting we hem i no save mekem, mifala i bin gat plante defren gol blong Nelson: se bae hem i andastanem mining blong baptaes bifo hem i bin baptaes, se bae hem i kasem Aronik Prishud taem hem i kasem 12 yia, mo bae hem i go long tempol blong mekem baptaes blong olgeta we oli ded.
Long 2017, Nelson i bin kasem 12 yia. Mifala i bin helpem hem blong hem i rere blong mekem ol baptaes blong olgeta we oli ded. Hem i bin wan jalenj blong hem blong hem i andastanem se olgeta we oli bin ded mo oli no bin baptaes, bae oli nidim help blong yumi. I no longtaem afta long betdei blong Nelson, hem, Milena, mo bigfala brata mo sista blong hem, Franco mo Brenda, mo ol nara yut long wod blong mifala, oli bin go long Kordoba Ajentina Tempol. Tempol presiden i welkamem olgeta mo i toktok long olgeta abaot hamas nao baptaes blong bihaf blong olgeta we oli ded, i impoten tumas. Mi sidaon wetem Nelson, mo mi saen long bihaf blong hem. I no longtaem afta, i taem blong hem. Taem hem i go insaed long ples blong baptaes, mitufala i askem mitufalawan, ?bae hem i rili andastanem?
Taem hem i go insaed long wota, Nelson i krae. Long tetaem ia, Tabu Spirit i soemaot long mitufala se hem i bin andastanem se hem i bin stap mekem wan samting long bihaf blong ol bubu blong hem we oli ded finis, from oli no save mekem samting ia long bihaf blong olgetawan. Mifala i bin andastanem se ol memba blong famli long nara saed blong vel oli bin hapi se hem i bin stap helpem olgeta. Spirit i bin talem tu long mifala se Mateo i bin stap ia, wetem brata mo sista blong hem. Taem we Nelson i kamaot long wota, hem i bin hapi tumas.
Stat long tetaem ia, Nelson i bin kasem baptaes mo konfemesen blong plante memba blong famli, wetem papa blong mi we i bin ded long 2016. Mifala i lavem tempol. Blong givim seves long ples ia i kam wan famli tradisen blong mifala. Evri taem we mifala i stap go, mi tingbaot spesel dei ia.