Kabataan ug Kabatan-onan: Nagsugod og Kalig-on
Bonnie H. Cordon
Kinatibuk-ang Presidente sa Young Women
Stephen W. Owen
Kinatibuk-ang Presidente sa Young Men
Joy D. Jones
Kinatibuk-ang Presidente sa Primary
Ang mga lider sa Simbahan nakigbahin kon unsaon sa mga ginikanan ug sa mga ward pagtabang sa mga kabataan nga mahimong sama sa Manluluwas.
Bisan kon ikaw naghinamhinam o nabalaka og gamay mahitungod sa bag-ong paningkamot sa Simbahan—Kabataan ug Kabatan-onan—tingali kamo adunay mga pangutana: “Unsaon niini pagtabang sa akong mga anak?” “Unsaon nato kini pagbuhat?” “Unsa ang akong tahas niini?”
Ang mga lider sa Simbahan naghatag og pipila ka mga tubag.
Nganong ang Simbahan naghimo niini nga kausaban?
Sister Bonnie H. Cordon: Sama sa gitudlo ni Presidente Russell M. Nelson, kitang tanan nagkinahanglan sa pagpalambo sa atong kapasidad sa pagdawat og pagpadayag.1 Ang Kabataan ug Kabatan-onan giandam sa pagdapit sa mga indibidwal ug mga pamilya sa pagpangita og inspirasyon gikan sa Espiritu kon unsaon pag-uswag ug sa pagpangita og hingpit nga kalipay diha sa dalan sa pakigsaad. Usa kini ka talagsaon nga panig-ingnan sa unsay gihanduraw sa propeta alang sa matag usa kanato.
Brother Stephen W. Owen: Si Presidente Nelson usab nagtudlo kanato nga kita usa ka nakasentro sa panimalay nga Simbahan, walay pagsapayan kon unsay hitsura sa atong mga panimalay.2 Dili kita usa ka nakasentro sa programa nga Simbahan. Ang mga lider ug mga magtutudlo sa Simbahan makatabang sa atong mga anak nga makakat-on ug makasunod sa mga doktrina, apan kana nga responsibilidad nagsugod diha sa panimalay, ug usa kini ka kada adlaw nga responsibilidad.
Sama sa gitudlo sa propeta, kita kinahanglang magtinguha og pagpadayag ug mosunod sa Espiritu, ug ang Kabataan ug Kabatan-onan motabang kanato sa pagbuhat niana—sa usa ka bahin tungod kay kini usa ka pagpayano. Sa nangagi, dihay mga gatusan ka mga kinahanglanon alang sa mga ginikanan sa pagsubay ug pagsabut sa Personal nga Kauswagan, Katungdanan ngadto sa Dios, Hugot nga Pagtuo diha sa Dios, ug uban nga mga programa sa Simbahan samtang nag-uswag ang ilang mga anak ngadto sa ilang pagkatin-edyer. Kining bag-o nga pamaagi naglakip sa kabatan-onan ug kabataan sa pagtinguha og inspirasyon samtang sila naghimo og mga tumong sumala sa ilang mga panginahanglan ug mga interes.
Sister Joy D. Jones: Kini usa ka makapaukyab nga oportunidad alang sa atong kabataan ug kabatan-onan, sa nagtubo nga henerasyon, sa pagpalawom sa ilang hugot nga pagtuo diha ni Jesukristo. Samtang magkat-on sila sa pagtinguha ug pagsanong sa paggiya sa Espiritu Santo, sila mas makasabut og maayo sa ilang mahangturong pagkatawo ug katuyoan ug sa unsang paagi sila makahimo sa pag-uswag ug makabati sa gugma sa Langitnong Amahan alang kanila. Ang gipatigbabaw sa Kabataan ug Kabatan-onan makapanalangin ug makapalig-on sa atong kabatan-onan ug sa ilang pamilya sa pagbuhat ug pag-amuma og mga relasyon diha sa ilang mga panimalay, sa simbahan, ug ngadto sa ilang Langitnong Amahan.
Unsa ang unang mga lakang nga mahimo sa mga pamilya aron sa pagsugod og gamit sa Kabataan ug Kabatan-onan?
Sister Jones: Paghiusa sa pag-ampo alang sa paggiya sa Espiritu. Ang mga ginikanan makasugod pinaagi sa pagpakig-istorya uban sa ilang pamilya mahitungod sa tulo ka mga dapit sa paggamit sa Kabataan ug Kabatan-onan: pagkat-on sa ebanghelyo, pagserbisyo ug mga kalihokan, ug personal nga kalamboan. Unsa ang ilang gibuhat sa pagkakaron? Unsaon nila pagtubo isip mga indibidwal ug isip usa ka pamilya diha niining tulo ka mga dapit? Sa unsang paagi ang pagtutok diha sa Lucas 2:52 makatabang sa paggiya sa ilang mga plano ug paghimo og tumong sa paghinumdom ug pagsunod sa Manluluwas? Unsa ka talagsaon nga oportunidad sa paglig-on sa kabatan-onan, panimalay, ug sa pamilya sa labing yano, makanunayon ug makahuluganon nga mga paagi.
Sister Cordon: Magsugod kita og ginagmay sa matag higayon. Ang paglakaw sa dalan sa pakigsaad sa tinuod sama lamang nga nagbutang sa usa ka tiil unahan sa usa. Paghimo og usa ka tumong. Pagsugod sa yanong paagi. Ang mga giya alang sa kabatan-onan ug kabataan mohatag kanato og talagsaon nga mga sumbanan nga sundon.
Brother Owen: Kita kinahanglang dili mohimo niini nga komplikado kaayo. Kini yano kaayo. Basaha ang Lucas 2:52. Sugod didto. Ang usa ka ginikanan makahatag dayon og panahon sa ilang bata o batan-on diha sa panimalay ug maghisgot mahitungod niini. “Unsaon ka namo sa pagtabang nga motubo sa kaalam ug sa gidak-on ug sa kahimuot sa Dios ug sa tawo?” “Unsa ang atong tun-an o buhaton og dungan?” “Unsa nga mga tumong ang imong himoon?” Himoa lamang kini nga yano.
Kon adunay usa ka butang nga gusto nimo nga mahibalo ang kabataan ug kabatan-onan samtang kini gisugdan sa paggamit, unsa kana?
Sister Cordon: Kini usa ka talagsaong oportunidad nga motubo sama sa gibuhat sa Manluluwas! Kon kita naghunahuna, “Unsa ang akong ipatigbabaw?” makahinumdom kita nga ato nang nabuhat ang daghang mga butang nga mahimong sama Kaniya. Ang pagkat-on sa ebanghelyo nahitabo diha sa daghang mga panimalay ug sa simbahan. Kita nagserbisyo ug nag-apil sa mga kalihokan. Kining bag-o nga paningkamot usa ka yanong paagi alang kanato nga mahimong matuyoon ug may tulubagon mahitungod sa pagbuhat sa unsay atong nakat-unan—ug sa pagpatigbabaw niana nga pagtubo diha sa upat ka mga dapit nga mitubo ang Manluluwas: sa espiritwal, sosyal, pisikal ug intelektwal nga paagi (tan-awa sa Lucas 2:52). Kini modala og hingpit nga kalipay, kalinaw ug mahangturong kalipay kanatong tanan samtang kita nagsunod sa Manluluwas!
Sister Jones: Ang pagpalambo nagtutok diha sa Manluluwas, gisentro diha sa pamilya, ug gisuportahan sa Simbahan. Mao kini ang pagpayano ug paghimong personal samtang kita nagpalayo gikan sa nangaging mga programa. Ang pagtubo moabut sa tagsa-tagsa nga paagi. Manghinaut ako nga ang kabataan, kabatan-onan, mga lider ug ang ilang mga pamilya mosabut nga kini makab-ot, mapahiangay nga paagi alang sa tanang mga anak sa Langitnong Amahan sa tibuok kalibutan aron mouswag og dungan ug mosinati og malungtarong hingpit nga kalipay diha sa dalan sa pakigsaad. Dili kini usa ka dako nga kausaban o usa ka dugay nga makat-unan. Kini mao ang paglihok pa og dugang sa unsay ato nang gibuhat, samtang kita gigiyahan sa Espiritu, aron ang atong sinsero nga paningkamot makapatubo sa atong abilidad sa mahigugmaon ug epektibo nga paagi sa pagsunod sa Manluluwas.
Nganong importante alang sa kabatan-onan ug kabataan nga molambo sama sa Manluluwas?
Sister Jones: Una ug labaw sa tanan, sila naghimo og mga pakigsaad sa pagsunod Kaniya sa kanunay. Naghimo sila og mga pakigsaad nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Busa sila kinahanglan nga molambo sama nga Siya milambo: sa espiritwal, sa sosyal, sa pisikal, sa intelektwal nga paagi. Ang ilang mga pakigsaad dili lamang ang katarungan nga sila kinahanglang mobuhat niana, apan kini naghatag usab og gahum nga makahimo sa pagtabang kanila nga matuman ang ilang mga tumong.
Brother Owen: Ang atong tibuok nga katuyoan sa kinabuhi mao ang pagsunod ug mahimong sama sa atong Langitnong Amahan ug sa Iyang Anak, si Jesukristo. Kita gusto nga mahisama Kanila. Magsugod kita sa pagbansay niini sa batan-ong edad, aron kita adunay usa ka sumbanan alang sa tibuok natong kinabuhi. Ug sa tinuoray kita nagsunod sa Manluluwas kon kita mobuhat sa butang nga Iyang gihimo.
Sister Cordon: Ang Manluluwas mao ang atong ehemplo sa tanang mga butang. Magtuon kita sa Iyang kinabuhi ug misyon ug mga pagtulun-an tungod kay Siya mao ang tanan nga atong gitinguha nga mahisama kita. Apan tungod kay ang matag usa kanato lahi, matag usa kanato adunay mga kinaiya ug mga kahanas nga atong kinahanglan nga palamboon aron mahimong sama Kaniya. Kining bag-ong paagi naghatag sa kabataan ug kabatan-onan og gipahaum nga oportunidad sa pagtubo diha niadtong lahi nga mga paagi, sa pagpalambo sa ilang indibidwal nga mga gasa, ug sa pag-ila niadtong mga butang nga ilang gibati nga giaghat sa pagbuhat aron mas mahisama sa Manluluwas. Kana ang nakahimo niini nga personal kaayo. Walay gitakda nga listahan. Ang mga tumong nga matag usa atong gitakda aron makapadayon diha sa dalan sa pakigsaad mahimong lahi, apan mag-uban kitang magkat-on ug motubo ug mas mopaduol sa atong Manluluwas.
Unsa ang imong gilauman nga pagabation sa kabataan ug kabatan-onan kon sila moapil?
Sister Cordon: Ako nanghinaut nga sila makaangkon og mas lawom nga pagsabut sa ilang mahangturong pagkatawo ug mobati nga sila nahisakop. Kon kita nasayud kinsa kita ug kang Kinsa kita, molihok kita sa lahi nga paagi. Sila makakat-on sa pag-ila nga unsa ang gisulti sa pipila ka sosyal media dili tinuod, tungod kay sila nakasinati kon sa unsang paagi ang Espiritu nakigsulti nganha kanila. Makaangkon sila og pagsalig diha sa ilang mga kaugalingon ug sa ilang balaanong potensyal isip anak nga mga babaye ug mga lalaki sa Dios.
Sister Jones: Gusto nato kanila nga mobati og hugot nga pagtuo ug paglaum diha ni Jesukristo, nga mobati sa kalinaw nga moabut gikan sa pagsunod sa mga sugo, nga mosinati og maayo nga mga relasyon, nga mokat-on sa pagkalig-on, nga mobati sa hingpit nga kalipay sa pagserbisyo ngadto sa uban, ug nga mobati sa kalipay ug katumanan sa pag-apil diha sa buhat sa kaluwasan.
Brother Owen: Ako manghinaut nga ang kabataan mosabut sa ebanghelyo sa paagi nga ilang masabtan gikan sa intelektwal nga paagi ngadto sa pagbaton og tinguha sa pagsunod. Dili kini mahitungod sa paghuman sa mga buluhaton. Usa kini ka proseso sa pagkat-on ug paghimo nga mahisama sa Manluluwas. Manghinaut gayud ako nga ang atong mga anak ug ang atong gipangalagaran mobati og igo ka masaligon diha sa ilang pagsabut sa ebanghelyo sa pagtudlo niini ngadto sa uban. Sama pananglit, ako manghinaut nga kita makapangutana sa atong mga anak mahitungod sa ebanghelyo ug makadungog kita og kinasingkasing kaayo nga tubag tungod kay ilang nakat-unan kini ug kabahin kini kon kinsa sila.
Sa unsang paagi ang mga ginikanan makahibalo kon ang Kabataan ug Kabatan-onan malampuson diha sa ilang panimalay?
Brother Owen: Ako mangita sa mga bunga sa Espiritu nga gihisgutan sa mga Taga-Galacia 5, sama sa dugang nga kalinaw sa panimalay. Sa akong hunahuna ang ilang mga anak mahimong mas mabination, mas mahigugmaon. Ang ilang mga anak gusto nga makig-uban sa pamilya. Sila mas malagmit nga mag-ampo ug magtinguha og mga tubag. Sila makakita og kalamboan dili lamang sa espiritwal apan usab sa sosyal, pisikal, ug intelektwal nga paagi.
Sister Jones: Sila makahibalo nga kini malampuson samtang ang mga relasyon nalig-on, samtang ang mga sakop sa pamilya nagsinati og tinud-anay nga paglambo ug nagpadayon sa pagpaninguha bisan kon sila nanlimbasug, samtang sila nagpakita og isig suportahay ug pag-amumahay sa usag usa, ug ingon nga ang impluwensya sa Espiritu Santo aktibong gitinguha ug anaa sa ilang panimalay. Ang mga sakop sa pamilya mahimong makakita og mas klaro nga koneksyon tali sa unsay ilang gibuhat matag adlaw ug sa kinabuhi ni Jesukristo. Tingali adunay mas dakong pagdayeg sa kabubut-on ug paghinulsol, napalambo nga mga kinaiya, nagtubo nga pagsalig, mga paningkamot sa pagtabang sa uban kay sa magpalayo sa kaugalingon, ug usa ka mas dako nga pagdayeg alang sa Manluluwas, sa Iyang kinabuhi, sa Iyang mga pagtulun-an, sa Iyang ehemplo, ug sa Iyang Pag-ula ug sa Pagkabanhaw.
Unsa ang imong itambag ngadto sa mga ginikanan kinsa tingali mobati og gamay nga kabalaka mahitungod sa pagbiya sa nangagi nga mga programa sa Simbahan?
Sister Cordon: Sa tinuod nagustuhan nato ang nangaging mga programa, tungod kay ang matag usa kanato milambo ug may oportunidad sa pagtan-aw sa uban nga naglambo sulod niadto nga mga programa. Sila nadasig sa ilang panahon. Apan dili ba kita mapasalamaton alang sa nagpadayon nga pagpadayag? Ang Ginoo nagkinahanglan kanato sa pagpadayon sa pag-uswag ug sa pag-usab, ug Siya nagkinahanglan sa atong mga programa sa pag-uswag ug sa pag-usab aron matubag ang panginahanglan sa mga miyembro sa tibuok kalibutan. Kita kanunay naningkamot nga molambo ug mahimong ang Simbahan ug ang mga katawhan nga ang atong Langitnong Amahan nakaila ug nagkinahanglan kanato nga mamahimo.
Sister Jones: Kita hilabihan ka napanalanginan pinaagi sa programa sa nangagi ug mapasalamaton sa tanan nga atong nakat-unan ug nasinati. Kini usa ka talagsaon nga bag-ong panahon, ug kini usa ka oportunidad sa pagtinguha sa paggiya sa Ginoo sa pagkat-on ug sa pagtubo diha sa bag-o ug dinasig nga mga paagi.
Sa unsang paagi ang mga lider makatabang sa kabataan ug kabatan-onan nga molambo sa personal nga kalamboan?
Brother Owen: Una sa tanan, nagtuo ako nga ang hamtong nga lider kinahanglan nga motan-aw niana nga bata o nianang batan-ong lalaki o batan-ong babaye sama sa pagtan-aw sa Dios kanila, nagpasabut kon mahimong kinsa kana nga tawo sa umaabut, dili lamang kon kinsa sila karon. Sugdi uban sa hunahuna kon unsay gusto nimo nga matuman sa katapusan. Pagbaton og taas nga panglantaw. Kini mokabat og taas nga panahon. Tan-awa kon mahimong unsa ang kabataan ug kabatan-onan sa umaabut. Pagpalambo og igo nga relasyon nga kon ikaw nagkinahanglan nga mosulti ngadto sa mga kabatan-onan, sila motahud kanimo igo sa pagpaminaw.
Usab, ila-ilaha ang mga ginikanan. Susiha gikan kanila kon sa unsang paagi ikaw makatabang. Tahura ang ilang tahas isip mga ginikanan.
Sister Jones: Ang Primary walay organisasyon sa korum ug mga presidente sa klase nga ang young men ug young women aduna. Ang mga lider ug mga magtutudlo sa primary, ingon man usab sa pagpangalagad nga mga kaigsoonan, naghatag og tabang alang sa kabataan kinsa walay suporta sa ebanghelyo diha sa ilang mga panimalay. Kini importante, hinoon, nga kita kanunay nga motahud sa relasyon tali sa kabataan, kabatan-onan, ug sa ilang mga ginikanan, bisan unsa pa tingali ang sitwasyon sa panimalay. Ang Kabataan ug Kabatan-onan makahatag og usa ka paagi sa pagdapit sa tibuok pamilya sa pagduol ug pagtan-aw ug sa pagduol ug pagtabang. Kini mahimong usa ka paagi sa paglig-on sa tibuok pamilya, bisan man o dili sila mga miyembro sa Ang Simbahan ni Jesukristo sa mga Santos sa Ulahing mga Adlaw.
Sister Cordon: Kita adunay daghang kabataan ug kabatan-onan nga wala ang ilang mga ginikanan sa simbahan ma-Dominggo apan sa gihapon adunay mahigugmaong mga ginikanan. Ako moawhag sa mga lider nga ila-ilahon ang mga ginikanan ug susihon kon unsa nga mga damgo ug pangandoy sila aduna alang sa ilang mga anak. Makatabang kita. Samtang nagtambayayong kita sa pagtrabaho uban sa mga ginikanan, kita naglig-on sa mga indibidwal ug sa ilang mga panimalay ug usab nag-awhag sa kabataan ug kabatan-onan sa paglig-on sa usag usa nga panimalay.
Unsay inyong isulti sa nabug-atan nga mga ginikanan kinsa nahadlok nga sila dili makahimo sa pagtabang sa ilang mga anak nga molampus sa Kabataan ug Kabatan-onan?
Sister Cordon: Ang importanting butang mao nga ato nang gibuhat ang kadaghanan niini. Ang mga pamilya nag-uban na pagkat-on sa ebanghelyo. Nagbuhat na kitag serbisyo ug mga kalihokan. Kita kanunay adunay paningkamot sa usa ka personal nga kalamboan; karon kita nagtutok na lamang sa mga paagi nga si Kristo nagtubo.
Kon kita molingkod uban sa atong mga anak, nagtuo ako nga kita sa tinuod malingaw niini. Makapaminaw ka lamang sa mga tinguha sa inyong mga anak sa sagad, yano nga paagi. Ang atong Langitnong Amahan gusto nga ang inyong anak molambo, makakaplag og hingpit nga kalipay, ug makabalik sa pagpuyo uban Kaniya. Mabati ninyo ang paggiya sa Espiritu Santo kanimo samtang nag-uban kamong maningkamot sa paghimo sa ebanghelyo ug sa atong Manluluwas nga si Jesukristo nga kabahin sa matag aspeto sa inyong kinabuhi.
Sister Jones: Sugdi sa paagi nga kini nahimo alang sa imong pamilya. Salig nga ikaw adunay tabang sa langit. Tinguhaa ang paggiya sa Espiritu. Ang Kabataan ug Kabatan-onan mahimong usa ka bililhong himan sa pagkaginikanan. Adunay daghang mga panginahanglan sa mga ginikanan karon samtang sila naggiya ug nag-amuma sa ilang mga pamilya. Kini sayon usahay bation nga nabug-atan. Ang Kabataan ug Kabatan-onan makatabang sa mga ginikanan sa pagpunting sa unsay gikinahanglan gikan sa unsay importante. Ang pagtabang sa atong mga pamilya nga makakat-on kon unsaon pagsunod ang Manluluwas pinaagi sa inspirasyon sa Espiritu Santo labing importante alang kanatong tanan ug magdala sa gugma ug mga panalangin sa Ginoo.
Brother Owen: Ako naghunahuna nga ikaw sa tinuod makahimo sa pagtabang sa imong kabataan ug kabatan-onan. Dili kinahanglan nga ikaw mohimo og pipila ka dagkong mga butang. Labing importante niini ang pagkamatinud-anon ug pagkamainampoon ug paghimo sa pipila ka balaan nga mga pamatasan ug matarung nga naandan nga mga kalihokan sa inyong pamilya. Sugdi uban sa pipila ka sukaranan, yano, matarung nga mga nabatasan, ug imong makita ang mga milagro nga mahitabo sa mga kinabuhi sa imong mga anak.