Ang Pag-abli sa Gahum sa Basahon ni Mormon
Ang tagsulat nagpuyo sa Arizona, USA.
Samtang didto ako sa misyon sa Pilipinas, ang akong kompanyon ug ako mitudlo og usa ka labing gamhanan nga leksyon mahitungod sa importansya sa inadlaw nga pagtuon sa Basahon ni Mormon. Sa katapusan sa leksyon, ang akong kompanyon mihatag og usa sa labing gamhanan nga pagpamatuod kabahin sa pagtuon sa kasulatan nga akong nadungog sukad. Mipamatuod siya nga ang pagbasa sa Basahon ni Mormon midugang og usa ka bag-o nga gahum ngadto sa iyang kinabuhi nga dili nimo mapasabut.
Kini klaro nga ang iyang kasinatian sa Basahon ni Mormon nakapausab sa iyang kinabuhi, ug gusto ko niana sa akong kaugalingon mismo.
Mihukom ako nianang gabii nga ako mobasa sa Basahon ni Mormon pag-usab. Gikan sa sinugdanan.
Migahin ko og daghang panahon pagluhod sa pagpasabut ngadto sa Dios nga ako gusto nga makasinati og pagkakabig ug sa gahum nga moabut gikan sa Espiritu Santo.
Ang tubag nga akong nadawat mao: Basa. Basa lang.
Busa mao kana ang akong gibuhat. Misugod ako sa pagbasa uban ang determinasyon. Mihatag ako og espesyal nga pagtagad sa matag bersikulo, kapitulo, ug pahina. Samtang ako nagbasa, ako nakakaplag og mga bersikulo nga mitubag sa akong mga pangutana, mihupay sa akong mga kabalaka ug mitabang sa pagkuha sa mga palas-anon niadtong akong gitudloan.
Human sa mga usa ka bulan, nakaamgo ako nga usa ka butang sulod kanako nagkausab. Ang akong gahum sa paghigugma sa uban milambo; ug ako dihay dugang nga paglaum sa umaabut; nakahimo ako sa pagtrabaho og maayo ug mas dugay sa matag adlaw; mas nakatutok ako sa mga buhat; ug misugod ako sa pagbati og tumang hingpit nga kalipay.
Usa ka adlaw sa akong pagtuon nakaagi ako og kinutlo gikan ni Presidente Ezra Taft Benson (1899–1994), kanhi presidente sa Simbahan: “Adunay gahum diha sa [Basahon ni Mormon] nga mosugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon. … Kon kamo nagsugod sa pagkagutom ug pagkauhaw niadto nga mga pulong, kamo makakaplag og kinabuhi nga mas mabungahon kaayo.”1
Samtang ako nagpadayon sa pagtuon, nagsugod ako sa pagkasabut ko unsay buot niyang ipasabut. Ako nga nakita ang kinabuhi nga mas mabungahon.
Sa paghinumdom, nakombinser ako nga ang usa sa mga rason nga akong gibutang kauban niana nga kompanyon mao nga aron ako maanaa niana nga gabii aron makapaminaw sa iyang pagpamatuod. Gibati nako nga ingon og ang tanan nga maayong mga bahin sa kinabuhi—gugma, paglaum, pagsalig, kakugi, determinasyon, ug hingpit nga kalipay—gipadako.
Dihay usa ka bag-ong kahayag sa akong kinabuhi, ug ako nasayud nga kini tinuod.