Ang Labing Nindot ngaGakos Sukad!
Ang tagsulat nagpuyo sa Utah, USA
Si Ellie ganahan og gakos. Ang gakos gikan ni Papa. Ang gakos gikan ni Lola ug Lolo. Ang gakos gikan ni Mama. Ang mga gakos mopabati kaniya og kainit. Ug luwas. Ug malipayon.
Mao kana nganong si Ellie mogakos ni Mama sa simbahan. Ganahan siya nga mopasabak ni Mama. Si Mama kanunay nga mogakos niya og maayo.
Dayon ang miting sa sakrament nahuman. Kini panahon na alang sa Primary. Si Ellie gusto og Primary. Usa na siya ka dako nga bata karon. Tulo ka tuig ang panuigon! Gani siya adunay iyang kaugalingong mga kasulatan!
Apan karong adlawa gusto lang ni Ellie nga magpabiling nakagakos ni Mama sa hangtud.
Gikugos ni Mama si Ellie sa hawanan. Didto sa kwarto sa Primary, gipalingkod ni Mama si Ellie sa lingkuranan.
“Makauban ba ko nimo?” Miingon si Ellie.
“Dili,” mitubag si Mama. Mabination ang iyang tingog. “Kinahanglan ka nga anaa sa inyong klase,” miingon siya. “Ug ako kinahanglan nga anaa sa akong klase.”
Gihalukan ni Mama ang aping ni Ellie. Dayon migawas siya sa pultahan.
Gibati ni Ellie ang mga luha nga midagayday sa iyang mga aping.
Naghunahuna siya ni Mama nga naggunit kaniya. Si Mama kanunay nga nagsabak kaniya kon magbasa sila sa Basahon ni Mormon. Kasagaran silang magbasa uban sa pamilya. Apan usahay si Ellie ug si Mama magbasa sa ilang mga kaugalingon.
Gipunit ni Ellie ang iyang Basahon ni Mormon. Sa sulod mao ang usa ka hulagway ni Jesus.
Si Ellie mitak-op sa basahon ug gigakos kini. Gibati niya nga siya naggakos ni Jesus. Gibati niya ang kainit. Ug luwas. Ug malipayon. Mao kadto ang labing nindot nga gakos sukad! ●