Usa ka Pundohanan sa Pagpamatuod
Paghulagway sa Phil, i2iArt.com
Atol sa akong unang tuig sa high school, ang akong mga ginikanan nagdiborsyo. Sulod sa mga katuigan, akong nakita ang akong papa nga wala miambit sa sakramento. Nasayud ako nga siya nanlimbasug sa pagsunod sa mga sugo, apan wala ako makasabut sa gibug-aton o sa gidugayon niadto nga mga panlimbasug. Diha na lamang nga gisultihan na ako mahitungod sa iyang pagkahimulag sa kamatuoran [excommunication] nga ang akong igsoong babaye ug ako sa katapusan nahibalo sa mga detalye.
“Naligutgot ko nimo!” Ako misinggit og balik-balik, nagbakho. Nasuko ko. Nganong nakahimo siya niini sa among pamilya? naghunahuna ko. Nganong nakapamakak siya kanamo og dugay kaayo?
Ang unang kakurat ug kasuko wala molungtad og dugay. Sulod sa duha ka semana, ang akong kasuko nailisan ngadto sa pagkawalay pagbati. Sa sinugdanan, ang pagkawalay pagbati usa ka kahupayan gikan sa kasuko ug kasakit nga akong gibati, apan sa katapusan ang akong kahupayan nausab ngadto sa pagkanawad-an og paglaum. Gibati nako nga nahugno ang akong kinabuhi. Labaw pa karon, nagkinahanglan kong mobati nga konektado ngadto sa langit. Kinahanglan nga bation ko ang gugma sa Dios, paggiya, kalinaw, ug pagkanaayo.
Sa wala madugay, miabut ang kinatibuk-ang komperensya. Sa usa ka sesyon, ako naminaw ug naghulat nga mobati sa paghupay sa Dios. Apan kini wala moabut. Didto sa ngitngit nga chapel, naghunahuna ako, wala ko mabati ang Espiritu Santo, apan ako sigurado nga Siya ania dinhi. Kinahanglan gyud nga ania Siya karon. Samtang ako naghunahuna niini, nagsugod ko sa paghinumdom sa daghang gagmay nga mga saksi nga akong nadawat nga ang mga kasulatan tinuod, nga si Joseph Smith usa ka propeta, nga ang Langitnong Amahan mipanalangin sa akong pamilya, ug nga ang pagsunod sa mga sugo nagdala og kalinaw. Kini ingon og ako adunay usa ka pundohanan sa pagpamatuod.
Sa dugang nakong pagpalandong sa akong nangaging espiritwal nga mga saksi, mas nakaamgo ako nga bisan og ako nagkinahanglan na kaayo nga mobati sa Espiritu, kini dili gyud igsapayan nga dili ako mobati sa Iyang impluwensya nianang tukma nga higayon. Ako aduna nay usa ka pundohanan sa hilum, kanunay nga mga saksi nga ang ebanghelyo tinuod.
Kana nga kahibalo misuporta kanako ug mihatag kanako sa tinguha nga magpadayon sa pagsunod sa mga sugo bisan og ingon nga walay diha-diha dayon nga kaayohan. Sa hinay-hinay, akong gibati ang gugma sa Langitnong Amahan ug sa Manluluwas og labaw pa diha sa akong kinabuhi. Ang pagpabiling suod Kanila, bisan og ako dili kanunay mobati nga Sila duol, mihatag kanako og dili ikalimud nga kalinaw ug mas lig-on nga pagpamatuod sa ebanghelyo sa Manluluwas. Kini nagpadayon sa pag-impluwensya kanako karon kon ako nagsinati og kabalaka o kasubo. Nasayud ako nga makasalig ako sa Langitnong Amahan ug sa Manluluwas, ug nga Sila moayo, mobayaw, ug molig-on kanako ug sa matag usa kanato.