Ang Pagkasayud Maayo apan Dili Igo
Ania ang pipila ka mga istorya sa unang mga miyembro sa Simbahan kinsa nakadungog sa mga pagpamatuod gikan sa mga saksi sa Basahon ni Mormon.
Mga paghulagway ni Dan Burr
Ang pagpaminaw sa pagpamatuod sa usa ka saksi sa Basahon ni Mormon mahimong ang sunod nga labing maayong butang ngadto sa pagtan-aw sa bulawang mga palid o sa usa ka anghel. Daghang unang mga miyembro sa Simbahan aduna niana nga oportunidad.
Unsa ang nagsunod mao ang mga istorya sa daghang mga miyembro kinsa nakigsulti sa mga saksi sa Basahon ni Mormon. Atong masabtan, hinoon, sama sa gitudlo ni Presidente Russell M. Nelson, nga ang pagbaton og pagpamatuod sa Basahon ni Mormon “nindot, apan dili pa igo!”1
Rebecca Williams: “Ang Ilang Pulong Gituhoan”
Si Rebecca Swain Williams nakadungog og pipila ka mga saksi sa Basahon ni Mormon didto sa Ohio sugod sa 1830. Mipamatuod siya ngadto sa iyang amahan ug sa mga igsoong lalaki: “Ako nakadungog sa samang istorya gikan sa pipila ka mga pamilya sa [Smith] ug gikan sa tulo ka mga saksi mismo. Nakadungog ako kanila nga nagpahayag diha sa publiko nga miting nga sila nakakita og usa ka Balaan nga Anghel nga nanaog gikan sa langit ug gidala ang mga palid ug gibutang sa ilang atubangan.”
Sa dihang ang mga sakop sa iyang pamilya misalikway sa iyang pagpamatuod, si Rebecca wala mahadlok. Mipadayon siya sa paghigugma kanila, pag-ampo alang kanila, ug paghatag og bili sa maayong tambag sa iyang amahan. Mipadayon usab siya sa pagpamatuod ngadto kaniya nga ang mga saksi sa Basahon ni Mormon misulti sa tinuod: “Sila mga tawo nga maayo og kinaiya ug ang ilang pulong gituhoan. … Sila nakakita og anghel sa Dios ug nakigsulti kaniya.”2
Sa hinapos sa 1830, usa ka panahon sa pagkaylap sa pagsupak diha sa Simbahan, si Rebecca mipabilin nga matinud-anon, mipili nga mosunod sa mga lagda sa Basahon ni Mormon.3
William McLellin: “Gikinahanglan … ang Pag-ila sa Kamatuoran”
Usa ka buntag sa 1831 usa ka batan-ong magtutudlo nga ginganlan og William McLellin nakadungog nga pipila ka mga lalaki padulong sa Missouri magsangyaw mahitungod sa usa ka bag-ong basahon nga gihulagway isip “usa ka Pagpadayag gikan sa Dios.” Nagdali siya aron sa pagpaminaw kanila. Siya naminaw ngadto ni David Whitmer nga mipamatuod nga siya “nakakita og usa ka Balaan nga Anghel kinsa mipahibalo sa kamatuoran niining talaan ngadto kaniya.” Nagtinguha siya pag-ayo nga masayud kon tinuod ba ang ilang mga pagpamatuod. Misunod siya kanila sa 400 ka milya (644 km) ngadto sa Independence, Missouri, diin iyang nahimamat ug na-interbyu ang ubang mga saksi, lakip ni Martin Harris ug Hyrum Smith.4
Si William miinterbyu og dugay ni Hyrum. “Ako nangutana og piho nga mga detalye sa pagtungha sa mga talaan,” mirekord si William. Sa pagkasunod buntag, human mag-ampo nga magiyahan ngadto sa kamatuoran, siya nakaamgo nga siya “gikinahanglan isip usa ka matinuoron nga tawo nga moila sa kamatuoran ug sa pagkatinuod sa Basahon ni Mormon.”5
Sa nagsunod nga mga tuig, ang hugot nga pagtuo ni William gisulayan ug gilig-on pinaagi sa iyang mga pagpili ug sa pagpanggukod nga giantus sa mga Santos sa Ulahing mga Adlaw. Sa dihang giatake ang mga Santos sa Jackson County, Missouri, ang higala ni William nga si Hiram Page, usa sa walo ka mga Saksi, gibukbok ug gibunalan sa mga tawo kinsa miingon nga sila mobuhi kaniya kon siya molimud sa Basahon ni Mormon. “Unsaon ko paglimud sa unsay akong nahibaloan nga tinuod?” Miingon si Hiram, ug gibunalan siya pag-usab.
Si William nalig-on pinaagi sa pagpamatuod ni Hiram—ug masabtan ang kahadlok nga mabunalan. Sa dihang nadunggan ni William nga ang mga lalaki diha sa lugar nagtanyag og ganti alang sa pagdakop kaniya ug ni Oliver Cowdery, sila mibiya sa lungsod aron sa pagtago didto sa mga kakahoyan uban ni David Whitmer. Didto giinterbyu ni William ang duha sa Tulo ka mga Saksi. “Wala ako makakita sukad og dayag nga panan-awon sa akong kinabuhi,” miingon siya, “apan kamong mga lalaki miingon nga kamo nakakita, ug busa kamo nasayud sa positibo nga paagi. Karon kamo nasayud nga ang atong mga kinabuhi anaa sa kakuyaw sa matag oras, kon ang mga manggugubot makadakop lamang kanato. Sultihi ako diha sa kahadlok sa Dios, kana ba nga Basahon ni Mormon tinuod?”
“Igsoong William,” miingon si Oliver, “ang Dios mipadala sa iyang balaan nga anghel aron sa pagpahayag sa kamatuoran sa paghubad niini ngari kanato, ug busa kita nakahibalo. Ug bisan patyon kami sa mga manggugubot, gani kinahanglan gayud nga mamatay kami sa pagpahayag sa kamatuoran niini.”
Midugang si David, “si Oliver misulti kaninyo sa ligdong nga kamatuoran, kay kami dili malingla. Ako sa labing tinuod mopahayag kaninyo sa kamatuoran niini!”6
Sila ni David, Martin, Hiram, Oliver, ug William matag usa miabut sa kasayuran nga gihubad ni Joseph Smith ang Basahon ni Mormon pinaagi sa gahum sa Dios. Sila nasayud nga ang mga ebanghelyo nga gisulat diha sa bulawang mga palid tinuod. Apan sa wala madugay gitugutan nila ang mga kasagmuyo ngadto ni Joseph nga modako hangtud mihunong sila sa pagpuyo sumala sa mga pagtulun-an sa Basahon ni Mormon.
Ingon nga nakasaksi sa ilang mga pagpili, si Propeta Joseph Smith mipamatuod dili lamang nga ang Basahon ni Mormon tinuod—“ang labing husto sa bisan unsa nga basahon dinhi sa yuta, ug ang sukaranan sa atong tinuohan”—apan nga kita “mahimo nga maduol sa Dios pinaagi sa pagsunod sa iyang mga pagtulun-an, kay sa bisan hain nga basahon.”7
Sally Parker: “Lig-on sa Pagtuo”
Si Sally Parker silingan ni Lucy Mack Smith sa Kirtland, Ohio. “Misulti siya kanako sa tibuok istorya,” misulat si Sally. Sa dihang gipangutana niya si Lucy kon siya nakakita ba sa mga palid, “si [Lucy] miingon nga wala, dili kadto alang kaniya ang pagtan-aw niini, apan nakaalsa ug nakagunit siya niini ug ako mituo sa tanan niya nga gisulti tungod kay ako nakapuyo duol kaniya og walo ka bulan ug siya usa sa labing maayo nga mga babaye.”
Niadtong 1838, si Sally nakadungog ni Hyrum Smith nga nakigbahin usab sa iyang pagsaksi: “Siya miingon nga siya nakakita sa mga palid uban sa iyang mga mata ug nakagunit niini sa iyang mga kamot.”8
Sa hinapos sa mga 1830, samtang daghang mga tawo mibiya sa Simbahan, si Sally Parker nagbangutan sa pagkawala sa ilang pakigdait ug mibag-o sa iyang determinasyon sa pagsunod sa mga pagtulun-an sa Basahon ni Mormon. “Akong barugan ang paghupot niana nga pagtuo nga sama sa usa ka lugas sa liso sa mustasa,” misulat si Sally. “Akong gibati ang gahum niini diha sa akong kasingkasing karon. Lig-on ako diha sa pagtuo sama sa dihang kami gibunyagan ug gibati ko ang sama karon. Akong barugan ang paghupot sa ebanghelyo hangtud sa kamatayon.”9
Rhoda Greene: “Diha kaniya ang Espiritu sa Dios”
Si Lucy Mack Smith namulong sa kinatibuk-ang komperensya kaniadtong 1845, human ang tanang mga saksi sa Basahon ni Mormon diha sa iyang pamilya namatay sa sakit o gipatay. Siya misaysay og istorya gikan sa unang misyon sa iyang anak nga lalaki nga si Samuel.
Si Samuel, usa sa Walo ka mga Saksi, mibisita sa panimalay ni Rhoda Greene, kansang bana didto og usa ka misyon alang sa laing simbahan. Si Samuel nangutana ni Rhoda kon gusto ba siya og usa ka basahon. “Kini Basahon ni Mormon nga gihubad sa akong igsoong lalaki nga si Joseph gikan sa mga palid nga gitago ilawom sa yuta,” mipasabut siya.
Si Rhoda midawat og kopya sa basahon aron basahon ug ipakita sa iyang bana. Sa dihang si Samuel mibalik wala madugay, si Rhoda misulti kaniya nga ang iyang bana walay interes, ug siya dili makapalit sa basahon. Naguol, gikuha ni Samuel ang basahon ug misugod sa pagbiya. Si Rhoda sa wala madugay misulti ni Lucy nga si Samuel dayon mihunong ug mitan-aw kaniya. “Wala gayud siya makakita og usa ka tawo nga motan-aw ingon niana,” miingon si Lucy diha sa iyang pakigpulong sa komperensya. “Nasayud siya nga diha ni Samuel ang Espiritu sa Dios.”
“Ang Espiritu mipugong kanako sa pagkuha niini nga basahon,” si Samuel misulti ni Rhoda, nga miluhod ug mihangyo ni Samuel nga mag-ampo uban kaniya. Iyang gitipigan ang basahon, gibasa kini, ug nakadawat og pagpamatuod kalabut niini. Sa maong paagi, sa katapusan, mao usab ang iyang bana. Sila mipili sa pagsunod sa mga pagtulun-an niini sa tibuok nilang mga kinabuhi.
“Ug sa ingon misugod ang buhat,” mipamatuod si Lucy, “ug dayon mitubo kini sama sa usa ka liso sa mustasa.”10
Si Rhoda Greene akong katigulangan. Ako nahatagan og kaayohan pinaagi sa iyang pagpamatuod sa Basahon ni Mormon ug sa narekord nga mga pagpamatuod sa mga saksi ug niadtong nakadungog kanila. Ako nalig-on pinaagi sa ilang mga pagpili sa pagsunod sa unsay gitudlo sa Basahon ni Mormon.
Matag usa kanato mahimong modernong panahon nga mga saksi sa Basahon ni Mormon, kon ang Espiritu Santo mopamatuod ngari kanato sa kamatuoran sa basahon. Sa hapit na ako mobiya alang sa akong misyon, akong nahuman og basa ang Basahon ni Mormon, ug dayon miluhod ug yanong nag-ampo apan uban sa tinuod nga katuyoan, kinasingkasing, ug hugot nga pagtuo diha ni Jesukristo (tan-awa sa Moroni 10:3–4). Mibati ako og gamhanang pagbati nga nagpasabut, “Nasayud ka na nga kini tinuod.” Miabut kini uban ang kalinaw nga ako wala gayud magtinguha sa pagbuntog. Nasayud ako sukad nga ang Basahon ni Mormon tinuod.
Kana dili igo, hinoon. Si Presidente Russell M. Nelson mitudlo: “Sa higayon nga makadungog ako ni bisan kinsa, lakip sa akong kaugalingon, nga moingon, ‘Nasayud ako nga ang Basahon ni Mormon tinuod,’ gusto kong mosinggit, ‘Maayo kana, apan dili pa kana igo!’ Kinahanglan kitang mobati, dinha ‘sa labing kinahiladmang bahin’ sa atong mga kasingkasing, nga ang Basahon ni Mormon ang dili kadudahan nga pulong sa Dios. Kita kinahanglan gayud nga mosabut niini pag-ayo nga kita dili gayud gusto nga mabuhi bisan usa ka adlaw kon wala kini.”11 Ang mga pagtulun-an ni Presidente Nelson tinuod. Ang akong nagpadayon nga paningkamot sa pagsunod sa mga pagtulun-an sa Basahon ni Mormon mas nakapaduol kanako ngadto sa Dios kay sa bisan unsa pa nga butang.