Unsa Ang Gisimbolo sa Bunga diha sa Panan-awon ni Lehi?

Diha sa panan-awon ni Lehi, unsa ang simbolo sa bunga, nga mao ang “labing madanihon sa tanan nga mga butang”? (1 Nephi 11:22).

“Ang bunga sa kahoy mao ang simbolo sa mga panalangin sa Pag-ula ni [Jesukristo]. Ang pagkaon sa bunga sa kahoy nagrepresentar sa pagdawat sa mga ordinansa ug mga pakigsaad diin ang Pag-ula mahimong hingpit nga mo epekto sa atong kinabuhi” (David A. Bednar, “Damgo ni Lehi: Hugot nga Paggunit sa Gunitanan,” Liahona, Okt. 2011, 34).

Kini nga mga ordinansa naglakip sa bunyag, kumpirma, sa sakramento, pag-orden sa pagkapari alang sa mga lalaki, ug sa mga ordinansa sa templo.

Pagkaplag sa Bunga

Ang gunitanan nga puthaw, o ang pulong sa Dios, naggiya kanato ngadto ni Jesukristo tungod kay ang mga kasulatan ug ang modernong mga propeta nagdapit kanato sa pag-apil sa mga ordinansa ug sa mga pakigsaad ug nagtabang kanato nga makasabut sa mga pagtulun-an, misyon, ug sakripisyo ni Jesukristo.

Unsa nga mga pulong gikan sa mga kasulatan o gikan sa mga modernong mga propeta ang naggiya kanimo ngadto ni Jesukristo?

Pagpabilin diha sa Bunga

Ang ubang mga tawo diha sa panan-awon ni Lehi mibiya sa bunga tungod sa pagbiay-biay ug pagbugal-bugal sa uban. Ang pagpabilin diha sa bunga mao ang pagpuyo nga matinud-anon sa atong mga pakigsaad ug sa pag-adto kanunay niadtong mga dapit diin ang mga pakigsaad gihimo.

Pagpakigbahin sa Bunga

Human si Lehi mikaon sa bunga, gusto niyang ipakigbahin kini ngadto sa iyang pamilya aron sila mobati sa “tuman nga hingpit nga kalipay” nga iyang gibati (1 Nephi 8:12).

Unsaon nimo pagpakigbahin sa imong gugma ni Jesukristo ug pagtabang sa uban nga moapil sa mga ordinansa?