Mga Hulagway sa Hugot nga Pagtuo
Rachel Lighthall
California, USA
Lakaw libut sa mga abo ug dugmok nga mga tisa [bricks] diin si Rachel kanhiay nagpuyo, ug sa tinuod imong makita nga ang tanan naugdaw na. Apan bisan human sa sunog nga miguba sa Paradise, California, mamatikdan ninyo ang hugot nga pagtuo ni Rachel samtang siya nagsulti kabahin sa unsang paagi iyang nakita ang impluwensya sa Dios diha sa iyang kinabuhi.
Richard M. Romney, litratista
Kami naanad na nga adunay sunog niini nga dapit, mao nga sa dihang akong nakita ang langit ingon og tinuod nga nag-aso nianang buntaga, wala kaayo ko mabalaka. Ako maingon og bag-o sa dapit, apan kadtong kinsa nagpuyo sa Paradise sa dugay na nga panahon—ilabi na niadtong kinsa nagpuyo taliwala sa duha ka pangpang [canyon]—gipabakwit na kaniadto.
Niining higayona, hinoon, ang kusog nga hangin kusog nga midala sa kalayo nga ang mga opisyales hingpit nga nasipyat sa pagbanabana sa tagal sa panahon nga kini moabut kanamo. Kadaghanan kanamo walay ideya kon unsay nahitabo hangtud ang tanang dapit sa lungsod nagdilaab. Ang among sitwasyon misaka gikan sa “gamayng kabalaka” ngadto sa “emergency! Pahawa!” sulod sa usa ka oras.
Ang pagpamakwit samok—ug dali. Kadaghanan sa mga tawo kinahanglan nga modrayb agi sa kalayo aron makagawas sa lungsod. Samtang nagdrayb ako kauban sa akong mga anak, ang aso diha sa tanang dapit. Mga agipo nanglupad sa tibuok lungsod ug ang mga kalayo mikaylap sa tanang dapit. Daghang mga tawo mibiya sa ilang mga panimalay nga nagdilaab o ang panimalay sa ilang silingan nagdilaab. Wala ako masayud kon ang among panimalay masunog o dili.
Samtang kami nagdrayb, nakig-istorya ako sa Dios. Nag-ampo ako nga makagawas kami nga luwas ug nga ang among panimalay dili masunog. Napuy-an pa lamang namo ang among balay og mga duha ka tuig. Isip usa ka pamilya, kami nagtinabangay diha sa pagpanindot. Ang akong bana ug mga anak mitabang kanako sa pag-usab sa ibabaw sa kabinet ug sa mga salog. Gitawag namo kini og “espesyal nga payag pahulayanan diha sa kakahoyan.” Ganahan kaayo ko sa among balay, apan naningkamot ako nga malig-on aron sa pagtugyan sa akong kabubut-on ngadto sa kabubut-on sa Dios.
Pipila ka adlaw ang milabay, among nasayran nga ang among panimalay wala na. Nahimo namo kini nga nindot, ug karon kini nasunog. Apan sa paghinumdom, ang panahon nga among gigahin sa among balay ingon ka malipayon kaayo nga panahon. Mapasalamaton ako kaayo nga ang Dios mihatag sa among pamilya niana nga higayon diha niana nga balay.
Usa sa labing nindot nga mga butang nga akong nakita ug nadungog isip resulta niini nga sunog mao ang mga pagpamatuod sa mga tawo nga akong gitawag og “dakong hugot nga pagtuo.” Kining mga tawhana nakakita kon unsa ang Dios diha sa mga detalye sa ilang mga kinabuhi. “Dakong hugot nga pagtuo” nga sama niini dili usa ka butang nga inyong makuha dihadiha dayon. Nagkinahanglan kini og taas nga panahon sa pagtukod.
Nagpahinumdom kini kanako sa sambingay sa napulo ka mga dalagang birhen. Kon wala kay imong lampara nga puno, ang panahon sa pagbalik ngadto sa Dios mao kon wala pa ang krisis. Kon ang mga kalisdanan sama niining sunog mahitabo, dili kana ang panahon sa pagsugod og puno sa imong lampara. Kini sama kon ikaw mosulod sa sakyanan ug mosugo sa imong mga anak sa pagbutang sa ilang mga seat belt. Hunahunaa sila nga nag-ingon, “Wala ako magkinahanglan og seatbelt. Kon ako makadungog nimong nagsiyagit, niana magbakus na ko!” Sa usa ka krisis wala gayud silay panahon.
Human sa sunog, akong namatikdan nga ang mga tawo dinhi nga adunay “lana sa ilang mga lamparahan” wala kaayo mag-antus. Sila sa gihapon nagbangutan, sila sa gihapon adunay mga hagit, apan mituo gihapon sila nga ang Dios nag-amuma kanila ug anaa sa mga detalye sa ilang mga kinabuhi. Sila nasayud nga ang Dios gamhanan igo nga Siya makaluwas sa ilang mga panimalay gikan sa pagkasunog, apan sila usab dili masuko kon ang mga panghitabo dili makiangayon. Sila modawat sa Iyang kabubut-on. Mao kana ang akong gitawag og “dakong hugot nga pagtuo.”
Ang tanan kinsa nagtuo sa Dios nakakita sa Iyang impluwensya diha niini nga sunog. Tingali dili ka makaprobar ngadto sa usa ka tawo nga adunay Dios tungod sa usa ka dakong milagro, apan ang Dios nakahimo og usa ka milyong gagmay nga mga milagro dinhi sa Paradise. Kon ikaw nagtuo sa Dios, imong makita ang Iyang impluwensya sa tanang dapit. Bisan tuod kini mahagiton, kini nahimo usab nga milagroso. Ang Dios nagtabang kanato nga makakat-on sa eksakto kon unsay kinahanglan natong makat-unan.
Ang pagbaton og “dakong hugot nga pagtuo“ wala mopalingkawas ni bisan kinsa gikan sa pagbangutan sa ilang mga nawala. Usa sa pinakalisud nga bahin mahitungod niining tibuok nga kasinatian mao ang pagtan-aw sa pagbangutan niadtong akong gihigugma. Tingali ako nakahimo og labaw pa nga pagbangutan uban kanila kay sa akong nahimo sa akong kaugalingong istorya. Oo, kini mahagiton alang sa akong pamilya, ug kami nawad-an og daghang mga butang. Apan kami nakaangkon usab og kalig-on ug hugot nga pagtuo.
Ang mga miyembro sa Chico California Stake mihimo og daghan kaayo aron sa pagserbisyo niadtong naapektuhan sa sunog. Ang matag tawo kinsa miadto sa stake center sa adlaw sa pagbinakwitay gipapuyo sulod og mga oras sa ubang mga miyembro sa stake. Sila midala kanamo ngadto sa ilang mga panimalay ug mitabang kanamo sa pagkuha sa mga butang nga among gikinahanglan. Natingala usab ako sa mga donasyon sa matag matang nga among nadawat gikan sa mga Santos sa tibuok kalibutan. Kami napanalanginan ug nasuportahan, ug among nabati ang ilang gugma. Nindot kaayo nga mahimong usa ka Santos sa Ulahing mga Adlaw. Isinggit ko kana sa labing makusog nga tingog!
Sa dihang nahitabo ang sunog, nag-ampo ako og kadaghan tungod kay gikinahanglan ko nga magmasulub-on ug gikinahanglan nako nga matudloan ang akong mga anak kon unsaon sa pagmasulub-on. Ang Dios adunay pipila ka nindot nga mga butang nga itudlo kanako. Akong nakat-unan ang ka-importante sa “hustong paagi sa pagkamasulub-on.” Unsay gipasabut niini ngari kanako mao nga ikaw dili moadto sa ngitngit nga mga dapit dala ang imong pagkamasulub-on o moadto og dapit nga makahahadlok. Dili nimo tugutan ang imong kaugalingon nga masuko o maulaw. Pagmasulub-on sa paagi nga ang Dios magmasulub-on. Niini nga paagi, ang pagmasulub-on maanindot ug makaayo. Kini pagabation nga labaw pa sa gugma.
Niini nga sitwasyon, ang pinakadako nga hagit mao ang wala mahibaloi. Adunay mas daghang mga pangutana kaysa mga tubag alang sa tanan. Wala kami masayud kon unsa ka dali matukod og balik ang Paradise, o kon kini mahimong matukod og balik tungod kay ang gidak-on sa nahugno ug nawala dili katuohan.
Ang Dios naglihok uban kanako sulod sa mga katuigan aron sa pag-andam kanako alang niini nga sitwasyon. Ako adunay ubang “mga kapildihan” sa akong kinabuhi nga nagtabang kanako nga masayud nga ang Dios maayo kaayong naggiya sa akong kinabuhi.
Walay lisud nga akong naagian nga walay hingpit ug nindot nga katuyoan ug kahulugan. Akong nabantayan nga kon akong tugutan ang Dios sa pagtudlo kanako, kanunay akong nakakat-on gikan sa akong mga hagit. Ang Dios nagtugot kanato nga moagi niini nga mga hagit aron kita moabut nga mosalig Kaniya ug mahigugma Kaniya. Nasayud ako nga kon ang mga butang magkalisud, anaa Siya kanunay.
Nagtan-aw si Rachel sa mga salin sa unsay kaniadto iyang panimalay. “Ang panahon nga among gigahin sa among balay ingon ka talagsaon nga panahon,” miingon siya. “Ako mapasalamaton nga ang Dios mihatag sa among pamilya niana nga higayon diha niana nga balay.”
Ang Paradise First Ward nga gambalay, kanhiay usa ka dapit sa pag-ampo, pagtuon sa ebanghelyo, ug mga kalihokan, sa karon usa ka tipun-og sa mga dugmok nga mga tisa [bricks]. Hinoon, ang mga miyembro mibati sa suporta gikan sa mga Santos sa tibuok kalibutan. “Among mabati ang ilang gugma,” miingon si Rachel. “Nindot kaayo nga mahimong usa ka Santos sa Ulahing mga Adlaw. Isinggit ko kana sa labing makusog nga tingog!”
“Ang tanan kinsa nagtuo sa Dios nakakita sa Iyang impluwensya niini nga sunog,” miingon si Rachel. “Bisan tuod kini mahagiton, kini usab nahimong milagroso. Ang Dios nagtabang kanato nga makakat-on og eksakto kon unsay kinahanglan natong makat-unan.”
Ang mga sakop sa pamilyang Lighthall matag usa nagpataas og usa ka butang nga nakuha gikan sa mga abo sa ilang panimalay. Kini magsilbi nga pahinumdom sa mga panalangin sa Dios. Nagsulti kabahin sa sunog, si Rachel miingon, “Oo, kini mahagiton, ug kita nawad-an og daghan. Apan kita nakaangkon usab og daghan.”