“Pito ka mga Dalugdog Nagdahunog,” kapitulo 6 sa Mga Santos: Ang Sugilanon sa ang Simbahan ni Jesukristo sa Ulahing mga Adlaw, Volume 2, Walay dili Balaan nga Kamot, 1846–1893 (2019)
Kapitulo 6: “Pito ka mga Dalogdog Nagdahunog”
Kapitulo 6
Pito ka mga Dalogdog Nagdahunog
Sa tinglarag sa 1847, si Oliver Cowdery nagpuyo kauban sa iyang asawa, si Elizabeth Ann, ug sa ilang anak nga babaye nga si Maria Louise sa usa ka gamay nga lungsod sa Teritoryo sa Wisconsin, duol sa lima ka gatus ka milya [duol sa 800 ka kilometro] gikan sa Winter Quarters. Kwarentay uno ka tuig ang iyang panuigon ug nagbansay sa pagka-abugado kauban sa iyang magulang nga lalaki. Hapit duha ka mga dekada ang milabay sukad si Oliver nakaserbisyo isip usa ka tigsulat ni Joseph Smith alang sa paghubad sa Basahon ni Mormon. Mituo gihapon siya sa gipahiuli nga ebanghelyo, bisan og sa milabay nga siyam ka mga tuig mipuyo siya layo gikan sa mga Santos.1
Si Phineas Young, magulang nga lalaki ni Brigham Young, naminyo ngadto sa manghud nga babaye ni Oliver nga si Lucy, ug ang duha ka mga lalaki suod nga mga higala ug kasagarang magbinayloay og mga sulat. Si Phineas kanunay nga nagpahibalo ni Oliver nga siya gihapon adunay lugar sa Simbahan.2
Ang ubang karaang mga higala mitabang usab ni Oliver. Si Sam Brannan, kanhiay nga apprentice sa opisina sa imprintahanan ni Oliver, midapit kaniya sa paglawig uban sa mga Santos diha sa Brooklyn. Si William Phelps, kinsa sa makausa mibiya kadali sa iyang kaugalingon sa Simbahan human sa panaglalis ni Joseph Smith, midapit usab ni Oliver sa pag-adto sa kasadpan. “Kon ikaw nagtuo nga kita Israel,” misulat si William, “dali ngari ug uban kanamo, ug makahimo kami og maayo kanimo.”3
Apan ang pagdumili ni Oliver midulot og lawom. Mituo siya nga si Thomas Marsh, Sidney Rigdon, ug ang ubang mga pangulo sa Simbahan mihimo ni Joseph ug sa halangdong konseho sa pagbatok kaniya sa Missouri. Ug siya nahadlok nga ang pagkadili madapigon sa Simbahan nakadaot sa iyang dungog taliwala sa mga Santos. Gusto niya nga sila mahinumdom sa maayong mga buhat nga iyang nahimo, ilabi na ang iyang bahin sa paghubad sa Basahon ni Mormon ug ang pagphiuli sa pagkapari.4
“Sensitibo ko kabahin niini nga hilisgutan,” misulat siya makausa ni Phineas. “Maana ka ubos niini nga kahimtang, kon ikaw mibarug pa diha sa presensya ni Juan uban sa atong mibiya nga igsoong Joseph, aron sa pagdawat sa ubos nga pagkapari, ug diha sa presensya ni Pedro, aron sa pagdawat sa mas taas nga pagkapari.”5
Si Oliver dili usab sigurado kon ang Korum sa Napulog Duha aduna bay awtoridad sa pagdumala sa Simbahan. Mirespeto siya ni Brigham Young ug sa ubang mga apostoles nga iyang kaila, apan siya walay pagpamatuod nga sila gitawag sa Dios aron sa paggiya sa mga Santos. Sa pagka-karon, mituo siya nga ang Simbahan anaa sa walay pag-uswag nga kahimtang, naghulat og usa ka pangulo.
Sa Hulyo, mga duol sa panahon nga ang nag-una nga panon misulod sa Walog sa Salt Lake, ang kanhiay apostol William McLellin mibisita ni Oliver. Gusto ni William nga magsugod og bag-ong simbahan sa Missouri pinasubay sa gipahiuli nga ebanghelyo, ug siya milaum nga si Oliver mouban kaniya. Ang pagbisita miawhag ni Oliver sa pagsulat sa igsoong lalaki sa iyang asawa nga si David Whitmer, kauban nga saksi sa Basahon ni Mormon. Nahibalo si Oliver nga si William nagplano sa pagbisita usab ni David, ug gusto siyang mahibalo kon unsay hunahuna ni David mahitungod ni William ug sa iyang buhat.6
Mitubag si David human sa unom ka semana, nagpahibalo nga si William sa tinuod mibisita kaniya. “Among gitukod, o misugod sa pagtukod, sa simbahan ni Kristo pag-usab,” mi-anunsyo si David, “ug kini pagbuot sa Dios nga ikaw mahimong usa sa akong mga tigtambag diha sa kapangulohan sa simbahan.”7
Gihunahuna ni Oliver ang tanyag. Ang pagtukod og bag-ong kapangulohan sa simbahan uban ni David ug William diha sa Missouri mohatag kaniya og lain nga higayon sa pagsangyaw sa gipahiuli nga ebanghelyo. Apan parehas ba kini sa ebanghelyo nga iyang gidawat kaniadtong 1829? Ug si David ug William aduna bay awtoridad gikan sa Dios sa pagtukod og usa ka bag-ong simbahan?8
Sayo sa buntag kaniadtong Oktubre 19, 1847, ang mga apostoles nga si Wilford Woodruff ug Amasa Lyman nakakita og pito ka mga lalaki nga migula gikan sa layo nga nagkatag nga mga kahoy. Sa kasagaran, ang mga estranghero diha sa dalan-dalan dili kahadlokan. Apan ang kalit nga pagpakita niini nga mga lalaki nakapakuyaw ni Wilford.
Sulod sa katapusang duha ka mga adlaw, siya ug si Amasa kanunay nga nangayam og kabaw uban sa daghang nga mga lalaki aron sa pagpakaon sa nanlimbasug nga mibalik nga panon ni Brigham Young. Ang Winter Quarters, ang ilang padulngan, sobra pa sa usa ka semana ang gidugayon sa pagbiyahe. Kon walay karne sa kabaw nga gisulod ngadto sa tulo ka mga karomata sa mga nangayam, ang panon malisuran og maayo sa paghuman sa biyahe. Daghan kanila nasakit na.9
Gitan-aw sa mga apostoles og maayo ang mga estranghero, naghunahuna sa sinugdan kon sila mga Indian ba. Apan samtang ang mga dagway mas nagkaduol, nakita sa mga apostoles nga sila puti nga mga tawo—tingali mga sundalo—nga nagkabayo. Ug sila migukod og kusog sa nangayam nga grupo.
Si Wilford ug ang mga nangayam mikuha sa ilang mga hinagiban sa pagdepensa. Apan sa dihang naduol na ang mga estranghero, nasorpresa si Wilford ug nalipay nga nakakita sa nawong ni Hosea Stout, ang hepe sa kapulisan sa Winter Quarters. Ang mga Santos sa Winter Quarters nakahibalo mahitungod sa nawad-an og paglaum sa kalisud sa mibalik nga panon, ug si Hosea ug ang iyang mga tawo gipadala aron sa paghatag og mga tagana alang sa mga mibiyahe ug sa ilang mga hayop.10
Ang hinabang nakapadasig sa mibalik nga panon, ug sila mipadayon sa unahan. Sa Oktubre 31, sa dihang sila mga usa ka milya gikan sa pamuy-anan, misignal si Brigham sa iyang panon sa paghunong ug sa pagpundok. Ang malisud nga adlaw sa pagbiyahe hapit na mahuman, ug ang mga lalaki naghinam-hinam nga makakita sa ilang mga pamilya, apan gusto niya nga mosulti og pipila ka mga pulong sa dili pa sila magbulag.
“Salamat sa inyong kalooy ug sa pagkaandam sa pagsunod sa mga sugo,” miingon siya. Sobra og gamay sa unom ka mga bulan, nakabiyahe sila og labaw sa duha ka libo ka mga milya [3200 ka kilometro] nga walay dako nga mga aksidente ug walay namatay. “Kita nakatuman labaw pa kay sa atong gidahum,” mipahayag si Brigham. “Ang mga panalangin sa Ginoo nag-uban kanato.”11
Gibuhian niya ang mga lalaki, ug sila mibalik ngadto sa ilang mga karomata. Ang panon dayon mipadagan sa nahibiling milya ngadto sa Winter Quarters. Samtang ang mga karomata nagligid ngadto sa pamuy-anan sa hapit na mosalop ang adlaw, ang mga Santos nanggula gikan sa ilang mga payag nga troso ug mga balongbalong aron sa pag-abi-abi og balik sa mga lalaki. Mga pundok naglinya sa daplin sa mga dalan aron sa paglamano kanila ug pagmaya sa tanan nga ilang natuman ubos sa naggiya nga kamot sa Ginoo.12
Nanobra ang kalipay ni Wilford sa pagkakita niya og balik sa iyang asawa ug mga anak. Sa milabay nga tulo ka mga adlaw, nanganak si Phebe og himsog nga batang babaye. Karon ang mga Woodruff adunay upat ka buhing mga anak: si Willy, Phebe Amelia, Susan, ug ang bag-ong natawo nga si Shuah. May usa usab ka anak nga lalaki si Wilford, si James, sa iyang dinaghang asawa, si Mary Ann Jackson, kinsa iyang giminyoan sa wala madugay human siya mibalik gikan sa Inglatera. Si Mary Ann ug si James mas unang miadto ngadto sa Walog sa Salt Lake nianang tuiga kauban sa amahan ni Wilford.
“Ang tanan madasigon og malipayon,” misulat si Wilford kabahin sa iyang pagpauli, “ug gibati namo kini nga usa ka panalangin nga nagkita pag-usab.”13
Nianang tingtugnaw, ang siyam ka mga apostoles sa Winter Quarters ug ang naglibut nga mga pamuy-anan kasagaran nga nagtinambagay. Atol niini nga mga miting, ang kaugmaon sa korum nakabug-at og maayo sa hunahuna ni Brigham. Sa pagbiyahe og balik gikan sa Walog sa Salt Lake, ang Espiritu mipadayag ngadto ni Brigham nga ang Ginoo gusto nga ang Napulog Duha mag-organisar og balik sa Unang Kapangulohan aron ang mga apostoles mahimong libre sa pagsangyaw sa ebanghelyo ni Jesukristo sa tibuok kalibutan.14
Si Brigham dugay nang nagdumili sa pagsulti ngadto sa korum mahitungod sa hilisgutan. Nakasabut siya nga ang iyang mga responsibilidad isip presidente sa Napulog Duha nagpalain kaniya gikan sa ubang mga apostoles, naghatag kaniya og awtoridad sa pagdawat og pagpadayag alang sa korum ug sa matag usa sulod sa pagkatinugyanan niini.
Apan nasabtan usab niya nga dili siya makalihok nga mag-inusara. Ang Ginoo mipadayag kaniadtong 1835 nga ang Napulog Duha gikinahanglang magkahiusa sa paghimo og mga desisyon o dili na lang. Pinaagi sa balaang direksyon, ang mga apostoles gikinahanglan nga molihok “diha sa tanang pagkamatarung, kabalaan, ug kamapainubsanon sa kasingkasing” kon maghimo og mga desisyon. Kon magbuhat sila og bisan unsa isip usa ka korum, gikinahanglan silang magpundok diha sa panaghiusa ug panag-uyon.15
Kaniadtong Nobyembre 30, sa katapusan misulti si Brigham mahitungod sa pag-organisar og balik sa Unang Kapangulohan, nasiguro nga kini mao ang kabubut-on sa Ginoo nga mopadayon sa unahan. Diha-diha si Orson Pratt misupak sa panginahanglan og kausaban. “Gusto kong makita ang Napulog Duha nga mag-uban sa hingpit ug panaghiusa,” miingon siya.
Mituo si Orson nga ang Napulog Duha makagiya sa Simbahan sa pagkawalay sa Unang Kapangulohan tungod kay usa ka pagpadayag mipahayag nga ang duha ka mga korum managsama og awtoridad. Gitudlo usab ni propeta Joseph Smith nga ang kinadaghanan sa Napulog Duha makahimo og may awtoridad nga mga desisyon kon ang tibuok nga korum wala diha. Alang ni Orson, kini nagpasabut nga pito ka mga apostoles makapuyo sa mga punoang buhatan sa Simbahan aron sa pagdumala sa mga Santos samtang ang nahibiling lima modala sa ebanghelyo ngadto sa mga kanasuran.16
Gipamati ni Brigham si Orson, apan gisupak niya ang iyang panapos. “Hain ang mas maayo,” nangutana si Brigham, “ang pagbadbad sa higot sa tiil sa Napulog Duha ug sa pagpaadto kanila ngadto sa mga kanasuran, o sa kanunay ipabilin ang pito sa panimalay?”
“Kini akong pagbati,” miingon si Orson, “kinahanglan dili tulo ka miyembro ang Unang Kapangulohan, apan ang Napulog Duha mao ang Unang Kapangulohan.”17
Samtang nagsultihanay si Orson ug Brigham, gihunahuna ni Wilford ang problema. Andam siya nga mopaluyo og usa ka bag-ong Unang Kapangulohan kon kini mao ang gipadayag nga kabubut-on sa Ginoo. Apan nabalaka usab siya sa mga sangputanan sa kausaban. Kon tulo sa Napulog Duha moporma og Unang Kapangulohan, ang bag-ong tulo ka mga apostoles pagatawgon ba aron sa pagpuli sa ilang lugar diha sa korum? Ug sa unsa nga paagi ang pag-organisar og balik sa kapangulohan makaapekto sa tahas sa Napulog Duha diha sa Simbahan?
Sa pagka-karon, gusto niya sa Napulog Duha sa pagpadayon ingon nga sila mao sa kaniadto. Ang pagbulag sa korum mahisama sa pagputol sa usa ka lawas ngadto sa duha.18
Ang mga kabukiran nga nagliyok sa Walog sa Salt Lake ingon og nakadakop og kalayo sa tinglarag sa 1847 tungod kay ang ilang mga kadahunan nausab ngadto sa hayag nga mga kolor sa pula, dalag, ug kapihon. Gikan sa diin nagkampo ang iyang pamilya taliwala sa ubang mga Santos diha sa hut-ong sa templo, si Jane Manning James makakita sa kadaghanan sa mga kabukiran ug sa daghang mga bag-ong pamuy-anan sa mga Santos, nga ilang gisugdan sa pagtawag og Siyudad sa Great Salt Lake, o sa yano Siyudad sa Salt Lake. Mga usa ka milya habagatang kasadpan sa iyang tolda nahimutang ang usa ka kwadrado og porma nga kuta diin ang pipila sa mga Santos nagtukod og mga payag nga troso alang sa ilang mga pamilya. Tungod kay ang walog gamay og kakahoyan, gitukod nila kini nga mga gambalay sa kahoy gikan sa duol nga mga dal-og o gikan sa gahi nga adobe.19
Sa dihang miabut si Jane sa walog, ang mga Santos kinsa miuban sa nag-unang panon hapit na mahutdan og pagkaon. Ang mga bag-ong nangabut sama ni Jane adunay gamay nga mga tagana nga madaginot. Ang gatas sa kadaghanan sa mga baka diha sa walog miuga, ug ang mga kabakahan luya ug niwang. Si John Smith, ang bag-ong natudlo nga presidente sa Salt Lake Stake, nangulo sa halangdong konseho ug sa mga bishop sa paghatag alang sa tanan diha sa walog hangtud ang mga talamnon andam na sa pag-ani, apan gamay ra ang nangatulog nga busog.20
Apan bisan sa kakulang og pagkaon, ang pamuy-anan milambo og kusog. Mga babaye ug mga lalaki nagtinabangay sa pagtukod og mga panimalay ug sa paghimo sa ilang mga palibut nga hayahay. Ang mga lalaki mitungas sa mga dal-og aron sa pagpamutol og mga kahoy ug sa pagguyod niini ubos ngadto sa walog. Walay makina nga igagabas, ang matag troso kinahanglan nga tabason ngadto sa mga tabla pinaagi sa kamot. Ang mga atop gihimo gikan sa mga tukon ug uga nga sagbut. Ang mga bintana sa kasagaran gihimo gikan sa gilanahan nga papel imbis bildo.21
Niini nga panahon, ang kababayen-an sa Simbahan mipadayon sa inato nga panagpundok. Sila ni Elizabeth Ann Whitney ug Eliza Snow, kanhiay nga mga pangulo sa Relief Society sa Nauvoo, kasagaran nangulo og mga miting alang sa mga inahan ingon man alang sa batan-ong mga babaye ug gagmay nga batang mga babaye. Sama sa ilang gibuhat sa Winter Quarters, gibansay sa kababayen-an ang espiritwal nga mga gasa ug naglig-unay sa usag usa.22
Sama sa ubang mga Santos, si Jane ug ang iyang bana, si Isaac, nagtinabangay sa paghimo og panimalay diha sa walog. Ang anak nga lalaki ni Jane nga si Sylvester igo na ang pangidaron sa pagtabang sa mga buluhaton.23 Ug sa kanunay adunay butang nga mabuhat. Ang mga bata makatabang sa ilang mga inahan sa pagpanguha og ihalas nga mga parsnip, mga sampinit, ug mga gamot sa liryo sego aron sa pagdugang sa ilang nagkagamay nga mga tagana. Ang mga Santos dili makaako sa pag-usik og pagkaon. Kon mag-ihaw og baka, kan-on nila ang tanan kutob sa ilang mahimo, ulo ngadto sa koko.24
Misugod sa pagpangatagak ang nyebe sayo sa Nobyembre, nagtabon sa mga tumoy sa kabukiran og puti nga pulbos. Miubos ang temperatura diha sa walog, ug giandam sa mga Santos ang ilang mga kaugalingon alang sa unang tingtugnaw.25
Usa ka dag-umon nga adlaw sa hinapos sa Nobyembre, ang mga apostoles sa Winter Quarters nag-abut aron sa paghisgot ni Oliver Cowdery. Kadaghanan kanila nakaila kaniya sa Kirtland ug nakadungog sa iyang gamhanang pagpamatuod sa Basahon ni Mormon. Kauban ni David Whitmer ug Martin Harris, nakatabang siya ni propeta Joseph Smith sa pagtawag og pipila kanila ngadto sa Korum sa Napulog Duha ug nakatudlo kanila sa ilang mga responsibilidad. Gipaniguro usab ni Phineas Young nga si Oliver mipasalig ngadto sa Zion ug napahumok ang iyang kasingkasing ngadto sa Simbahan.26
Uban ni Willard Richards nga akting klerk, ang mga apostoles naghimo og sulat ngadto ni Oliver. “Dali,” misulat sila, “ug balik sa balay sa atong Amahan, gikan diin ikaw mibiya.” Naghulagway ni Oliver isip usa ka pinalanggang mausikong anak nga lalaki, gidapit siya aron magpabunyag pag-usab ug i-orden og balik ngadto sa pagkapari.
“Kon tinguha nimo ang pagserbisyo sa Dios uban sa imong tibuok kasingkasing ug mahimong tig-ambit sa mga panalangin sa celestial nga gingharian, buhata kining mga butanga,” mipahayag sila. “Ang imong kalag mapuno sa pagmaya.”
Gihatag nila ni Phineas ang sulat ug gihangyo siya sa paghatag niini og personal.27
Taudtaod, nakigtagbo si Brigham sa ubang walo ka apostoles didto sa panimalay ni Orson Hyde, kinsa nauli gikan sa iyang misyon sa Inglatera. “Gusto ko nga adunay desisyon,” miingon siya. “Sukad sa panahon nga ako ania sa Siyudad sa Great Salt Lake hangtud karon, ang mga panuktok sa Espiritu ngari kanako mao, ang Simbahan kinahanglan nga ma-organisar karon.” Mipamatuod siya nga ang korum gikinahanglan nga mopaluyo og Unang Kapangulohan aron sa pagdumala sa Simbahan aron nga ang mga apostoles makagiya sa misyonaryong paningkamot sa langyaw nga dapit.
“Gusto ko nga ang matag tawo mouyon sa lig-on nga pamahayag sa Ginoo. Pagkat-on lamang asa padulong ang Ginoo ug adto uban niana,” mitambag siya. “Ang usa ka elder kinsa mosukwahi sa sulog sa Espiritu motulisok sa iyang kaugalingong nawong.”
Si Heber Kimball ug Orson Hyde miuyon nga kini panahon na sa pag-organisar og balik sa Unang Kapangulohan. Apan si Orson Pratt sa makausa na usab mipahayag sa iyang kabalaka. Naguol siya nga ang Unang Kapangulohan dili mangayo og tambag gikan sa Korum sa Napulog Duha ug ang Napulog Duha tingali usab unya mosunod lang dayon ngadto sa awtoridad sa kapangulohan, modawat sa mga desisyon niini sa walay paghunahuna sa mga butang sa ilang mga kaugalingon mismo. Ang Simbahan naglihok og maayo ubos sa Napulog Duha, nangatarungan siya. Nganong karon usbon?28
Mihangyo si Brigham nga maminaw sa mga hunahuna sa matag sakop sa korum nga anaa. Sa miabut na ang iyang turno, mipakigbahin si Wilford Woodruff sa iyang mga pagpanuko mahitungod sa pagtukod og Unang Kapangulohan, apan mipahayag siya sa iyang pagkaandam sa pagduyog sa iyang kabubut-on ngadto sa Ginoo. “Ang atong presidente ingon og gitandog sa Espiritu,” miingon siya. “Nagbarug siya tali kanato ug sa Dios, ug ako dili buot nga mopugong kaniya.”29
“Ako dili gusto niining korum nga mabahin,” miingon og sunod si George A. Smith. Buot niyang ilangan ang iyang desisyon hangtud sigurado siya sa hunahuna sa Dios, apan andam siyang modawat sa kausaban. “Kon kini kabubut-on sa Ginoo nga kining paagiha kinahanglan nga buhaton,” mipahayag siya, “lubagon ko ang akong kaugalingon ngadto niini.”
“Ang akong mga pagbati sama gayud sa imo,” miingon si Brigham. “Dili ko buot nga mabahin ang atong mga pagbati o magkabulag pa labaw kay kanimo.” Bisan pa, nasayud siya sa kabubut-on sa Ginoo. “Kini ngari kanako sama sa pito ka mga dalugdog nga nagdahunog,” mipahayag siya. “Ang Dios nagdala kanato hain kita, ug kinahanglan natong buhaton kini.”30
Si Amasa Lyman ug Ezra Benson, ang duha ka labing bag-o nga mga apostoles, miuyon kaniya. “Gusto kong motabang sa Korum sa Napulog Duha,” miingon si Ezra, “ug buot kong magpabilin ngadto ni Igsoong Brigham.” Gitandi niya ang iyang kaugalingon ngadto sa usa ka makina sa galingan, kanunay nga andam sa paghimo sa iyang trabaho. Miingon siya nga hingpit siya nga andam sa paghimo sa Unang Kapangulohan nga mogiya kaniya ingon nga nakita sa Ginoo nga angay.
“Amen!” miingon ang daghang mga apostoles.
Mibarug si Orson Pratt. “Wala ako maghunahuna nga kita kinahanglan nga molihok ingon og mga makina,” miingon siya. “Kon kita pagadumalaon sa tanang sitwasyon niana nga paagi, kita walay luna sa labing minos sa pagtan-aw sa usa ka butang niini nga panan-aw.”31
“Kini importante karon nga ma-organisar ang Simbahan,” misulti si Brigham ngadto ni Orson. “Unsa ang atong gibuhat mao lamang ang pag-ayo sa unsay atong kinahanglan nga buhaton. Kon imo kaming pugngan , kita walay mabuhat bisan unsa.”32
Ang mga pulong ni Brigham mipabilin sa lawak, ug ang Espiritu Santo gibu-bu diha sa mga apostoles. Nasayud si Orson nga unsay gisulti ni Brigham tinuod.33 Gitugyan sa mga apostoles ang problema sa pag-organisar og balik ngadto sa botasyon, ug ang matag miyembro sa korum mipataas sa iyang kamot sa pagpaluyo ni Brigham Young isip ang presidente sa Ang Simbahan ni Jesukristo sa mga Santos sa Ulahing mga Adlaw.
“Isugyot nako nga itudlo ni Igsoong Young ang iyang duha ka mga magtatambag karong gabii,” miingon si Orson.34
Tulo ka mga semana ang milabay, sa Disyembre 27, 1847, mga liboan ka mga Santos gikan sa pamuy-anan buyon sa Suba sa Missouri nagpundok alang sa usa ka espesyal nga komperensya. Nagtukod sila og usa ka tabernakulo nga troso alang sa okasyon sa silangang bahin sa suba sa usa ka dapit nga sa kadugayan gitawag og Kanesville. Ang gambalay mas dako kay sa bisan hain nga payag nga troso diha sa dapit, apan dili kini makapasulod sa tanan kinsa buot nga motambong.
Sa sulod, ang mga Santos naghuot nga nanglingkod sa gahi nga mga bangko nga troso. Bisan og ang tingtugnaw ingon ka grabe ang kabugnaw, sa dihang miabut ang mga Santos diha sa tabernakulo nga troso ang panahon naahat og kamaayo. Sa miaging adlaw, misaad si Heber Kimball kanila nga kon sila motambong sa miting, maangkon nila ang usa sa labing nindot nga mga adlaw sukad ug usa ka kalayo mosiga nga dili gayud mapalong.35
Sa usa ka entablado diha sa atubangan sa lawak, milingkod ang mga apostoles uban sa halangdong konseho sa Winter Quarters. Gisugdan ang miting sa pagkanta ug pag-ampo, gisundan og mga sermon gikan sa pipila ka mga apostoles ug ubang mga pangulo sa Simbahan. Namulong si Orson Pratt mahitungod sa importansya sa Unang Kapangulohan.
“Miabut na ang panahon nga ang Napulog Duha kinahanglan gayud nga pagawason aron makaadto ngadto sa lain-laing dapit sa yuta,” miingon si Orson, nasiguro na karon ang kabubut-on sa Ginoo. “Kon walay Unang Kapangulohan, kini nagpugong pag-ayo sa Napulog Duha diha sa usa ka dapit.” Ang pag-organisar og usab sa kapangulohan, mipamatuod siya, mitugot sa Simbahan sa pagtan-aw ngadto sa lagyong mga bahin sa yuta, diin mga liboan sa mga katawhan naghulat alang sa ebanghelyo.36
Human sa mga sermon, kini gisugyot nga si Brigham Young pagapaluyohan isip presidente sa Simbahan. Dayon mipataas og dungan sa ilang mga kamot ang mga Santos sa pagpaluyo kaniya. Mibarug sa atubangan, misugyot si Brigham nga si Heber Kimball ug Willard Richards paluyohan isip iyang mga magtatambag.
“Kini usa sa labing malipayon nga mga adlaw sa akong kinabuhi,” gisultihan niya ang mga Santos. Ang dalan sa unahan dili sayon, apan isip pangulo sa mga Santos, iyang ihalad ang iyang kaugalingon sa hingpit sa pagtuman sa kabubut-on sa Ginoo.
“Akong buhaton ang matarung,” misaad siya. “Ingon sa Iyang imando, busa ako mobuhat.”37