Moarang-arang og Gamay Kada Adlaw
Ni Sister Joy D. Jones
Kinatibuk-ang Presidente sa Primary
Sa dihang bata pa ako, mitugtog ako og biyolin. Gusto ko niini nga motingog og nindot. Gusto ko nga motugtog alang sa akong mga ginikanan ug makasulti sila, “Oy, Joy, kanindot niana!” Apan wala kini motingog og nindot. Ni agik-ik kini!
Usahay kon dili ako magbansay, ang akong magtutudlo moingon, “Joy, nagpraktis ka ba niini nga semana?” Kini nakapahimo kanako sa pagbansay aron ako makatugtog og maayo inig ka sunod semana.
Sa paghinumdom, ang pagtugtog sa biyolin usa ka maayong kasinatian tungod kay kini malisud. Bisan tuod dili ako kanunay ganahan nga magbansay, daghan ako og nakat-unan gikan sa paghimo og tumong sa pagbansay og gamay matag adlaw.
Mao kana ang unsay akong gipanghinaut nga inyong pagabuhaton. Paningkamot sa pagbuhat og aran-arang og gamay kada adlaw. Ang Langitnong Amahan wala magpaabut kaninyo nga buhaton ang tanan dihadiha dayon. Ang kinabuhi mao ang pagkat-on ug pagtubo og gamay sa hinay-hinay. Siya gusto kaninyo nga magpadayon sa pagpaninguha. Ug Siya gusto nga kamo malipay sa pagtubo!
Usahay kita mopig-ot sa atong mga kaugalingon. Kita naghunahuna, “napakyas ako. Dili ako makahimo niini,” ug dayon kita moundang. Apan ang Manluluwas nag-ingon, “Padayon. Ania ra Ako dinhi aron sa pagtabang kaninyo!” Tungod ni Jesukristo, kita dili kinahanglan nga mobuhat niini nga mag-inusara. Kita makatindog ug makasulay pag-usab uban sa Iyang panabang. Mao kana kon unsa ang kinabuhi.
Kon adunay usa ka butang nga ako manghinaut nga inyong mahibaloan diha sa inyong kasingkasing, kini mao nga ang Langitnong Amahan naghigugma kaninyo. Tingali nag-atubang kamo og malisud nga mga butang, apan kamo giandam nga moanhi sa yuta niini nga panahon. Padayon lang sa pagpaninguha ug padayon sa pagpakigbahin sa inyong kahayag. Ang Langitnong Amahan mopanalangin ug mogiya kaninyo samtang kamo nagsunod sa dalan sa pakigsaad. ●