Mosabut ba Siya?
Paghulagway ni Allen Garns
Kaniadtong 2005, nanganak ako nga dili husto sa bulan og mga triplet: Milena, Mateo, ug Nelson. Si Milena natawo nga himsog, apan ang akong duha ka gagmay nga mga lalaki nag-antus og mga komplikasyon. Namatay si Mateo niadto nga mga komplikasyon tulo ka bulan human siya natawo.
Usa ka bulan human namatay si Mateo, si Nelson nahiling nga may cerebral palsy [dautan og koordinasyon sa mga ugat sa lawas tungod sa dala sa pagkatawo nga sakit sa utok], ug pagkabungol. Nahugno kami. Miingon ang doktor nga dili gayud siya makalakaw. Niana nga higayon, kami mapasalamaton alang sa among kahibalo sa ebanghelyo ni Jesukristo. Mitabang kini kanamo sa pagsabut kon nganong kami nagsinati og kalisdanan niini nga kinabuhi.
Pinaagi sa hugot nga pagtuo ug kakugi, si Nelson nakakat-on sa paglakaw ug sa pagpakigsulti pinaagi sa sinyas. Nakahimo siya og labaw pa ka maayo kay sa gitagna sa iyang mga doktor. Siya nagtubo nga malipayon diha sa among pamilya ug diha sa ebanghelyo.
Bisan pa sa iyang mga kakulangan, kami dihay pipila ka mga tumong alang ni Nelson: nga siya makasabut sa kahulugan sa bunyag sa dili pa siya mabunyagan, nga siya makadawat sa Aaronic nga Pagkapari sa edad nga 12, ug nga siya moadto sa templo aron mopahigayon og mga bunyag alang sa mga patay.
Sa 2017, si Nelson nag-12. Mitabang kami kaniya og andam sa pagpahigayon og mga bunyag alang sa mga patay. Kadto usa ka hagit alang kaniya sa pagsabut nga kadtong kinsa namatay nga walay bunyag nagkinahanglan sa atong tabang. Sa wala madugay human sa adlawng natawhan ni Nelson, siya, si Milena, ang iyang magulang nga mga igsoon nga si Franco ug Brenda, ug ubang kabatan-onan sa among ward miadto sa Templo sa Córdoba Argentina. Ang presidente sa templo miabi-abi kanila ug nakigsulti kanila mahitungod sa importansya sa pagpuli nga bunyag. Ako milingkod uban ni Nelson ug migamit og sinyas alang kaniya. Sa wala madugay, kini iya nang turno. Sa dihang siya nanaog ngadto sa bunyaganan, naghunahuna kami, makasabut ba gayud kaha siya?
Samtang miubog siya sa tubig, si Nelson nahimong emosyonal. Niana nga higayon, ang Espiritu Santo mipakita ngari kanamo nga siya sa tinuod nakasabut nga siya naghimo og usa ka butang alang sa iyang namatay nga mga katigulangan nga sila dili makahimo alang sa ilang mga kaugalingon. Kami nasayud nga siya nakasabut nga ang mga sakop sa pamilya sa pikas nga bahin sa tabil nalipay nga siya mitabang kanila. Ang Espiritu mipakita usab kanamo nga si Mateo didto aron sa pag-uban sa iyang igsoong lalaki ug igsoong babaye. Sa dihang si Nelson mikawas gikan sa tubig, malipayon kaayo siya.
Sukad niadto, si Nelson gibunyagan ug gikumpirmahan alang sa daghang mga sakop sa pamilya, lakip na ang akong amahan, kinsa namatay kaniadtong 2016. Gihigugma namo ang templo. Ang pagserbisyo didto nahimong usa sa among mga tradisyon sa pamilya. Matag higayon nga kami moadto, among mahinumduman kadtong espesyal nga adlaw.