Kabataan ug Kabatan-onan:Usa ka Pagtutok alang sa Matag Adlaw nga Kinabuhi
Gilitratohan ni Randy Collier
Tingali kini nakapatingala kaninyo nga ang Kabataan ug Kabatan-onan wala maglakip og detalyado nga mga lista sa matag tumong nga kinahanglan ninyong buhaton. Gibuhat na ninyo ang daghang talagsaong mga butang! Hinoon, kining gi-personal nga paagi gihimo sa pagtabang kaninyo nga mas maduol sa Manluluwas sa mga paagi nga gidasig sa inyong indibidwal nga mga panginahanglan ug mga interes.
Ang unang katuyoan sa Kabataan ug Kabatan-onan mao ang pagtabang kaninyo sa paglig-on sa inyong hugot nga pagtuo diha ni Jesukristo. Ang Lucas 2:52 nagtudlo kanato nga sa kabatan-onan ni Jesukristo, Siya “mitubo sa kaalam ug gidak-on, ug sa kahimuot sa Dios ug sa tawo.” Siya nagpuyo og balanse nga kinabuhi, ug kamo usab makahimo niana. Pinaagi sa pagtutok sa espiritwal, sosyal, pisikal ug intelektwal nga mga aspeto sa inyong kinabuhi, kamo mahimong mas mahisama sa Manluluwas.
Detalye gikan sa Beside Still Waters [Sa Linaw nga mga Tubig], ni Simon Dewey
Unsaon Niini Pagtrabaho
Ang Kabataan ug Kabatan-onan nag-awhag kaninyo sa pagpalambo sa espiritwal, sosyal, pisikal ug intelektwal nga paagi pinaagi sa pag-apil sa pagkat-on sa ebanghelyo, serbisyo ug mga kalihokan ug personal nga kalamboan.
Pagkat-on sa Ebanghelyo
Sama nga ang Manluluwas “mitubo sa kaalam” (Lucas 2:52), kamo makatubo sa inyong kahibalo ug pagsabut sa ebanghelyo. Matag baruganan sa ebanghelyo nga inyong makat-unan makatabang kaninyo nga mahibalo kon sa unsang paagi ang Manluluwas makalig-on ug makapanalangin kaninyo sa tanang bahin sa inyong kinabuhi.
Kita adunay daghang kapanguhaan nga atong magamit sa pagkat-on pa og dugang mahitungod sa mga baruganan sa ebanghelyo ug mahimong sama sa Manluluwas. Sama pananglit, ang pag-ampo, pagtuon sa kasulatan, ug ang Espiritu naghatag sa pundasyon. Ang inyong pamilya ug mga lider sa Simbahan makatabang kaninyo nga makakat-on pa og dugang mahitungod sa Manluluwas. Ang Dali, Sunod Kanako nga kurikulum ug seminary makatabang sa paggiya sa inyong pagtuon. Samtang gamiton ninyo ang inyong mga kapanguhaan sa pagkat-on mahitungod ni Jesukristo ug sa Iyang ebanghelyo, ang inyong relasyon Kaniya molambo.
Serbisyo ug mga Kalihokan
Ang pagserbisyo sa uban mao ang usa sa labing importante nga mga butang nga gibuhat sa Manluluwas samtang Siya dinhi pa sa yuta. Pinaagi sa pagpangita og yano ug natural nga mga paagi sa pagtabang niadtong anaa sa inyong pamilya ug komunidad, nagsunod kamo sa Iyang ehemplo ug nagpasalig nga mahimong mas mahisama Kaniya.
Ang makahuluganon nga mga kalihokan sa grupo makatabang kaninyo ug sa ubang mga kabatan-onan sa pagpangita og mga paagi sa pagserbisyo sa uban ingon man sa pagtubo og dungan sa espiritwal nga paagi. Ang makalingaw, makabayaw nga mga kalihokan mahimsog. Ug kon kamo magpundok isip usa ka grupo sa mga batan-on, matinud-anong Santos sa Ulahing mga Adlaw, kamo kasagaran makakat-on ug makatuman og mas daghan pa kay sa inyong mahimo sa inyong kaugalingon.
Personal nga Kalamboan
Ang Langitnong Amahan ug si Jesukristo nag-atiman og maayo mahitungod kaninyo ug mahitungod sa tawo nga kamo mahimo. Samtang kamo naghimo og mga tumong nga molambo ngadto sa tawo nga ang Langitnong Amahan gusto nga kamo mahimo, kamo mas maduol ngadto Kaniya ug sa Iyang Anak.
Ang matag usa lahi, busa ang inyong tumong sa pagpalambo sa personal nga paagi kinahanglang ipahaum sa inyong mga panginahanglan. Sama pananglit, kon kamo gusto nga makakat-on sa pagtugtog og himno diha sa piyano, kamo makahimo og tumong sa pagbansay sa matag adlaw. Kon kamo gusto nga mahimong mas maayo sa pagtuon sa kasulatan, kamo makahimo sa pagtakda og piho nga panahon sa matag adlaw sa pagbasa. Tinguhaa ang paggiya sa Espiritu sa paghimo og plano nga mohaum gayud alang kaninyo.
Ang Kabataan ug Kabatan-onan alang KANINYO
Ang tawo kinsa mao ang labing mahatagan og kaayohan mao kamo!! Samtang inyong gitakda ang inyong kaugalingon nga mga tumong sa pagtuon ug pagsunod sa ebanghelyo, apil og serbisyo ug mga kalihokan, ug pagpalambo sa personal nga paagi, makaila kamo og labaw pa sa inyong kaugalingon ug si kinsa gayud kamo. Ang buhat sa pagkahimong disipulo ni Jesukristo mahimong mahagiton, apan kini mao ang labing magantihon nga tumong nga atong mahimo alang sa atong mga kaugalingon.
Kaluha nga Managsoong Babaye Nagpalihok sa Kabataan ug Kabatan-onan
Ang kabatan-onan sama kaninyo nagsugod na sa pagkakita sa mga panalangin sa pagpaningkamot nga mahimong mas mahisama ni Jesukristo sa inadlaw-adlaw nilang mga kinabuhi. Danika ug Natasha R., 15, gikan sa Ohio, USA, mga kaluha nga managsoong babaye kinsa mihukom sa paghimo lamang niana gayud. Ang ilang papa gikan sa Thailand, ug tungod kay usahay sila mobisita sa pamilya didto, si Danika ug si Natasha mihukom nga sila gustong makakat-on og dugang mahitungod sa Thai nga pagkaon ug pinulongan.
Si Danika mihimo og tumong sa pagkat-on sa pagluto og pipila ka mga resipe sa Thai nga sabaw. Siya namalit alang sa mga sangkap ug nagbansay sa bag-ong paagi sa pagluto uban sa iyang papa. Si Natasha gusto nga makakat-on sa pagpakigsulti sa iyang pamilya didto sa Thailand, busa siya naghimo og tumong sa pagkat-on og usa ka bag-o nga pulong sa Thai matag adlaw. Siya migamit og usa ka website sa pagtabang sa iyang pagtuon sa pinulongan ug nagbansay sa paglitok sa mga pulong kauban sa iyang papa.
Samtang nagtrabaho si Danika ug si Natasha sa ilang mga tumong, sila gusto nga mopakigbahin sa unsay ilang nakat-unan ngadto sa ubang batan-ong mga babaye sa ilang ward. Ang ilang mga lider mitabang kanila sa pag-organisar og kalihokan sa pagkat-on og dugang mahitungod sa Thailand. Sa kalihokan, si Danika naghimo og sabaw alang sa tanan samtang si Natasha mitudlo kanila og pipila ka mga pulong sa Thai.
Giapil usab sa managsoong babaye ang ilang higala nga si Grace diha sa kalihokan. Si Grace adunay usa ka personal nga tumong nga mahimong mas maayong mamulong sa publiko, busa siya mihatag og pasundayag kon unsaon sa paggamit og chopstick aron sila makahigop sa ilang sabaw!
Pinaagi sa pagbansay sa ilang mga tumong ug pagtrabaho uban sa ilang mga lider ug sa ubang batan-ong mga babaye, si Danika ug si Natasha nakahimo sa pagplano og makalingaw nga gabii nga gikalipay uban sa ilang mga higala.
Panalangin sa Pag-apil sa mga Kabataan ug Kabatan-onan
Si Danika ug si Natasha mipakigbahin nga ilang nadawat ang daghang mga panalangin gikan sa pagpaningkamot sa pagkat-on og dugang mahitungod sa ilang kabilin ug sa pagsaulog niini uban sa ilang pamilya ug sa ubang batan-ong mga babaye. Ang ilang kasinatian wala moabut nga walay mga hagit. Si Natasha nagpasabut, “Ako anaa sa eskwelahan samtang ako nagkat-on og Thai, busa usahay lisud ang pagpangita og panahon sa pagbuhat niini.” Midugang si Danika, “Sa kalihokan, ako dihay gamay lang nga kalisud sa paghimo sa sabaw sa akong kaugalingon tungod kay ang akong papa wala diha.” Apan ang managsoong babaye nagkauyon nga sa katapusan, kini takus sa ilang paninguha.
Si Danika miingon, “Akong nagustuhan nga nakagahin ako og panahon uban ni papa, ug kini mitabang kanako sa pagbati og mas duol ngadto sa akong pamilya.” Mipasabut usab siya, “Ang paghimo ug ang pagtuman sa akong personal nga mga tumong mitabang kanako nga mas mapaduol kang Jesukristo pinaagi sa paghatag kanako og usa ka klaro nga dalan sa pagtabang sa akong kaugalingon ug sa uban. Kay sa magpundok magabii nga walay hinungdan, ako adunay han-ay sa sumbanan nga sundon ug buhaton, ug kana naghatag kanako og dugang nga panahon sa paghunahuna mahitungod ni Kristo.”
Miingon si Natasha nga ang paghimo ug ang pagtuman sa iyang mga tumong “nakahimo gyud kanako sa paghunahuna og lawom mahitungod sa unsay akong gikinahanglan ug gusto nga buhaton aron mahimong mas mapaduol ngadto ni Kristo.” Namatngunan usab niya nga bisan og nabalhin ang iyang pagtutok ngadto sa bag-ong tumong, siya nadasig sa pagpadayon sa pagkat-on og Thai: “Ang akong orihinal nga tumong mao ang pagkat-on og Thai aron ako maka-istorya ngadto sa akong pamilya sa Thailand, busa nagpadayon ako sa pagkat-on og Thai aron ako makasulti ngadto kanila.”
Ang balanse nga pamaagi ni Danika ug Natasha sa ilang personal nga kalamboan nakatabang kanila sa pagkat-on og dugang mahitungod sa kultura sa ilang papa, paglingaw-lingaw uban sa mga higala, ug sa pagpaduol pa sa ilang pamilya ug sa Manluluwas—ug kana mao unsa ang Kabataan ug Kabatan-onan.
Ang inyong pag-apil sa Kabataan ug Kabatan-onan makatabang usab kaninyo sa pagtukod og relasyon uban sa inyong pamilya, sa ubang kabatan-onan ug sa mga miyembro sa ward, ug ilabi na sa Manluluwas samtang kamo nagtutok kon unsaon sa paghimo sa inyong pinakamaayo nga kamo.