Usa ka Nindot Kaayong Bag-o nga Yugto
Paghulagway ni Carolyn Vibbert
Gitapos ko ang usa ka yugto sa akong kinabuhi sa dihang nabiyuda ako kaniadtong Oktubre 2010. Nianang panahona, nagtrabaho ako isip magtutudlo sa habagatan sa France. Usa ka aksidente sa trabaho nakakunhod sa akong paglihok, ug ako naguol nga dili nako dayon mabalik ang akong kahimsog ug kalig-on. Nakapahimulos ako og magantihong propesyonal nga kinabuhi sulod sa 11 ka tuig. Gimahal nako ang akong trabaho. Diha akoy daghang mga higala. Apan dili na nako mahimo ang mga gikinahanglan sa akong trabaho.
Kinahanglan gayud nga dawaton ko kana, human sa sobra sa 33 ka tuig sa pagsunod sa Pulong sa Kaalam, natingala ako kon nganong dili ako makahimo nga “modagan ug dili maluya” o “molakaw ug dili makuyapan” (tan-awa sa Doktrina ug mga Pakigsaad 89:20). Sa katapusan, ako kinahanglan nga mo-retiro og sayo kay sa gipaabut, nagtapos og laing yugto sa akong kinabuhi.
Nagpuyo ako kauban sa akong anak nga babaye sa dihang siya nakadawat og pahibalo nga ang iyang trabaho mopabalhin kaniya ngadto sa Paris. Mihukom ako nga kinahanglang mouban kaniya ug moabli og usa ka bag-ong yugto sa akong kinabuhi diha sa usa ka bag-ong dapit.
Wala madugay human sa pag-abut, kaming duha gitawag sa pagtrabaho sa Templo sa Paris France. Ang akong call sa pagserbisyo diha sa templo nanghimatuod ngari kanako nga ako anaa sa husto nga dapit sa husto nga panahon tungod kay ang Ginoo midala kanako dinhi. Ako nakakaplag og dakong kalipay sa pagserbisyo kanunay diha sa balay sa Ginoo, ug kini hilabihan kanindot nga ipakigbahin ang mga higayon diha sa templo ngadto sa akong anak nga babaye. Kini nagpuno sa akong kasingkasing og hingpit nga kalipay!
Karon, akong nakita ang dakong panalangin nga sa una wala maamguhi tungod sa kasakit nga gisinati. Ingon nga nakunhuran sa akong paglihok, dili makahimo sa paggamit sa akong propesyon, ug kinahanglan nga mo-retiro og sayo malisud. Apan nasayud ako nga ang atong Ginoong Jesukristo misuporta kanako. Mitabang siya kanako sa paghinayhinay ug sa pagpangita sa kapahulayan, paglaum ug kalinaw nga karon usa ka dakong bahin sa akong kinabuhi.
Matag higayon nga ako mosulod sa mga pultahan sa templo, gibati nako ang Espiritu Santo. Sa mga panahon sa kalisud uban sa tumang pamuwersa sa kalibutan ngari kanato, nindot kaayo kini nga masayud nga ang Ginoo naghatag kanato og balaang mga dapit diin ang tanan hapsay ug matahum. Akong gibati ang dili masukod nga pasalamat alang niining bag-o nga hugna sa pagserbisyo sa templo diha sa akong kinabuhi. Kini nindot kaayo!