Mekem Samting Wetem Fet
Stamba toktok blong yumi long yia ia i lukluk nomo long tufala toktok ia, “go mo mekem;” wan toktok we i tok stret we fetful profet blong Buk blong Momon, Nifae, i bin givim long 1 Nifae 3:7. Maet, pat ia we i gud tumas insaed long ves ia, i kam taem we Nifae i stap tijim se, oltaem, bae Lod i “mekem rere wan rod” blong wok blong Hem i kamtru.
Bilif ia, se God bae i mekem rere wan rod fastaem, i kamaot long wan ples we fet i bigwan long hem. Nifae i bin save se, sapos God i askem hem blong mekem wan samting, God bae i helpem tu blong mekem wok ia i kamtru. Mo yumi save se, from fet blong Nifae mo from tras we hem i gat long Lod, hem i bin save karembak ol buk we oli wokem long bras.
Olsem Nifae, yumi save gat fet blong “go mo mekem.” Maet bae yu no oltaem andastanem risen “from wanem” we i stap biaen long ol instraksen we i kam long ol lida blong Jos, o papa mo mama, o iven ol kwaet toktok we i kam long Tabu Spirit. Bae i no oltaem, we yu luk samting i foldaon stret, o bae i luk olsem se i no posibol nating blong mekem. Be “I no gat wan samting we i strong tumas, we God i no save mekem” (Luk 1:37) Taem yu tekem step i go fored wetem fet, bambae yu faenem se, oltaem, God i gat wan risen mo wan plan.
God bae i no save askem yu blong mekem wan samting we Hem i save se yu no save mekem. I simpol. Bae Hem i neva putum yu blong mekem samting we yu no save mekem. Be Hem i save askem yu blong mekem wan samting we i nidim wan strong fet, mo i nidim blong dipen long Spirit blong i lidim yu.
Ki ia, blong kasem fet ia blong “go mo mekem,” i blong developem fasin blong gat tras. Taem yu gat tras long Lod, yu gat tras ia se bae Hem i mekem yu yu naf blong mekem evri wok ia. Tingting long hemia—Oli bin sendem yu i kam long wol ia, long tetaem ia, from se yu yu rere mo yu gat paoa blong mekem wok blong Lod long ples ia mo naoia. Lod i bin jusum yu blong yu laef long taem naoia, from se Hem i trastem yu.
Olgeta blesing we yu kasem blong stap mekem samting wetem fet mo tras, oli bigwan tumas. Bae yu kam blong save aedentiti blong yu, mo stamba tingting blong yu long wan lukluk we i moa hae mo i luk moa long wan samting nomo; bambae yu gat moa tras long Jisas Kraes mo long Atonmen blong Hem; mo bambae yu kam blong save se, wetem help blong Lod, yu yu naf blong mekem samting.