Lihok diha sa Hugot nga Pagtuo
Ang atong tema karon nga tuig nagsentro sa mga pulong nga “moadto ug mobuhat,” usa ka isug nga pahayag nga gihatag pinaagi sa matinud-anong propeta sa Basahon ni Mormon nga si Nephi diha sa 1 Nephi 3:7. Apan tingali ang labing makahupay nga bahin niini nga bersikulo miabut sa dihang si Nephi nagtudlo nga ang Ginoo kanunay nga “moandam og paagi” aron ang Iyang buhat matuman.
Ang pagtuo nga ang Dios moandam og paagi alang kaninyo nagagikan sa usa ka dapit sa lawom nga hugot nga pagtuo. Si Nephi nasayud nga kon ang Dios mosugo kaniya sa pagbuhat og usa ka butang, ang Dios usab motabang kaniya sa pagtuman sa buluhaton. Ug kita nasayud nga tungod sa hugot nga pagtuo ug pagsalig ni Nephi diha sa Ginoo, siya nagmalampuson sa pagkuha sa mga palid nga tumbaga.
Sama ni Nephi, kita makabaton og hugot nga pagtuo nga “moadto ug mobuhat” Kamo tingali dili kanunay makasabut sa “ngano” luyo sa mga panudlo gikan sa mga lider sa Simbahan o sa mga ginikanan o gani sa mga pag-aghat sa Espiritu Santo. Kini dili kanunay masabut o gani ingon og dili gyud matuman. Apan “sa Dios walay butang nga dili mahimo” (Lucas 1:37). Samtang mopadayon kamo uban sa hugot nga pagtuo, inyong mahibaloan nga ang Dios kanunay adunay usa ka rason ug usa ka plano.
Ang Dios dili gayud mosugo kaninyo sa pagbuhat og usa ka butang nga Iyang nahibaloan nga dili ninyo mabuhat. Siya dili gayud mobutang kaninyo aron mapakyas. Apan Siya mahimong mosugo kaninyo sa pagbuhat og usa ka butang nga nagkinahanglan og hugot nga pagtuo ug pagsalig diha sa Espiritu alang sa paggiya.
Ang yawe sa pag-angkon og hugot nga pagtuo nga “moadto ug mobuhat” mao ang pagpalambo og pagsalig. Kon kamo adunay pagsalig diha sa Ginoo, kamo mosalig nga Siya motabang kaninyo sa pagtuman sa buluhaton. Hunahunaa kini—kamo gipadala dinhi sa yuta niini nga panahon tungod kay kamo andam ug makahimo sa pagbuhat sa buhat sa Ginoo dinhi ug karon. Kamo napili sa pagpuyo niini nga panahon tungod kay ang Ginoo misalig kaninyo.
Ang mga panalangin nga inyong nadawat sa pagbuhat uban sa hugot nga pagtuo ug pagsalig mga talagsaon. Kamo moabut nga makaila sa inyong pagkatawo ug katuyoan sa mas maayong paagi; madugangan ang inyong pagsalig diha ni Jesukristo ug sa Iyang Pag-ula; ug kamo masayud nga, uban sa tabang sa Ginoo, kamo igo na.