Ana Iteraniba te Aono
Tataekina te Euangkerio n Tainako. Kabonganai Taeka Ngkana e Riai
Tamana bon te kabanea n uarereke n aba n aban Kiribati, ngkai ae kinaaki bwa te Tautaeka ae Inaomata i Kiribati. Bon ti 4 te maire abwakina ao 0.5 rababana (6.4 x 0.8 kms) ao mweengaia aomata ae kee iaan 1000 mwaitiia.
E riaon te bubua te ririki n nako, mitinare mai Samoa a uota te Ekaretia ni Boreretanti nako Tamana. Ni karineakiia mitinare akanne, kain Tamana a karaoa te berita are e koreaki iaon te atibu ae kateaki. A berita bwa a na karaoa te aro ae ti teuana: te Kiribati Protestant Church, ke te KPC.
Ni karokoa te bong aei, Tamana e a tia ni karinea te berita anne, n aki butimwaiia mitinare man aro ake tabeua ao riki e ribotinaki bwa a na karebanaaki n te atiibu te aomata are e kataia n ruorikaaki man aia wanikiba. N Okitobwa 18 2020, Tamana e na bukamarua ana ka 150 n ririki te KPC ni katiteuanaaki.
N rongorongona aio, ngke Unimwaane ao Titita Brock mitinare ake a tabe ma te—humanitarian man ana Ekaretia Iesu Kristo ibukiia Aika Itiaki ni Boong aika Kaitira—a kaoaki nako Tamana, a rang kukurei ao a taratara raoi naba. Tera ngkana e bon koaua te rongorongo? Ngkai ngaiia kain te aro ae kaokoro, a na kona ni kaitara ma te kakaokoroaki anne? E riai bwa a na butimwaea te kaokao?
Kan ataakin te aba irouia Unimwaane ao Titita Brock ae Tamana e waaki ni moan rokoia iaon aia mition n te Tautaeka ae inaomata I Kiribati. Inanon rinanoan karikirake iaon te warebea ake a waakinaki, Titita Brock e noora ana bubuti Tamana ibukin 12 tangke ni karau ake a na kateaki.
E reiakinna neiei bwa te abamwakoro ae karako kaina mai Kiribati e rang ni mwakuri korakora n onorauiia 12 mwaneaban aia kaawa (autinibootaki) n te kaabwa. Teuana are e na karekea kabwaiaia man rauna ae te kaabwa bwa e na karekea nimaia te karau are a na kona ni kawawaea ao ni kawakinaki, anne bukina ngkai e kainnanoi 12 tangke ni karau. “Kain te kaawa ana kona [ngkanne] ni karekea te ran ae itiaki,” e taku Titita Brock, “ao a na aki raraoma n taari are e na rin inanon aia mwanibwa. E tara n nakoraoi te karikirake.”
Titita Brock e imeeri nakon ana tia Tei Tamana nakon te auti n Tei ni kakaea ngkana e bon kainnanoaki naba tangke, ao ni bairea te tai ni marooro. MP Tekeeua Tarati e waekoa ni kaeka.
Ni marooroia n aia katawanou Tekeeua e kabwarabwara rongorongon Tamana rimoa. Ngaia bon kain ana Ekaretia Iesu Kristo ibukiia aika Itiaki ni Boong aika Kaitira ae kakaonimaki, Tekeeua e kabwarabwara rikirakena iaon biken Tamana ao n taekina aron ana kaangaanga n riki bwa te tia tei man te aba ibukin kaokoron ana aro.
Ma e taraa ni marau nanoia kain Tamana. Ni moan te ririki 2019, e rootaki te abamwakoro n ana urubwai te angibuaka. “Te Ekaretia, e anga te ibuobuoki ibukin te kaangaanga,” e taekinna Titita Brock. Imwiin aki butimwaeana ibukin kaokoron te onimaki, te buoka e butimwaeaki n tokin te tai, ao te Ekaretia e waekoa ni kanakoa te kaibuke ae e onrake n bwaai. Te Ekaretia e karekea te reta ni kakaitau mairouia kain Tamana.
Imwain mwanangaia Unimwaane ao Titita Brock nako Tamana, Tekeeua e karaoi boowi ma taan kairiiri ni komiunitii n te abamwakoro. E kabwarabwara nakoia bwa te Brocks tiaki mitinare ake a kakawariia aomata, ma a ti tangiria ni karekea te reitaki ma Tamana bwa aonga ni kona ni waakina te mwakuri ibukin karaoan tangke ni karau. “Taan kairiiri a ikotaki ni marooro ao a titirakiniia kain te komiunitii ngkana a boutoka te roko,” e taku Titita Brock. “Te kamiimi, ni kabane a bane ni kariaia: ‘A kona n roko.’”
Ma teutana te nakonnano, te Brocks a katauraoi 2 aia kaintekateka mwauku aika boou, 2 oko ao bwainaoraki tabeua ao imwiina a kaea te kiba nako Tamana ae 2-aoana. “Ti kariaia bwa ti na aki uoti aia taeki mitinare,” e taku Titita Brock. N onean mwiina, e kabongana te aati ae rarangaaki are e karaoia ma ataeinnaine n te kaembwa ngke e Beretitenti irouia Ataeinnaine i Atlanta, Georgia. “I ataia bwa ngkana a noora te aati ae kanimwaki ma au kunnikai, a na ataia moa bwa ‘te tangira’ bon anne ae ti roko bukina.”
N aron are e riki, e korakora te tangira n itera aika uoua. Ngke a roko, a butimwaeaki raoi Brocks n te marae ni wanikiba ma mwae aika boiarara, moimoto ae mwaitoro ao te boutoka mairoun te mitinare n te tabo, te Mataniwi n aia bootaki n Taromauri, te kauntira n te Ekaretia, kain te kaawa ao bon te meia. N te wiiki are imwiina, Brocks a kaaitibo n tainako ma kain te Ekaretia n te tabo—iraorao, bukamaru, baka n amwarake ao n Taromauri ma ngaiia. N tokina a kiitana Tamana, ai aron kitanakiia aia utu.
Ngkai mitinare n te humanitarian, Unimwaane ao Titita Brock a maiuakina ana reirei Saint Francis mai Assisi: “Tataekina te euangkerio n taainako. Kabonganai taeka ngkana e riai.”
Titita Brock e kauringnga bwa karaoan te mwakuri n ibuobuoki, tangira, nanoanga ao te katiteuanaaki bon kaotan ana onimaki temanna. “Ti rang kakaitau ibukin te Tia Tei MP TekeeuaTarati ibukin kaoakira nako Tamana ni kaitiboaki ma aomata aika ai aron Kristo,” e taku. “I tataro bwa nanora ni kan anga te ran ae itiaki nakoia kain aia kaawa bon te buriiti n reitinako n te aro n iraorao ni Kiritian.”