Ana Iteraniba te Aono
Te Kamanoaki n Taian Umwantabu Bon Tibwangaia Aika Itiaki ni Boong aika Kaitira n Tatabemaniia
Rongorongo aika boou ni kainibaire ni kamanomano bon te kaeka nakon ‘aroarao aika bibitaki ni katobibia te aonaaba’.
Ana Ekaretia Iesu Kristo ibukiia Aika a Itiaki ni Boong aika Kaitira e a tia ni kaboui kainibaire ni buokiia ana taan kairiiri ao membwa n teimatoa ni kamanoaki ngkai a mena n ana kateitei te Ekaretia. “Aroaro aika a bibitaki ni katobibia te aonaaba” bon ngaia ae e karika te onoono aei, te Bitiobi n Tararua n te Ekarteia e koreia n te reta nakoia taan kairiiri n te Ekaretia.
“Kainibaire aikai a nanonaki bwa a na ibuobuoki n reireiniia taan kairiiri ao membwa n aroia bwa a na rikirake ni mano n ana kateitei te Ekaretia ao waaki ni kakukurei,” e taku te reta are e tiainaki iroun te Bitiobi n Tararua GéraldCaussé ao ana kauntira, Bitiobi Dean M. Davies ao Bitiobi W. Christopher Waddell. “Ti kaoia taan kairiiri bwa a na maroroakini ni uoote ao titeiki kauntira ao ni kabonganai n reireiniia membwa, ngkana e kainnanoaki, ni kaitarai raraoma n te tabo. Taan kairiiri a riai ni kabonganai kainibaire aikai n ae riai ao n atai tuan te tabo.”
Te kainibaire e kairiia aika Itiaki ni Boong aika Kaitira bwa ana katan iaoia taan tararuaa te rau n te tua ni bwaai aika karina ao ni katauraoi waaki tabeua ake a kona membwa ni karaoi ni karikirakea te kamanoaki. Aio e raonaki naba n ataakin bwaai ake irarikim, te tiku n rau, reitan te iraorao ao te karinerine nakoia iruwa nako, bwa a na aki maroa n ana kateitei te Ekaretia ao irakin ana wirikiriki te Tamnei ae Raoiroi ibukin te kairiiri ao te kamanomano. Te kainibaire e na buokiia naba taan kairiiri ni kaeka n ae tamaroa riki n taai inanon bootaki n nebo ngkana e uruanaki iroun temanna ke te kurubu.
Te kainibaire e irianaki ma reirei n arom bwa ko na kanga ni kaeka nakon te tia kakati ae waaki ke te tia tiritiri. Kaetieti aikai a taekinaki irouia taan tararuaa te rau n te tua ao kamanomano irouia taan rabakau man te bootaki ni kamanomano bwa waaki aika a na tau ibukin aroaro aikai. Taan kairiiri ao membwa a tuangaki n te Kaetieti bwa a na birinako, karabaia ke ana un, n tein te bwai are e riki.
Birinako. Waekoa birinako ngkana iai te kawai ae tauraoi. Karaoia n te tai ae waekoa n otinako bwa kona kamanoaki man te kateitei ke te tabo ae mano. Otinako ma te karaurau, bwa e na aki ataia te tia kaikoaki. Ikawai a na kakoaua bwa ni kabane ataei a tararuaki ao akea ae e bua. Tai okira te kateitei ke te aobiti ke te umwanreirei ibukin am bwai ae tiku. Tai uoti bwaai aika ana kaaireruakii bwa bwaai ni kaikoaki irouia taan tararuaa te rau n te tua.
Karabako. Ngkana ko aki kona ni birinako n te tabo ae mano, karabako mairoun te tia kaikoaki. Ngkana ko kona, kaina, rokanna ao tuuki mataroan te umwanreirei, aobiti ke ruu tabeua ake ko karabako iai. Tiringi taura, tiringa tangin te mobwaera tareboon, ao bwatokotoko nakon te timanti ni kararoai wintoo. Ngkana iai te kakati imarenaia taan kamatoai tuua ao taan kaikoaki, ni kabane n te kateitei a na tiku n aia ruu ae rokanaki ni karokoa a anganaki te kaetieti mai irouia taan tararuaa te rau.
Un. Ngkai bon te kabanea ni bwai, ngkana akea am tai ni birinako ke ni karabako, kaitara un ma te tia kaikoaki. Kabonganai bwaai ake a tauraoi n aron bwaai ni buaka, ao kaitara n un ni katoka te tia kaikoaki. Ngkana iai aika a mena ikekei, baireia bwa kam na katani ngkami.