O Le Lumanai o le Ekalesia: Sauniaina o le Lalolagi mo le Afio Faalua Mai o le Faaola
O Le Ekalesia a Iesu Keriso o le Au Paia o Aso e Gata Ai o loo saunia ai le lalolagi mo le aso o le a “tumu ai le lalolagi i le malamalama o Ieova” (Isaia 11:9).
I lo Tatou Malamalama, saunia e Jay Bryant Ward, e le mafai ona kopiina
O oe ma au e mafai ona auai i le Toefuataiga faifai pea o le talalelei a Iesu Keriso. E matagofie lava! E lei faia e se tagata! E mai le Alii, o le na fetalai, “O le a ou faanatinatiina la’u galuega i lona taimi.”(Mataupu Faavae ma Feagaiga 88:73). Ua faamamanaina lenei galuega i se folafolaga mamana na faia i le 200 tausaga ua mavae. E na o le iva lava ona upu: “O Lo’u Atalii Pele Lenei. Faalogo ia te Ia!” (tagai i le Iosefa Samita — Talafaasolopito 1:17).
I le tuleiga a le Atua Silisiliese, na faafeiloaia mai ai i lena faasilasilaga le taulealea o Iosefa Samita i le Alii o Iesu Keriso. O na lava upu e iva na amatalia ai le Toefuataiga mai o Lana talalelei. Aisea? Aua o lo tatou Atua soifua o se Atua e alofa! E finagalo foi o Ia ia maua e Ana fanau le tino ola pea ma le ola e faavavau! Sa faavaeina le galuega tele o aso e gata ai lea e avea ai i tatou o se vaega, i se faatulagaga, e faamanuia ai se lalolagi o loo faatalitali ma fetagisi.
E le mafai ona ou tautala e uiga i le Toefuataiga e aunoa ma le sagisagi fiafia. O lenei itu moni o le talafaasolopito e matua ofoofogia lava! E maoae! E faagaeetia! Pe le ofoofogia ea le o mai o avefeau mai le lagi e aumai le pule ma le mana mo lenei galuega?
O le taimi nei, o loo agai i luma le galuega a le Alii i Le Ekalesia a Iesu Keriso o le Au Paia o Aso e Gata Ai i se tulaga faanatinati. O le a i ai se lumanai tulaga ese o le Ekalesia, ma le le mafaatusalia. “O mea e lei vaaia e mata, e lei lagona foi e taliga, o mea ia ua saunia e le Atua mo i latou o e alolofa ia te ia” (1 Korinito 2:9; tagai foi Mataupu Faavae ma Feagaiga 76:10).
Ia manatua o le atoatoaga o le galuega a Keriso o loo i ai lea i le lumanai. E lei faataunuuina valoaga o Lona Afio Mai Faalua. Ua na ona tatou atiina ae i le faatumutumuga o lenei tisipenisione faaiu — pe a avea le Afio Mai Faalua o le Faaola o se mea moni.
Faapotopotoina o Isaraelu i Itu Uma e Lua o le Veli
O se faatomuaga tatau ai i lena Afio Mai Faalua o le faapotopotoina ua leva ona faatalitali i ai o Isaraelu ua faataapeapeina (tagai i le 1 Nifae 15:18; tagai foi i le itulau autu o le Tusi a Mamona). O lenei aoaoga faavae o le faapotopotoina, o se tasi o aoaoga taua O Le Ekalesia a Iesu Keriso o le Au Paia o Aso E Gata Ai. Ua folafola mai e le Alii: “Ou te tuu atu ia te outou se faailoga o le a ou faapotopoto mai ai lou nuu, le aiga o Isaraelu, mai lo latou faataapeapeina umi, ma toe faatuina ia te i latou lau Siona (3 Nifae 21:1).
E le gata ina tatou aoao atu lenei aoaoga faavae, ae tatou te auai foi i le faatinoina. Tatou te faia a o tatou fesoasoani e faapotopoto mai le au filifilia a le Alii i itu uma o le veli. O se vaega o le taunuuga fuafuaina o le lalolagi ma e o nonofo ai, o le a laveaiina ai o tatou aiga ua maliliu (tagai Mataupu Faavae ma Feagaiga 128:15). Ma le alofa mutimutivale, o le valaaulia e “o mai ia Keriso” (Iakopo 1:7; Moronae 10:32; Mataupu Faavae ma Feagaiga 20:59) e mafai foi ona tuuina atu ia i latou o e ua maliliu e aunoa ma se malamalama o le talalelei (tagai i le Mataupu Faavae ma Feagaiga 137:6–8). Ae peitai, o se vaega o la latou sauniuniga, e manaomia ai taumafaiga faalelalolagi a isi. Tatou te aoina mai pepa o le faasologa o gafa, fai pepa o talafaamaumau o le vaega faaleaiga, ma faia galuega sui mo le malumalu e faapotopoto mai ai tagata taitoatasi i le Alii, ma o latou aiga. (tagai 1 Korinito 15:29; 1 Peteru 4:6).
E paia i le Alii, saunia e Jay Bryant Ward, e le mafai ona kopiina
E tatau ona faamauina faatasi aiga mo le faavavau atoa (tagai i le Mataupu Faavae ma Feagaiga 2:2–3; 49:17; 138:48; Iosefa Samita — Talafaasolopito 1:39). O se sootaga malosi o le a fausia i le va o tama ma fanau. I o tatou taimi, o se tuufaatasiga atoa, faamaeaina, ma atoatoa o tisipenisione uma, ki, ma mana e tatau ona sosoo faatasi (tagai Mataupu Faavae ma Feagaiga 128:18). Mo nei faamoemoega paia, ua anoanoai ai nei malumalu paia i le lalolagi. Ou te toe faamamafa atu faapea o le fauina o nei malumalu atonu e le suia ai lou olaga, ae o lau auaunaga i totonu o le malumalu o le a mautinoa lava le suia ai o lou olaga.
O le a oo mai le taimi o le a vavae ese ai i latou o e e le usitai i le Alii mai ia i latou o e faia le usiusitai (tagai Mataupu Faavae ma Feagaiga 86:1–7). O lo tatou inisiua sili ona saogalemu o le faaauau pea ona agavaa mo le ulufale atu i Lona maota paia. O le meaalofa aupito sili e mafai ona e tuuina atu i le Alii o le tausia lea o oe lava ia le pisia mai le lalolagi, ma agavaa e auai atu i Lona maota paia. O Lana meaalofa ia te oe o le filemu ma le saogalemu o le iloa ua e agavaa e feiloai ia te Ia, pe a oo mai lena taimi.
E faaopoopo atu i galuega o le malumalu, o le oo mai o le Tusi a Mamona o se faailoga lea i le lalolagi atoa ua amata e le Alii ona faapotopoto Isaraelu ma faataunuu feagaiga na Ia faia ia Aperaamo, Isaako, ma Iakopo (tagai i le Kenese 12:2–3; 3 Nifae 21; 29). Ua folafola mai e le Tusi a Mamona le aoaoga faavae o le faapotopotoina (tagai, mo se faataitaiga, 1 Nifae 10:14). E mafua ai ona aoao tagata e uiga ia Iesu Keriso, e talitonu i Lana talalelei, ma auai i Lana Ekalesia. O le mea moni, afai e leai se Tusi a Mamona, o le a le tupu le faapotopotoina folafolaina o Isaraelu.
E taua foi le galuega faafaifeautalai i lena faapotopotoga. Ma ua faapena foi ona o atu auauna a le Alii e folafola atu le Toefuataiga. I le tele o atunuu, na saili ai e o tatou tagata ma faifeautalai ia na tagata Isaraelu ua faataapeapeina; ua latou saili atu mo i latou mai “mavaevae o papa” (Ieremia 16:16); ma ua latou fagogota mo i latou, e pei o aso anamua.
O le galuega faafaifeautalai e fesootai ai tagata i le feagaiga na osia e le Alii ma Aperaamo anamua:
“Ma o le a avea oe ma se faamanuiaga i au fanau e mulimuli mai pe a mavae atu oe, ina ia latou tauaveina i o latou lima lenei auaunaga ma lePerisitua i atunuu uma;
“Ma o le a Ou faamanuiaina i latou e ala i loʼu igoa; ona o le toatele e taliaina lenei Talalelei o le a taʼua i lou igoa, ma o le a faitauina o au fanau, ma o le a tutu aʼe ma faamanuia ia te oe, o lo latou tamā” (Aperaamo 2:9–10).
O le galuega faafaifeautalai ua na o se amataga lea o le faamanuiaga. O le faataunuuina, le faamaeaina, o na faamanuiaga e oo mai e pei o i latou ua ulu ifo i le vai o le papatisoga, ua faaatoatoaina o latou ola i le tulaga ina ia mafai ai ona latou ulu atu i le malumalu paia. O le mauaina o se faaeega paia e faamaufaailogaina ai tagata o le Ekalesia i le feagaiga faa-Aperaamo.
O le filifiliga e o mai ia Keriso e le o se tulaga tau i se nofoaga faaletino; ae o le tulaga tau i le tautinoga faaletagata lava ia. E mafai e tagata uma o le Ekalesia ona maua aoaoga faavae, sauniga, ki o le perisitua, ma faamanuiaga o le talalelei, e tusa lava po o a o latou nofoaga. E mafai ona “aumaia [tagata] i le malamalama o le Alii” (3 Nifae 20:13) e aunoa ma le tuua o o latou lava atunuu moni.
E moni, i aso popofou o le Ekalesia, o le liliu mai sa masani lava o lona uiga o le femalagaai foi lea. Peitai, i le taimi nei o loo ua faatino le faapotopotoina i totonu o atunuu taitasi. Ua poloaiina e le Alii le faatuina o Siona (tagai Mataupu Faavae ma Feagaiga 6:6; 11:6) i itulagi taitasi na Ia tuuina i Ana Au Paia e fananau mai ai ma o latou tagatanuu. O le nofoaga mo le faapotopotoina o le Au Paia i Pasila o loo i Pasila lava; o le nofoaga mo le faapotopotoina o le Au Paia i Nigeria o Nigeria lava; o le nofoaga mo le faapotopotoina o le Au Paia i Korea o Korea lava. O Siona o ‘e ua loto mama’ (Mataupu Faavae ma Feagaiga 97:21). O Siona o soo se mea lava e i ai le Au Paia amiotonu.
O le saogalemu faaleagaga o le a faalagolago e le aunoa i le pe faapefea ona ola le tagata, e le po o fea e nofo ai. Ou te folafola atu afai o le a tatou faia le mea sili e faaaoga ai le faatuatua ia Iesu Keriso ma maua le mana o Lana Togiola e ala i le salamo, o le a tatou maua le malamalama ma le mana o le Atua e fesoasoani ai ia i tatou e tauave faamanuiaga o le talalelei toefuataiina a Iesu Keriso i atunuu uma , ituaiga, gagana, ma tagata ma saunia le lalolagi mo le Afio Faalua Mai o le Alii.
O Le Afio Faalua Mai
O le a toe afio mai le Alii i le laueleele lea na Ia faapaiaina i Lana misiona iina i le olaga nei. I le manumalo, o le a Ia toe afio mai i Ierusalema. I ofutalaloa tautupu o le lanumumu e faatusa i Lona toto, lea na puna mai pu afu uma, o le a toe foi atu o Ia i le Aai Paia (tagai Mataupu Faavae ma Feagaiga 133:46–48). O iina ma i soo se mea, “ona faaalia mai ai lea o le pupula o Ieova, e vaaia lava e tagata uma faatasi” (Isaia 40:5; tagai foi Mataupu Faavae ma Feagaiga 101:23). “E igoa foi o Ia, o Le Silisili Ese, o Le Faipule, o Le Atua Malosi, o Le Tama o le faavavau, o Le Alii o le Filemu” (Isaiah 9:6).
O le a Ia faatautaia mai le lua laumua o le lalolagi: o le toatasi i Ierusalema Tuai (tagai Sakaria 14) ma le isi i Ierusalema Fou “ua fausia i luga o le konetineta o Amerika” (mataupu faavae o le Faatuatua 1:10). Mai nei nofoaga autu o le a Ia taitaia ai mataupu tau i Lana Ekalesia ma le malo. O le a i ai se isi malumalu e fausia i Ierusalema. Mai i lena malumalu o le a Ia nofotupu ai e faavavau o le Alii o Alii. O le a puna le vai mai lalo o le malumalu. O le a faamaloloina vai o le Sami Mate. (Tagai Esekielu 47: 1–8.)
I lena aso o le a Ia tauaveina ai ni faalagiga fou ma siosiomia e Au Paia faapitoa. O le a lauiloa o Ia o le “Alii o alii ma le Tupu o tupu: o i latou [o le a] faatasi ma ia [o i latou ia o e] valaauina, ma filifilia, ma faamaoni” (Faaaliga 17:14) i lo latou faatuatuaga o loo i ai iinei i le olaga nei. Ona Ia “nofotupu ai lea e faavavau” (Faaaliga 11:15).
O le a toe faafoi atu le lalolagi i lona tulaga faaparataiso ma faia ia faafouina. O le a i ai se lagi fou ma se lalolagi fou (tagai i le Faaaliga 21:1; Eteru 13:9; Mataupu Faavae ma Feagaiga 29:23–24).
O lo tatou tiute — o lo tatou avanoa lenei — e fesoasoani e saunia ai le lalolagi mo lena aso.
Fafaga i au mamoe, saunia e Jay Bryant Ward, e le mafai ona kopiina
Saunia ma le Faatuatua mo le Lumanai
O le taimi lea, iinei ma le taimi nei, ua tatou ola i se vaitaimi faigata. O mafuie ma galulolo ua afua ai faatafunaga, ua faaletonu faigamalo, ua ogaoga tele le atuatuvale ona o le tamaoaiga, ua osofaia le aiga, ma ua tele faaipoipoga e tatalaina. Ua i ai se pogai tele tatou te popole ai. Ae e le tatau ona tatou faatagaina o tatou popolega e suitulaga i lo tatou faatuatua. E mafai ona tatou faafetoaia na popolega e ala i le faamalosia o lo tatou faatuatua.
Aisea tatou te manaomia ai se faatuatua le maluelue faapena? Aua foi o loo i luma atu aso faigata. I le lumanai, o le a seasea lava faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. Na lapatai mai le Aposetolo o Paulo e faapea, o aso e gata ai, o i latou o e mulimuli ma le filiga i le Alii “e sauaina i latou.” (2 Timoteo 3:12). O lena lava sauaga e mafai ona olopala ai oe seia e vaivai ma lemagagana, pe faaosofia ai foi oe ia e avea ma faataitaiga lelei ma lototele atili i lou olaga i aso uma.
O le ala e te taulimaina ai tofotofoga o le olaga, o se vaega o le atinaega o lou faatuatua. E oo mai le malosi pe a e manatua o loo i ai sou natura paia, o se tofi e le uma lona taua. Ua faamanatu mai e le Alii ia te oe, lau fanau, ma fanau a lau fanau, o oe o suli faatulafono, ma sa faapolopoloina oe i le lagi mo lou taimi ma le nofoaga faapitoa e te fanau mai ai, e te ola ae ai ma avea ma Ana ave fu’a ma tagata o le feagaiga. A o outou savavali i le ala o le amiotonu a le Alii, o le a faamanuiaina outou e faaauau pea i Lona agalelei ma avea ma se malamalama ma se faaola i Lona nuu(tagai Mataupu Faavae ma Feagaiga 86:8–11).
Faia soo se mea e faamalosia ai lou faatuatua ia Iesu Keriso, e ala i le faateleina o lou malamalama i aoaoga faavae ua aoaoina i Lana Ekalesia toefuataiina, ma e ala i le sailia ma le filiga o le upumoni. Taula i aoaoga faavae mama, o le a mafai ai ona e laa i luma ma le faatuatua ma le naunautaiga malosi ma faia ma le fiafia mea uma ua i ai i lou mana e faataunuu ai faamoemoega a le Alii.
O le a i ai ni ou aso o le a e matuai lotovaivai ai lava. O lea ia tatalo ai mo le malosi ia aua le fiu! O le mea e faanoanoa ai, o nisi na e manatu o ni au uo o le a faalataina oe. Ma o nisi o mea o le a foliga mai lava e le talafeagai.
E ui i lea ou te folafola atu ia te oe a o e mulimuli ia Iesu Keriso, o le a e maua le filemu tumau ma le olioli moni. A e tausia au feagaiga ma le faateleina o le maelega, ma a o e puipuia le Ekalesia ma le malo o le Atua i le lalolagi i le aso, o le a faamanuiaina oe e le Atua i le malosi ma le atamai e faataunuu ai mea na o tagata o le Ekalesia a Iesu Keriso o le Au Paia o Aso e Gata Ai e mafaia.
E tatau ona avea i tatou ma tufuga o le faatuatua o se tagata e toatasi i le Atua, faatuatua i le Alii o Iesu Keriso ma le faatuatua i Lana Ekalesia. E tatau ona tatou fausia ni aiga ma ia faamauina i malumalu paia. E tatau ona tatou fausia le Ekalesia ma le malo o le Atua i luga o le fogaeleele (tagai i le Mataio 6:33). E tatau ona tatou saunia mo lo tatou lava taunuuga faalelagi: mamalu, tino ola pea, ma ola e faavavau (tagai i le Roma 2:7; Mataupu Faavae ma Feagaiga 75:5).
Ou te molimau atu ma le lotomaualalo ia te outou faapea — e pei ona folafola mai e le Perofeta o Iosefa Samita — o le talalelei toefuataiina a Iesu Keriso “o le a agai atu ai i luma ma le lototoa, mamalu, ma le tutoatasi, seia oo lava ina oo atu i konetineta uma, asiasi i nuu taitasi, tafi ese atunuu uma, ma tau i taliga uma, seia faataunuuina faamoemoega o le Atua, ma o le a fetalai Ieova le Silisili lava ua maea le galuega” (History of the Church, 4:540).
O loo tatou i ai i le galuega a le Atua Silisili Ese. Ou te tatalo mo Ana faamanuiaga ia faatasi ma outou taitoatasi.