N na Kanga ni Katauraoi ibukin te Tembora i India

Iroun Yeshwanth Kosireddy

I rang tangiria n tainako ni kan nakon te tembora. Ngkai e a tia ni katanoata te burabeti te tembora i India, I a rang ingainga bwa nningai ae I kona iai ni karekei otenanti akanne ikai.

Ikawairake i India, ao ngai ao au utu bon taian Hindu. I otabwaniniaki n tainako ma te koaua are a rangi ni mwaiti atua aika a taromauriaki. Ngke I uarereke, iai naba raraou aika Kiritian. A tuangai ae ti temanna te Atua are e karika te aonaaba ao aomata ni kabane. I a moanna n titiraki bwa bukin tera I taromaurii atua aika a mwaiti, ngkai tabeman a kakoaua iroun ae tii temanna.

Ngke I mena n te kauarinan n reirei, E reke anuau tabeua aika a buakaka. I rang kabongana te moi manging, I akiako, ao au utu a rang un n anuau. Ngaia are I a mwaing ao I a waakina te maiu ae boou i Hyderabad, te kaawa ae bubura ae mwaiti iai te tabo ni mwakuri.

I a moanna n roroko te bwaranano ao ni maroa ibukin tein maiu. Ma n te bong teuana I a kaitibo ma mwaane aika uoman. A kabwarabwara bwa ngaiia mitinare man Ana Ekaretia Iesu Kristo ibukiia aika Itiaki ni Boong Aika Kaitira ao a tuangai taekan ana euangkerio Iesu Kristo. Ao I a manga reiakina riki taekan tii temanna te Atua, are e karika te baire ni kakukurei nakoia Natina ni kabane. Aia rongorongo e waekoa ni kaona nanou n te kukurei ao te kantaninga. I kan reiakina ae e mwaiti riki.

I a tia ngkai n riki bwa kain te Ekaretia inanon itiua te ririki. I a tia ni bitaki, I a tia ni kakoauai kakai inanon maiu, ao I a tia n reiakina ae mwaiti n taekan te euangkerio. I tangira te kimwareirei are e anganai. Ma iai riki teuana te mwakoro ae rang kakaawaki n te euangkerio are I tuai n rinanona—te tembora.

Man te tai are I moan reiakinan taekan te tembora, I tangiria ni kan nako ikekei ao n namakina te Tamnei, ni kabaeaki n akea tokina ma au utu, ao ni karaoa te berita ma te Uea. Ma bon akea tembora iaon India, ao e tuai n reke au tai ni mwamwananga nakon teuana. A rang mwaiti aika Itiaki ni Boong aika Kaitira iaon India ao ngai are ti tataro n tainako, ti aki mamatam, ao ti tataonannano ma te onimaki bwa n te bong teuana e na bon kateaki te tembora i India.

Inanona Eberi 2018 n te maungatabu ni kabuta, te Atua e kaekai ara tataro ngke e katanoata Beretitenti Russell M. Nelson bwa e na kateaki te tembora i Bengaluru, India. I bon aki kona ni mwaninga te tai anne. Te Tamnei e kaona nanou ma te kimwareirei ao matau ma rannimata n ana taeka te burabeti. I waekoa ni karabwa Tamau are i Karawa ibukin kaekaan ara tataro. Ao I a rang kukurei n tokin te tai n nooria man rinnako n te tembora inanon tabeua te ririki aika imwaira.

I rang ni kukukrei ao ni kakatonga n riki bwa te membwa n ana Ekaretia Iesu Kristo. I ataia bwa te Uea e kaoka te euangkerio ae koaua iaon te aonaaba aei rinanon ana burabeti Iotebwa Timiti. I ataia bwa te tembora bon te tabo are ti kona n rikirake iai ni kaan nakon te Atua, ni kabaeaki nakoia ara utu, ao n reiakina ae mwaiti riki iaon te kantaninga ibukira. Ao ngkai I tataninga katean te tembora ikai i India, I mwakuri korakora ni katauraoi bwa N na rin.

I tataro mwaaka ao n reiakina are I kona n taekan te tembora, taian berita ake N na karaoi, ao otenanti ake N na karekei ikekei.
I titirakiniia membwa ake tabeman ake a tia n nakon te tembora ibukin buokau bwa N na kanga ni katauraoi n te maiu n tamnei.
I a reiakina aron karaoan au katei riki n te utu bwa I aonga ni kona ni uotii araia au bakatibu nakon te tembora.
Ngkai Ia iriira te kiraati ibukin te katauraoi nakon te tembora.

I tangiria n tauraoi nakon te bong are I a kona iai n rin n te tembora ao ni karaoi bwa moanibwai inanon maiu. N na kataia n tainako n tau n rin bwa I aonga ni kona ni karekei kakabwaia ake a beritanaki, kairiiri, ao kaekaan nakon au tataro ake Ia tia n rang kakantaningai. I aki kona n taninga te bong anne.