Tataningaa te Berita
Natiu te aine e a tia ni kararoa man te Ekaretia, ma I ataia bwa e na bon kakabwaiaaki man bwaai ake e a tia n reiakinaki n taekan te euangkerio.
Kamataata n te Tamnei iroun Megan Schaugaard
Teniua te namwakaina imwain koron 21 au ririki, I bwabetitoaki n ikotaki ma tariu, tinau, ao ai natiu te mwaane ae waniua ana ririki. Inanon ririki, ti a tia ni kakaonimaki nakon te euangkerio n aki tabe ma ara kaangaanga aika mwaiti.
Ngke I mareaki ma kainabau, ti baireia bwa ti na tiku ni kakaonimaki inanon te Ekaretia. Ngke a reke natira, kainabau ao Ngai ti kataia n riki bwa kaaro aika a tamaroa ao n reireia te euangkerio inanon mweengara.
N te bong teuana I roko ni kaea te maungatabu ma natiu te aine ae teuana ana ririki. Inanon te maungatabu, te Itingaun n te Aono e taekina taekan katabeaia kaaro n reireia te euangkerio nakoia natiia. Ngkanne e karaoa te berita are iai mwiina ae korakora nakoiu. E taku: “Ngkana arona bwa, imwiin bwaai ni kabane are ko kona ni karaoia n reireia te euangkerio, temanna mairouia natim e kitana te Ekaretia, a na teimatoa ni kakabwaiaaki ibukin ururingan bwaai ake a tia n taneiai n rinanona n te mweenga.”
Ana taeka te Itingaun n te Aono e kaonai ma te kantaninga bukina bwa iai ai natiu mwaane ao ai natiu aine ake a tia ni kitana te Ekaretia. Ririki imwina natiu te aine, teuana ana ririki are I taua inanon baiu n tain te maungatabu anne, e kitana te Ekaretia ngke e koro 17 ana ririki. E kaaitibo ma temanna ae akea ana koaua ae matoatoa n te euangkerio, ao a mareaki. E aki roroko n te taromauri imwin anne.
Aio are e bon kamaraki irou. I titirakinai ni kaokioka te bwai ae ti karaoia ae bure. Ngai ma tamana ti a tia ni kataia ni kawakin tuua ao ni beku inanon te Ekaretia. Ti tangiriia natira ao ti tangira te kabanea n tamaroa bwa e na reke nakoia. Imwiin rannimata ao titiraki aika mwaiti, n tokina ti karaui nanora bwa natira a ikawai, a karaoa aia rinerine, ao aki kakoauai bwaai ake a reireiaki n te mweenga.
N akean te nakoraoi, e uruaki ana mare natiu te aine, ao e teimatoa n aki oki nakon te Ekaretia. Te bwai ae I kona ni karaoia bon uringan te berita are e na uringnga ao ni kakabwaiaaki ibukin bwaai ake a tia n reireinaki iai inanon te mweenga.
I reitinako n tataro ibukin natiu te aine. I rang n tangiria ma nanou ni kabane, ao e kamarakai nooran ana aki kakaonimaki nakon te Ekaretia. Ma I ataa anne, n aki ongea aki kororaoiu, bwaai ake I a tia n reireinna a bon eti ao a koaua. I ataia bwa Tamara are i Karawa e koaua ao n tangira ao bwa E kakauongo n ara tataro. N akea te nanououa i nanou, I ataia bwa ngkana I karaoa au itera, E na kaekai au tataro n te tai are E noora riaina.