Te Tautia N te Buaka Ieta ae Ninikoria
Bon akea temanna ae ninikoria ni kaeka te aobitia n te taanga ni buaka, ma te kamimi, e katea baina temanna te ataeinimwaane.
Kamataata n te tamnei iroun David Malan
N ririki aika bwakanako, I kaaina ana Wanikiba ni buaka te United States ni beku ibukin abau. N te tai ae waekoa I a kuneai ni mena n aia tabo ni kataneiai tautia aika boou i Texas, USA. E karaurau n nako te wiiki ngkai I teimatoa n rinanon bwaai aika a mwaiti are e na rinanona temanna ae e rin n te tabo ni kataneiai.
N te bong teuana ao I ira te boowi ae bubura ae kaaina e riaon 200 tautia aika taan buaka ieta, a bane n ira te kataneiai n ai arou. E waaki te boowi ma temanna te aobitia n te taanga ni buaka—are e aki toki n tatakarua ao n taekin bwaai aika a bubuaka—e takarua, “Iai temanna ae na kaitara au waaki ae I karaoi ikai?”
Eng, bon akea ae ninikoria ni kaeka, ma te kamimi, temanna te ataeinimwaane ae katea baina.
“Te tautia , teirake!” e takarua te aobitia. “Tera ae ko kaitara?”
Ti bane ni kakauongo ma nanora ngke e taetae ni kabaibati te ataeinimwaane, “I kaitarako ngkai ko bakanrerea aran au Tia Kamaiu. E uruaki iai nanou. N na bubutiko bwa ko na katokia.”
E mabu nanon te ruu. E taraia te aobitia ao e a titirakinna ngkanne bwa tera ana aro. Te tautia ae te tia buaka ieta e kakatonga n taekina, “Ngai kaain Ana Ekaretia Iesu Kristo ibukia Aika Itiaki ni Boong aika Kaitira!”
Te aobitia e karabwa te tautia ibukin ninikoriana n taetae, ao e reitinako te boowi. Te mwakuri aei e korakora rootakiu iai. I iangoia n taainako bwa I kan karekea te aekaki n ninikoria aei n aron ae reke iroun te tautia ae te tia buaka ieta.
Imwiin te tabo ni kataneiai ibukiia tautia aika boou ao kataneiai ibukin bwainaoraki, I a kamenaaki n te tabo ni wanikiba ni buaka ae mena i Colorado, USA. N te bong teuana, I karekea au reta mairoun tariu te karimoa ae e mwakuri i Biribin. E a tia ni kaaina te wanikiba ni buaka teuana te ririki imwaain ae I kaainna. E tuangai bwa e a tia ni kaaina te Ekaretia, ao e tangirai bwa N na kaitibo ma mitinare. I waekoa n uringa te bwai are I rinanona n te tabo ni kataneiai ibukiia tautia aika boou ma te tautia ae te tia buaka ieta ae ninikoria. Ngai ma buu ti kaitibo ma mitinare, ao n te tai ae waekoa ti a bwabetitoaki.
Tabeua te namwakaina imwiina, I tuangiia mitinare bwa a na kawara tariu ae karimwiiu. Ngaia ma buuna a tia naba ni bwabetitoaki. Ngai ma tariu a reke ngkai ara utu aika mwaiti ma tibura. Ti bane n tangira te Uea ao Ana Ekaretia.
I aki ataa aran te tautia are te tia buaka ieta. I aki te roko ni manga nooria imwiina, ma I kakaitau n aki toki ibukin ninikoriana n tei ibukin te bwai ae e ataia bwa e koaua.