Ngkana I Namakina te Mwamwanaaki n taekan te Ekaretia
Bukin tera I kitana te Ekaretia. Ao bukin tera I okira te Ekaretia.
Kamataata n te tamnei iroun Mark Smith
Tabeua te ririki n nako, I wareka te marooro iaon te bwai ni kanako rongorongo imarenaia uoman ngkoa toau n te mition. Aikai bon mwaane ae I rang tatangiria ao ni karineia.
A marooroakini titiraki ake irouiia n taekan te Ekaretia ao ana reirei. E waekoa n teretere bwa a tia ni kitana te Ekaretia ni kauoman. E bon kakuba ao e aki karauai. I tuai man ongoongo taekan tabeua bwaai ake a marooroakini. I namakinna bwa I riai n ataia ngkana iai koauan bwaai aikai. Ngaia are I moana taraan aia kauntaeka naake iai aia tabeaianga n taekan te Ekaretia.
Tabeua bwaai ake I wareki uoua te ririki imwina e karikai bwa N na titiraki n bwaai ni kabane n taekan te Ekaretia. Tabeman ake a rinanon aei a nanokawaki. A rawawata ibukin buan aia onimaki. I moanna n un. I namakinna bwa te Ekaretia e a tia ni mwamwanaai. I aki koaua bwa tera ae koaua ke antai ae N na onimakinna.
I aki kan nako n taromauri. I tuatua bwa N na kamotirawaaki man nakoau. Au reitaki ma kainabau, Cheri, ao au utu e a rootaki. I reitinako n roko n taromauri, ma bon ti ibukin aron tarakiu ao ni kataia n ikotiia au utu. Te Maiu e a bon mangao. I aki kona n namakina te Tamnei ao n titiraki ngkana I a tia ke I tuai n namakina raoi te Tamnei ae Raoiroi.
Ngke natiu te karimoa, Kayson, e nakon ana mitinare, I karika te un iaon te bwai ae e na riai n rang ni kakukurei. Imwiin uoua te ririki, angiia au utu a ataa te bwai are I rinanona. Ngke a bane n nako n te tembora ma Kayson ibukin ana moan tai, I aki mena ikekei.
Rinanon te taneiai ni kabane, I namakina te maroaa.
I karekea te boutoka mairouiia aomata ni kabane ake irarikiu
N te bong teuana a botaki tariu ni marooro ma ngai ibukin te bwai are I rinanona. I aki rang ni uringnga bwa tera ae a taekinna, ma I ataia bwa e karaoaki ibukin aia tangira ibukiu. Ngke ti marooro, I moanna n ataia bwa tera ae bua mairou. E riki bwa te bwai ni mwakuri ibukin te bitaki. Boni ngai ae N na riai ni katabua Kayson bwa te unimwaane. Boni ngai ae N na riai ni kairia rinanon te tembora. Boni ngai ae N na anganna ana kakabwaia te karo imwain nakona n ana mition. Taai aika moan kakawaki inanon maiuna aikanne a katauaki ibukiu bwa n na mena ikanne, ma tiaki te aomata temanna. I uringnga ngke I titirakinai, “Tera ae I karaoia?”
Tabeua te tai imwina, raoraou ae tamaroa e namakina te kaungaaki ni kaotai nakon temanna kaain ana beretitentii n te titeiki. Te mwaane ae akoi aei e ongora ma nanona nakon au karaki ao e taraa n ataa te bwai ae N na taekinna imwain ae I taekinna. Ti marooro inanon tabeua te aoa. Au karaki, au titiraki, rongorongo n aron te iango ake a kaoti nakoiu a bon tii teboo nakon ake a tia n tibwauai tabeman ma ngaia. I moanna n ataia bwa iai kaeka aika tamaroa nakon angiin au tabeainga ao angiina au titiraki, e ngae ngke a nako man te nano, a tia ni unikaki irouia aomata are nanoia bon uruan te onimaki.
A na bane au titiraki ao tabeaiangau ni waekoa ni kaekaaki? Aki, a bon aki. Ma nanou e bon marau tau n ataakin te koaua ae korakora: titiraki a tamaroa, ma tabeua titiraki a raka kakawakia nakon ake tabeua.1 E materaoi kabuakiia au utu ao teiu imatan te Atua ibukin tii tabeua titiraki ake a tuai kaekaaki? Ngke I iangoi moa titiraki ake a rang kakawaki ao ni karimoa onimakinan te Atua i nanou, I moanna ni kunei kaeka are e anganai te koaua bwa I a oki n te kawai ae eti.
Au beretitenti n te titeiki ao te bitiobi a kawarai naba. Bon taan ibuobuoki aika korakora nakoiu ao Cheri inanon tabeua taai aika a kaangaanga. E aki bwarananoia irou. Ngaiia ao au utu n iteran te rabuna aika uoua bon bwaai ni mwakuri inanon buokakiu. I kakoaua bwa Tamara are i Karawa e ataira ao e tangiriira. E katauraoiia aomata inanon maiura ngkana ti kainanoiia. Ti bon tii kainanoa te tauraoi ni kariaia aia ibuobuoki.
Tera ae Ko na Karaoia Ngke Arona Bwa Ngkoe
I ataia bwa iai tabeman n te aonaaba aei ake a rinanon naba bwaai n aron aikai. E na kona ae bon ngkoe ke temanna ae ko kinaa.
I ataia bwa te Tia Kamaiu e katea Ana Ekaretia ma te kariaiakaki ni katauraoi otenanti ao berita aika tabu ake ti kainanoi n oki Nakoina. Tatan e bon mwakuri korakora ni kabuakaka ana Ekaretia te Uea ni kamanenai aanga nako. Tabekan titiraki ao karioan nanououa e bon bebete. Te bwaka inanon ana bwai ni kamwane e kona n riki nakon temanna. Onimakinan rongorongo ao kaeka are a katauraoi tabeman e kona n rang bebete nakon karaoan te mwakuri ni ukoran te koaua i bon iroura “n te kamatebwaia ao naba n te onimaki” (Reirei ao Berita Aika Tabu 88:118; kairaki ma katuruturuana). Ma n tokina, anne ae tangiria te Atua.
Ngkana iai am kangaanga n titiraki ke nanououa n taekan te Ekaretia ke am onimaki, ko aki kona ni kunea te koaua man warekan blogs ke ongoraam nakon rawerawe mairouia koraki ake aki boraoi ma te Ekaretia ke ake a tia ni kitanna. Ma ngkoe naba ko na bon aki rauaki ma kaekaana ae kabuta, ao tao ko na aki tangiri iango n aron “tataninga ni karekean te kaeka ni karokoa te tai are imwiina.”
I reiakinna bwa ti aki kona ni katan iaon aia atatai ao aia kakoaua tabeman, ma ti riai n rairaki nakon te Atua are bon ngaia mwiokon te oota ni kabane ao koaua (taraa Reirei ao Berita Aika Tabu 93:26). Ti riai ni kamatebwaia n oin ara iango, ma ti riai naba n titirakina te Atua bwa eti are ti iangoia (taraa Reirei ao Berita Aika Tabu 9:8). Ti riai ni kamatebwaia boni ngaira, n aron are e karaoia Iotebwa Timiti (taraa Rongorongon—IotebwaTimiti 1:20) ao ti na taotaonannano inanon ara ukeuke (taraa Aramwa 32:41). Ma kamatebwaiana ma te onimaki e nanonaki ti riai ni kakoaua te koaua man maiuakinana (taraa Ioane 7:17; 1 I-Tetaronike 5:21).
Ngkana I kamatebwai bwaai are a kaaitara nakon te Ekaretia, I namakinna kanga ti teboo ma I mena inanon te bubu nang ae roo (taraa 1 Nibwaai 8:23-24; 12:17). Ngkana I taua ao ni kamatebwaia ana taeka te Atua, anne ae E kainanoia ni kanakoa Tamneina ni kakorakora nanou ao au iango.
E Tau n Tii Ngaia te Kantaninga?
Tabeua te wiiki imwiin nakon Kayson iaon ana mition, au beretitenti n te titeiki e kawarai. I tuangnga te bwai ae e a tia n riki inanon wiiki akanne imwiin aia marooro tariu ma ngai. I taku bwa I a tangiria ni karekea au rekomente nakon te tembora ae boou. E titirakinai ngkana I kona ni kaekai raoi titiraki n te rekomente. I kaotia, “Beretitenti, Ngai iroui I aki kona moa n taekinna ae I ataia bwa e koaua te Ekaretia, ma au kantaninga ae koaua ma nanou ni kabane bwa te Ekaretia e bon koaua. Ao N na waaki ni maiuakina maiu ni kaineti ma te kantaninga anne. E tau anne?”
E toki tabeua te tekan ngkanne e taku, “Travis, e tau anne n taainako.”
Iai bwaai tabeua ae I tiku n tataninga ni kan ota iai, ma bwaai tabeua a tia n riki n rang ni mataata nakoiu. I a ataia bwa e tangirai Tamau are i Karawa. I ataia bwa ti kona n tiotio nako ao n ikakorakora n te taina. Ma I ataia bwa rinanon Kristo, Ana Mwakuri ni Kamaiu, ao te kantaninga ae e uotia, e bon karekea te kawai are e kairiira n oki Nakoina.
E maeka te tia korokaraki i Utah, USA.