Te Reirei ma Bwaai ni Kabotau n te Bootaki n Utu n te Tairiki
Kabonganaakin Raoi Am Tai n ae Tamaroa
Ngkana ko moanibwaia moa te Uea, iai nnen baikana imwiina.
Kamataata n te tamnei iroun David Habben
Iraua mwaitin waaki ni kakukurei ae anaa nanom ni katoa bong? Ti bane ni kabanea 24 te aoa, ma e kanga aron kabonganaan te tai anne iroura e karekea te bitaki ae korakora!
Beretitenti Dallin H. Oaks, te Moan Kauntira n te Moan Beretitenti, e taku: “Mwaitin bwaai aika raraoi ake ti kona ni karaoi e riaon te tai ae e tau ibukin katiaaia. Tabeua bwaai a tamaroa riki nakon ake a raoiroi, ao aikai bwaai ake a na taraaki riki inanon maiura. … Ti na riai ni katikui bwaai tabeua aika a raraoi bwa ti aonga n rinei tabeua riki aika a tamaroa ke a rangi n tamaroa riki.”1
N te waaki ae e karaoaki aei, ko na kaotia bwa tera ae na riki ngkana ti karika ana mwakuri te Uea bwa ara moanibwai.
1. Kanoaakin te Tai
A mwaiti waaki ni kakukurei aika raraoi are ti kona ni kabongana iai ara tai ni karekea. Tuangiia kaain am utu bwa a na tibwauai tabeua bwaai ake a kabanea aia tai iaona ni karaoi ni katoa bong.
Kabwarabwara bwa te tiaeki e tei ibukin te tai. Atiibu ao te tano a tei ibukin bwaai aika kakaokoro ake ti kona ni karaoi ma ara tai: atiibu ake a bubura a tei ibukin bwaai ake e tuangiira te Uea bwa ti na moanibwai ni karaoi, n aron kamatebwaian booki aika tabu, mwakuri n ibuobuoki, te mwakuri n te tembora ao rongorongon te utu, te nanako n taromauri, ngkai te tano bon kanikinaean tabeua waaki ni kakukurei aika raraoi, n aron karaoan ara bwai n reirei ni mweengara ao ni kabanea ara tai ma raoraora.
2. Te Aki Raoi Babaire
Kabwaroa te tano ni kabane nako nanon te tiaeki, imwiina karin atibu ake a bubura iaona. Ngkana ko kabwakaa moa te tano, akea nnen taian atiibu aika bubura—n aron te kawai are ngkana ti moanibwaii moa waaki ni kakukurei tabeua iaon bwaai ake e a tia n tuangiira Tamara are i Karawa bwa ti na karaoi, e na aki tau ara tai ibukin bwaai aika a rangi ni kakaawaki riki.
3. A Riki Bwaai n aron ae Kantaningaaki
Iesu Kristo e tua, “Tai ukoukori bwain te aonaba aei ma ukoukora moa katean uean te Atua, ao ni kateimatoa ana raoiroi” (Ana Rairairi Iotebwa Timiti, Mataio 6:38 [ni Mataio 6:33, bwaai aika a na taraaki i nano a]). Maroroakinna bwa ko na kanga ni moanibwaia moa am tai man ukoukoran uean te Atua moa.
Kabwaroa kanoan am tiaeki ao manga moanna ma bwaai akane riki. Tarim ao mwaanem aika uarereke a bae n tangiria ni kan ibuobuoki. Tuangiia bwa a nnei moa atiibu aika bubura riki inanon te tiaeki. Ngkai ko kabwakaa te tano imwiina, taraia bwa e kanga ni kanoaa te tabo are e mwaawa ni katobibi atiibu aika bubura ni karokoa are e bon bane n rin te tano inanona.
Titirakiniia am utu n aia iango bwa tera ae nanonaki n ana berita Russell M. Nelson aei: “Ngkana ko teimatoa n angan te Atua mwakoron am tai ae moan te kakawaki, E na kabatiaa are i mwiina.”2
Moanibwaia Moa te Uea
Ngkana ti ukora karaoan ana kantaninga te Atua moa, E na buokiira ni karekea ara tai ae tau ibukin baika a riai ao ni kakukurei. Ngaia are ngkana iai rootakim ni kakaean am tai ae tau ni katiai am bwai n reirei ni mweengam, ni karikirakei am taarena, ke ni karekea motirawam ae ko kainnanoia, butiia te Atua tera ae ko na kona ni karaoia ni moanibwaia moa am tai ni kaineti ma Ana babaire. Kam na uaia ni karaoa ami kouru n utu ni karimoa ana mwakuri te Uea—ao ami reitaki ma Ngaia—ni moanibwaia ni katoa bong.