Au Utu Ake Ngkoa, Aika a Boou Ngkai
E maeka te tia Korokaraki i Utah, USA.
Ngkana ko kariaia, bon akea te bwai ae e na aki kona ni bitia te euangkerio.
Kamataata n te tamnei iroun Lobo
Mitinare a tabekarake te tamnei. “Tera ae ko nooria?” a titiraki.
“Te Utu ae Kakukurei,” I kaeka.
“Ni kabane utu a kukurei?”
I ioioa atuu aaki. “Ko a tia n noora au utu,” I kabwarabwara.
Au ririki ni maiu 16 I maeka i Brazil, ikanne are I kabanea au bong ni maiu iaona. Mitinare a tia n reireinai inanon tabeua te wiiki, ma akea temanna ae kan ongora man au utu. Inanon te tai anne, mitinare aki toki n nonoria au utu n un ao ni kauntaeka. Au utu ao te utu are a kaota moangareia n kukurei inanon te tamnei akea te bwai ae a booraoi iai.
Temanna te mitinare e taku, “E tamaroa tao am utu ae ngkai tao tiaki aekan aei. Ma ko kona ni katea am utu n taai aika a na roko ae kaokoro.”
Ngke e a tia ara kakawari, a tuangai riki bwa n na tataroa te bwai are ti a tia n reiakinna. Ni katoatai, I aki raoi berita bwa N na karaoia. I kukurei n au namakin ngkana a kawarai mitinare, ao te euangkerio e nakoraoi irou. Ma I maaku n te kaeka are N na kona ni karekea. Ngkana e koaua te euangkerio, N na riai ni karaoi bitaki aika bati.
Te Rinerine ae Boou
Imwin nakoia mitinare, e tiku irou iangoan taekan te utu ae kakukurei. Ara utu e bon raroa ma te utu ae kakukurei. Tamau e aki tabeaianga n aron maiu. Irekerekeu ma tinau e aki raoiroi. Tinan tinana bon ngaia are e tararuaira, ma bon akea ibuakora ae waaki n aron te utu n te kawai are a reirei iai mitinare. Akea ibuakora ae kakaota aia tangira nakon temanna ma temanna ke n kabanea aia tai ni bobotaki.
Nikabanea maiu I berita bwa N na riki bwa te karo ae raoiroi n te bong teuana. N na riki bwa te karo are I tuai ma ni karekea. Ma e ngae ngke a reireiai mitinare, I moanna n ataia are I bon karaoi bwaai ake a karaoia au karo ngke rorou. I titiku ni kabakanako tai, karaoi bwaai ake I kan karaoi, ao I maiu n aron te tia kaaitara. N akean raoi iangoana, I bon kaokioka kateia au karo.
Aio au tai ni bubutia te Atua.
Ngke I tataro n te kabanea n tai, I karekea te kaeka are I kaman kariaria. Te Ekaretia e bon koaua! Ngkai e a bon roko te tai ni karaoa te rinerine.
Ngai ae Boou
Tibu te unaine e riai moa n anga ana kariaia imwain ae N na bwabetitoaki. E bon totokoia, ma I teimatoa ni kakauringa.
“Tibu te unaine, Leonardo raa ae ko nano irouna?” I titiraki. “Are otiotinako ni manging ao n moko ao n oki ni bwakanakotai? Ke ko tangira ae antai Ngai ngkai? Bitaki aikai bon ibukin te euangkerio
Tibu te unaine n tokina e a kariaia, ao I a bwabetitoaki ao ni kamatoaaki. Man te tai anne, te bwai ae kakaongora ae moanna n riki inanon au utu—te bwai ae E aki bwanin ataakina ni karokoa tabeua te ririki imwina.
Te Utu ae Boou
Bon imwain nakou n au mition i maiakin Brazil, tibu te unaine e roko ni kaea ana maungatabu te titeiki ma ngai. Imwin anne ti karaoa ara bootaki ni kaoti koaua ae uarereke ma au utu ao raoraora. I miimi ngke, Tibu te unaine e tangiria n taekina te bwai teuana.
“Man te tai are e moan kaaina ami ekaretia Leonardo, au utu a moanna n riki bwa te utu ni koaua,” e taku. Ngkanne e koroi kawai ae a tia ara utu ae bwanin n rikirake ni kaan: ngkai ti a kabanei ara tai n ikotaki. Ti a moanna n taekina “I tangiriko nakon temanna ma temanna, ngke ti bon aki kakaraoia mai mwaina. Te un ma kauntaeka e toki. Te iraorao ni koaua e rikirake ibuakora ngaira ni kabane. Ti a karekei rakan riki kanara ao ti kakabwaiaaki n ae bati ni mwakoro tabeua.
I noori taian bitaki aikai naba, ma I aki ataia ae te bwai ae riki anne e irekereke ma mwiin te tai are I bwabetitoaki iai.
“Tao tiaki ngai kaain ami ekaretia,” e taku, “ma ngai raoraoia kaain ami ekaretia. Ao I ataia bwa e a tia ara utu ni kakabwaiaaki ibukin ana rinerine Leonardo.”
Te Ota ae Boou
I aki kona ni kakoaua! Ao ngkanne, ngke Tibu te unaine e taetae bwa e kanga ara utu n rang ni kaan, I waekoa n uringa te tamnei are a kaotia mitinare nakoiu ririki imwaina. Ngkoa, I iangoia bwa ti te kawaiu ni karekean te utu ae kakukurei bon tii ma au utu n taai aika a na roko.
Ma I kairua. Au utu ae ngkai a bon kukurei! Ti rikirake n itangitangiri imarenara.
Tao bon akea man au utu ae e na kaaina te ekaretia n te maiu aei. Ma e ngae ngkana aki, I ataia bwa te Atua e a tia ni kakabwaiaira ni kawai aika a mwaiti. Ana euangkerio Iesu Kristo e kaotia nakoira arora ni katamaroa riki ara utu, e aki taraaki bwa tera aron taraan ara utu.