Nakomai, Iriirai: Ana Boki Moomon
Ti na Kanga ni Kaitarai Reirei aika a Kairua?
Turai 6–12
Korioa bon te tia kakewea Kristo are e kabwarabwara ni “kaitarai taetae ni burabeti ake a tia n taekinaki irouia burabeti, ni kaineti ma rokon Kristo.” (Aramwa 30:6). E tataekini bwaai riki tabeua aika kairua, ao e kairanako “nanoia aika a mwaiti” (Aramwa 30:18).
E ngae ngke e riki aei e raka iaon 2,000 te ririki n nako, a mwaiti aomata ni boong aikai aika a karaoa naba anne. Tera ae ti kona ni karaoia ni kamatoaira ni kaitarai reirei aika kairua n ara bong?
Ti Kona ni Karekei Oin Ara Koaua
Korioa e reireiniia aomata “bwa bon akea Kristo” ao “bwa e na aki kona n iai te mwakuri ni kamaiu ibukin aia bure aomata,” ao e kakewea ae iai te Atua (taraa Aramwa 30:12, 17, 28).
Ti na kanga n ataia bwa a maiu te Atua ao Iesu Kristo? Tera kiibu ao oin am atatai aika a kakorakora am koaua Ibukiia?
Ti kona ni Katan iaon te Kaotioti
Korioa e kakewea tamnein te taetae ni burabeti ao te kaotioti. E kataia ni katiki nanoia aomata bwa a na kakoaua “bwa akea te aomata ae kona n atai bwaai aika a na roko.” ao “kam aki noori; ngaia are kam aki kona n ataia” (Aramwa 30:13, 15).
Ti kona n nakoia burabeti ao abotoro ni karekea ana taeka te Atua ibukin ara tai. E kanga iriirakiia burabeti ni kataniko man reirei aika a kairua?
Ti Kona n Uringnga Bwa te Koaua e bon Koaua
Korioa e tuangiia aomata bwa akea te anga ae a kona n ataa te koaua (taraa Aramwa 30:24), ma Beretitenti Russell M. Nelson e a tia n reirei: “Bwaai tabeua a bon koaua. …
“… Te koaua e boboto iaon ana tua te Atua ake e a tia ni katei te Atua. … Tuua aika akea tokiia a waaki inanon ao a rooti maiuira n tatabemaniira, e ngae ngke ti kakoauai ke ti aki” (“The Love and Laws of God” [Brigham Young University devotional, Tebetembwa 17, 2019], speeches.byu.edu). Ti na kanga ni kunei ana koaua te Atua, ao a kanga ni kakabwaiai maiura?