Ara Tabo
Te Wirikiriki ae Reitinako
Kamataataan te tamnei iroun Toby Newsome
N te bong teuana inanon karaoan au mwakuri ni mitinare ni kawain Kenya ae barekareka, Ngai ma toau ti marooro ma te aine. E butimwaea te boki ae uarereke are ti anganna ma e tuangiira bwa tina aki manga oki.
Tabeua te bong imwiina ti kunea bwa ti a manga mena n te kawai naba arei, ao ti karekea te wirikiriki bwa ti na taorimwiia mwiin ara marooro ma neienne. I titirakinai i bon irou, “Bukin tera ngkai ti na manga oki ngke e a tia n tuangiriia bwa ti na aki manga oki?” Ma ti ongotaeka n te wirikiriki.
E miimi ngke ti roko ikekei ma e taku bwa e kukurei n noorira. Ti a waaki n anga te reirei, ma e a waekoa naba ni bitaki nakon te kauntaeka. Ngai ma toau ti kaina te reirei n te tataro ao n nako, ni waekoa ni kariaia n aki manga okira ikekei. Ma te bong raoi are imwiina, ti a manga moan karekea naba te wirikiriki ae korakora. I aki manga tangiria ni kan oki, ma e taku toau bwa ti riai n ongotaeka nakon te Tamnei. Ngaia are I a katoka au namakin ni kainikatonga, ao ti a mang oki nako. Ngke ti a roko ikekei, I rangi n tounako. Titebo ma e a kaokoro taraan te aine arei. E bitaki taraakin moana, ao e a tauraoi n ongora nakon te bwai are ti na taekinna. N rokora are imwiina, e titirakiniira nningai ae na kona ni bwabetitoaki iai.
Aua te wiiki imwiina, e a bwabetotoaki nakon Ana Ekaretia Iesu Kristo Ibukiia Aika Itiaki ni Boong aika Kaitira. Imwiin kamatoaakina, e rabwatiira ao n tuangiira bwa e rangi ni kakaitau ibukin okira. I reiakinna bwa n taainako ti bon riai ni kakauongo ao ni mwakuri iaon taian wirikiriki. Tamara are i Karawa e katauraoiia Natina bwa a na karekea te euangkerio, ao E kabonganaira ni kabane rinanon te Tamnei ae Raoiroi.
Leaha M., KwaZulu-Natal, Amerika Maiaki
Nningai ae N na Kona ni Kaaina iai te Ekaretia?
Ngke N nang tokara au kanimaua n ririki, e a bua ana onimaki tamau ao ni baireia bwa e nang kitana te Ekaretia. E bon rangi ni kangaanga, ai moarara riki ngke e a koro waniua au ririki. I bon rangi ni kukurei ni bwabetitoaki, ma te bwai ae riki e taku tamau bwa N na aki. E tangirai bwa N na tataninga ni karokoa are I a ikawai riki n te aro are I aonga n ataia raoi ae N na tangiria ni karaoia ma te motinnano. Ao ngaia are I a mamataku ngke a bwabetitoaki raoraou.
I uringa mengon au iango—ngkana e koaua te Ekaretia, bukin tera ngkai e na totokoa bwabetitoakiu? N aron te kairake ae tebwi tabun ana ririki, e bon rangi n tang nanou n nooriia kairake ni kabane bwa a nako n te tembora ibukina ngkai e rangi ni korakora nanou ni kan nako iai. E bon kaangaanga ae N na aki ira te waaki, ma I ataia n taainako bwa e na bon reke au tai!
Ni Meei 2019, I a bwabetitoaki ngke 16 au ririki. I uring taneiai aika mwaiti ake I a tia ni karekei n namakinan te kimwareirei n te euangkerio ao karekean te koaua. Bon te taneiai ae moan te kakaawaki, ao rinanon ni kabane taian kangaanga ake I karekei ni karokoa te bong anne, I ataia ma nanou ni kabane bwa e koaua te euangkerio ao e bon koaua n taainako.
Trinity C., Colorado, USA
Bukin taian Tua
I kukurei ni kaea ana maungatabu te roronrikirake, ma ngkanne I a kunea bwa a rangi ni mwaiti taian tua—n aron te katooto, akea te tareboon ao akea te otinako ngkana tii ngkoe. Titebo ma ikawai a teimatoa n tarataraira. Ma e reke au tai ae moan te nakoraoi, a rawata raoraou aika a reke, karaoa te ibubuoki iaon te mwakuri ni karikirake, ao n reiakina taekan te euangkerio.
N tain te bootaki ni kaoti koaua n ana kabanea ni maungatabu te roronrikirake, temanna te tia kairiiri e taekinna bwa e bati ana tangira ibukira, kairake n te titeiki.
Ngkana ko tangiriira, bukin tera ngkai a rangi ni mwaiti taian tua? I iangoia. N te tai naba anne, titebo ma e ataa au iango, e a kaeka au titiraki.
Taan kairiiri a katauraoi tuua, e taku, n aki karawawataira ma ibukin kamanoakira. N te tai are e taekina iai arei, I bon riingaki iroun te Tamnei. I ataia bwa Tamara are i Karawa e anganiira tuua ibukin naba anne. A na aki karawawataira, a na bon buokiira n okiria ma te kamanoaki (taraa Reirei ao Berita aika Tabu 82:2–9).
I riingaki iroun te Tamnei ae Raoiroi ao e buokai n ataia bwa e koaua aio.
Serge P., Île-de-France, France