“Antai ae Moana Natiu?”
I katamneiai n tatakarua nakon te aomata are e moana natiu te mwane, ma ngke I itaramata ma te turaiwa.
Kamataata n te tamnei iroun Ellerie Arnold
I a bon tibwa nikira natiu te aine n ana auti raraou ngke I karekea te tareboon mairoun kainnabau, Jonathan. E tuangai bwa natira are 11 ana ririki, Aiden, e moanaki n te kaa ngke ngaia ma Jonathan a rinukan te kawai.
Te turaiwa e bwake nakon te angamaing n rimoan Jonathan ao e aki noora Aiden iaon ana bwatika. Te turaiwa e moananako moan ana bwatika Aiden. E kibarake n te eea, n taua ana bwatika, ao e rebwe atuna ma iteran te kaa ngke e bwaka rikaaki. Ngkanne e a bwaka iaon te kawai ma ana bwatika e toka iaona. Te kakaitau, e kabongana nangoan te atu. Te turaiwa ao tabeman riki aomata a tei n ibuobuoki ngkai Jonathan e wetea te amburanti.
Au iango ao au namakin n te tai ae karina e a tanoi. I kabubuti ni kaineta te tuta ni kawai are e riki iai te kabuanibwai, ni kantaningaia bwa N na kauia te amburanti bwa I aonga n raona Aiden.
Iango ni kan un ni kakaea te turaiwa e biriaitua n au iango. “Tera ae riki n ana iango te turaiwa?” I iangoia. “E aera e manging? E taetae iaon te tareboon?” I rang un ao e korakora raraomau. I aki ataia bwa kakaiakira ikoakin Aiden.
Ngke I roko n te tabo are e riki iai te kurati, te amburanti e a kaman nako. Ti uoua kaa ni bureitiman ao tewaana te kaa ae e tei irarikin te kawai n te tabo are riki iai te kurati. Te aine ae taraa n rawawata e tei irarikin te kaa.
I nakoina man titirakinna, “Ko noora ae moana natiu?”
E taetae ma te karaurau, “Ngai.”
I katamneiai n tatakarua nakon te aomata are e moana natiu te mwaane, ma ngke I itaramata ma te turaiwa, te un n nano e bua. I kunea bwa I a tang ao I koona neiei. E kabwara ana bure, ao I tuangnga bwa a na nakoraoi bwaai ni kabane. I kunea imwiina bwa bon akanne naba taeka ake e taekini Aiden nakoina imwain ae a roko bureitiman. N tokina, Aiden e marurung ma tabeua te nananga ao te nikunikun.
I kukurei bwa n te tai ae rangi ni kakaawaki anne, Tamara are i Karawa ae tatangira e a tia ni kakabwaiaai ma te korakora ni kabwarabure n onean mwiin te kairiribai, riki ngke I aki bubuti Nakoina. I ataia bwa E atai arora ao n tainako e anganga Ana ibuobuoki.