2020
Iai Am Titiraki ibukin te Euangkerio? Aikai Nimaua Kawai ni Karekei Kaekaaia
Turai 2020

Tii aika a Maiu man te Iti

Iai Am Titiraki ibukin te Euangkerio? Aikai Nimaua Kawai ni Karekei Kaekaaia

Iroun Chakell Wardleigh

Ana Maekatin te Ekaretia

Iai naba au titiraki. Ao akea te bwai ae ti na maakua.

“Iai ae iai ana titiraki?”

Ko a tia n ongongo aei n tokin te reirei ao ko iango, “Eng, E rang mwaiti” ke “Eng, I a bon bua,” ma ko tiku ni kainabwabu?

I a tia ni kakoaua. Ao n tabetai I teimatoa ni maaku n titiraki.

I maaku bwa e aki tau au atatai, bwa tera te bwai are a kona n iangoia tabeman, ao ni manga rinanon rongorongo ake a na manga karekei riki titiraki aika a mwaiti.

N aki taraa anne, e riai n akea te maaku ke te mamaa ngkana iai te titiraki ao te kan atatai riki, riki ngkana e roko n taekan te euangkerio. Tamara are i Karawa e tangiria bwa ti na ukoukora riki te rabakau! Riki Unimwaane Dieter F. Uchtdorf e taku, “Te kau titiraki tiaki kanikinaean te mamaara, bon te bwai ae roko imwain te rikirake.”1

Aomata ni kabane e mwaiti te bwai ae a kan reiakinna. Ao titiraki a karekea te atatai ao te onimaki ae korakora —ti ngkana ti na kona ni kakaai kaeka n te kawai ae eti! Aikai nimaua kawai ni kamataatai raoi nanon am titiraki.

1. Tuoa Bwa Ko Karekei Maiaa

A rang mwaiti bwaai aika raraoi ake ko kona n onimakinna are e na kona n anganiko riki te iango n aron koroboki aika a tabu ao bwain te Ekaretia. Ma a rang mwaiti naba bwaai aika a kaairua ao aaki bwanin rongorongoia aika a tabe n roroko inanon te aonaaba aio. Te kabwaia bwa ko kona ni kina te koaua man ae kewe!

Anthony Sweat, te tia ibuobuoki ni burobetia iaon rongorongon ao reirein te Ekaretia n te Brigham Young University, e anga nimaua titiraki ake ko kona n titiraki iai bwa ko aonga n ataia ae rongorongo akanne a bon koaua:

  1. Rongorongo akanne bon mai iroun raoi te tia kororongorongo? (Koreaki ke karaoaki iroun temanna are e iria ke ni mataku n te bwai ae riki.)

  2. Bon te rongorongo ae tibwa riki? (Kaweaki n tain ke n uakaan ma te tai are e riki iai.)

  3. Iai inanona te iango ae kantaningaaki? (N aron ae konaa, te tia korokaraki e kakaea bwa e na ti tetikina, baeranti, e na aki tabeitera, ao n aki kakaonoti.)

  4. Tera rekerekena ma rongorongo ake tabeua? (Bongin namakaina, koaua, koauan bwaai ake a taekinaki, ao a mwaiti riki bwa tao a bane ni booraoi ma rongorongo ake tabeua iaon kabwarabwaraan te bwai are e riki anne.)

  5. Ao bwaai ake e taekini a boutokaaki man taan kakoaua? (Taetae ke koroboki a boboto iaon koaua ake a kakoauaki raoi ao ni boutokaai ma mwiia aika a koreaki.)2

Unimwaane Jeffrey R. Holland man te Kooram n Abotoro n te Tengaun ma Uoman e reirei, “Ni bwain te onimaki ao te rairaki, e ibuobuoki bwa kona kaineta am titiraki nakoia naake bon iai naba teutana irouia!”3 Ana taeka ao titiraki ake ieta e kona n anganiko te mwengaraoi ni kakaean rongorongo aika a onimakinaki.

2. Katan iaon aia Taeka Burabeti

Burabeti ao abotoro a tibwai reirei ao koaua (ao bon kaeka ibukimi!) rinanon kaotioti. E a tia ni karauaki nanou n taai aika a mwaiti man warekan ao n ongoraean taian marooro n te maungatabu ni kabuta ngkana I nanououa ke ni bwarannano.

Riki ngkana ko aki ota ni bwaai ni kabane iaon aia rongorongo taan kairiiri n te Ekaretia, uringnga bwa aia taeka a roko mairoun Tamara are i Karawa—a roko man boton te tangira ao te koaua. Ngkana ko uringnga ao n onimakina ana taeka Unimwaane Ulisses Soares: “Karekeaia burabeti bon kanikinaean ana tangira te Atua ibukiia Natina,”4 ko kona ni uota te onimaki inanon maium, n aki taraia bwa tera te rabakau are ko ukoukoria.

3. Kamatebwai koroboki aika a tabu … bon kamatebwai Raoi

E kanga aron taraakin am kamatebwai ni koroboki aika tabu? Ngai e kona n tamaroa riki! Ma ngkana I bon iangoia ma te koaua te bwai are I warekia, I noora te bitaki inanon maiu. I namakina riki te rau ao te kantaninga. Ni kauka am iango nakon te kairiiri inanon koroboki aika a tabu, katai iango aikai:

  • Moana ao kaina am kamatebwai ma te tataro. Ngkai ko kaoa te Tamnei bwa e na buokiko n ota, ko na ata te iango ae korakora riki ao te wirikiriki.

  • Korei namakin ake ko karekei. Warekakin namakin aikai imwiina e kona ni buokiko ni karaoi reitaki inanon maium ao ni kinai kaeka inanon taina.

  • Ana tabeua te tai n tiku n rau. Tekateka n aki karongoa ao kakauongo nakon iango aika okioki ao namakin imwiin am wareware ao am kamatebwai. Uringnga bwa te tamnei e taetae n te bwanaa, ae beebete man maraaraa.

4. Reiakina Aron Karekean te Kaotioti

N te tai aei inanon te maiu, I a tia ni kainnanoa riki Tamara are i Karawa bwa e na kairai ao ni buokai ni kakorakora au onimaki. Ao I a tia n rang n un n tabetai ngkana I karaoi bwaai ni kabane ake a kaoa te Tamnei ao I teimatoa n aki karekea te kaeka teuana mai karawa. Ma te kakaitau, I a tia n reiakinna mairoun Titita Sheri Dew, te kauoman ni kauntira ngkoa n te Bootaki n Aine n te Beretitentii ni Kabuta, bwa kaukan te reitaki ma Tamara are i Karawa, titirakiniko titiraki aikai:

  • Ko anga am titiraki ma te kantaninga are iai kaekaia?

  • Ko tauraoi n onimakina te Uea ao N anganna bwa e na bon kaekako?

Ao imwiina butiia Tamara are i Karawa:

  • Bwa e na reireiniko bwa E na kanga n taetae nakoim ni bon ti ngkoe.

  • Tera Ana namakin ibukim.

“Imwiina mataku bwa e kanga n reireiniko,” e taku, “n raonaki ma koroboki aika a tabu ake a katikiko, kaokiokan rongorongo n te maungatabu ni kabuta ake ko atia n aki ongoraeakin n te moan tai, ao a bati riki. … Inanon taina, E na tuangko, ao ngkana e karaoa anne, kona reiakina ae mwaiti riki iaon ataakin te kaotioti rinanon te Tamnei.”5

Titiraki aika a kakaawaki aika uoua aikai e a tia ni karika te bitaki ae korakora inanon au konabwai ni kina ao ni karekea te kaotioti.

5. Taua Otam are Ko Bon Ataia

N tabetai kaeka aki waekoa n roko. Am kaeka n te tai aei e kona n tii onimakinan Tamara are i Karawa ao ni karekea te taotaonaki n nano. Uringnga ana reirei Unimwaane Uchtdorf’ are kona “Nanokokoraki n am nanououa imwain ae ko nanokokoraki n am onimaki.”6

Ngkana ko namakina te bwarannano, iangoa te koaua are ko taua inanom. Ngkana I rinanon te kaangaanga, I uringii taai are ngke I ataia ma te aki nanokokoraki bwa ngai te nati te aine irouia Kaaro ake i Karawa, are te Atua iai ana baire ibukiu, ao Iesu Kristo bon au Tia Kamaiu.

Ngkana iai am titiraki, e kona ni bebete riki bwa ko na boboto iaon tera te bwai are ko aki ota iai nakon te bwai are ko ota iai. Ma ngkana ko tauraoi ni kamaraua nanom, kateimatoa te taratara ae akea tokina; ao n nanorinano n nano teuana ma Tamara are i Karawa, E na kairiko n tainako nakon te koaua ao n anganiko te kantaninga ni karokoa a roko atatai aika a raka. Ao te bong teuana, e na reke kaekan am titiraki ni kabane (taraa Reirei ao Berita aika Tabu 101:32–36).

Bwaai aika a na taraaki

  1. Dieter F. Uchtdorf, “The Reflection in the Water” (Church Educational System fireside for young adults, Nov. 1, 2009), broadcasts.ChurchofJesusChrist.org.

  2. Taraa Anthony Sweat, Seekers Wanted: The Skills You Need for the Faith You Want (2019), 11–20.

  3. Jeffrey R. Holland, “The Message, the Meaning, and the Multitude,” Riaona, Nobembwa 2019, 6.

  4. Ulisses Soares, “A Taetae Burabeti ni Mwaakan te Tamnei ae Raoiroi,” Riaona, Meei 2018, 99.

  5. Sheri L. Dew, Worth the Wrestle (2017), 8, 9, 41.

  6. Dieter F. Uchtdorf, “Come, Raoniira,” Riaona, Nobembwa 2013, 23; taraa naba Jeffrey R. Holland, “Lord, I Believe,” Riaona, Meei 2013, 93–94.